Қозоғистоннинг олий ўқув юртларидан бирида тўлов-шартнома асосида таҳсил олаётган 3-курс талабаси Гулмира қачондан буён тўлов шартномасини қандай тўлашни билмаётган эди.
У онасиникида яшаб, ёзги таътил даврида бувисиникига, яъни Ўзбекистоннинг Чирчиқ шаҳрига келиб кетарди. Гулмиранинг тарбияси билан бувиси шуғулланган. Сабаби ажралгандан сўнг унинг онаси Қозоғистонга кўчиб кетган ва у ерда бизнес билан шуғулланган. Она меҳрининг ўрнини қоплаш учун Аделя Рустамова қизидан ҳеч нарсани аямади. Уни қимматбаҳо кийимлар кийинтириб катта қилган. Гулмира Чирчиқдаги коллежни тугатганидан сўнг, онаси унга Қозоғистондаги ОЎЮга киришни маслаҳат бериб, тўлов-шартномасини тўлашни ўз зиммасига олган. Аммо, она ва қиз муносабатлари ёмонлашиб бориб, навбатдаги жанжалдан сўнг Аделя Рустамова Гулмиранинг ўқиши учун пул тўлашдан бош тортган. Ҳаммаси шундан бошланди.
Гулмира мўмай даромад олиш йўлини топди. Антон исмли ўртоғига қўнғироқ қилиб, Қозоғистонда онасининг кафесида официантка бўлиб ишлашга рози қизларни топишни илтимос қилди. Антон Сабина ва Мадина исмли қизларни топди, Мадинани кўриб, Гулмира гавда тузилиши тўғри келмаслиги баҳонасига унга рад жавобини берди. Сабина билан Гулмира узоқ суҳбат қурди. Сабина нима шуғулланиши лозимлиги ва бу учун қанча маош олишини тушунтириб берди. Ночорлигидан, икки нафар гўдагини боқиш учун Сабина шартларга рози бўлди. Белгиланган кунда Гулмира ва Сабина келишилган жойда учрашишди. Қизлар уларни кутиб турган таксига ўтириб, “Ғишт-кўприк” божхона постигача етиб боришди. Ҳужжатлар текширилганда, Сабинанинг паспортида прописка ҳақидаги ёзув йўқлиги аниқланди.
Қўшни республикага нима мақсадда бораётганлиги сўралганда, Сабина ўзини йўқотиб, Гулмирага қарай бошлади. Гулмира эса кутилмаганда уни танимаслигини айтди. Охир оқибатда Сабина бор-йўғини айтиб берди. Қаерга бораётганлиги, бу учун уни ким рози қилганлиги, бир ойда қанча маош ваъда қилганликларини баён этди. Podrobno нашрининг “Постда” газетасига таяниб хабар беришича, Гулмирага нисбатан қўзғатилган жиноий иш Зангиота тумани ИИБда кўрилмоқда.
