Эркакларнинг кўнглига ошқозон орқали йўл топиш мумкин дейишади. Аммо унинг туғилган буржини билсангиз, бу йўлингиз анчайин қисқаради. Ана ундан сўнг «аёлим ичимдагини топади-я» деган мақтовларнинг охири бўлмайди.
Қайсар ва қатъиятли
Ҳамал (21.03-20.04) Билдим, кўрдим, ғолибман! Ҳамал буржидаги эркаклар айнан мана шундай феъл-атвор эгасидирлар. Уларнинг хаёлида қўлларидан келмайдиган ишнинг ўзи йўқ. Бундай етакчилик яхши, аммо қайсарликларию, шошқолоқликларини ҳам таъкидлаб утмасак бўлмайди. Агар турмуш ўртоғингиз қуй буржига мансуб бўлса, ҳеч қачон унинг ишончини йўқотманг. «Ишдаман» деб «бирров» дўкон айланмоқчи бўлсангиз ҳам, бу ҳақда уни албатта огоҳлантиринг. Чунки бу тоифа эркаклар яқин инсонларининг ишончига суянувчи бўлиб, озгина ўзгаришни сезсалар, дарров тўнларини тескари кийиб олишади. Ана ундан кейин ўзингиздан ўпкаланг.
Узоқни кўзлайдиган..
Савр (21.04-20.05) Ўйлаган ишингиздан бирор наф чиқишига кўзингиз етмаса, яхшиси бу ҳақда эрингизга гапириб ўтирманг. Чунки савр буржидаги эркаклар фойдаси бўлмаган ишга асло қўл уришмайди. Аммо уларнинг сабр-матонатига манаман деган аёл ҳам тан бериши турган гап. Бундай эркакларнинг кўнглига йўл топиш жуда осон. Қандай дейсизми, мазали таому, пишириқларни хозирлаб, "Бегим, атайин сиз учун тайёрладим, мазасига бир бахо беринг" денгда, кейин натижасини кўринг. Аммо такаллуф қилишни ошириб юборманг. Чунки савр буржи эркаклари ортиқча хушомадни ёқтиришмайди. Қош қўяман деб, кўз чиқариб юрманг тағин.
Сирли ва ширин сўз шайдоси...
Жавзо ( 21.05- 21.06) Агар жондан азиз суюклигингиз эгизаклар буржига мансуб бўлса, нима ҳам дердик "Худо қувват берсин". Жавзоларнинг феъл-атвори ўзгарувчан бўлиб, худди бир танада икки инсон яшаётгандек туюлади. Уларни бирор нарсага махлиё қилиш осон эмас. Сирли ва зеҳни ўткир бўлгани учун олдиндан нимани ўйлаётганини аниқ айтиб бўлмайди. Аммо нозик томонлари ҳам йўқ эмас. Улар чиройингизни кўз билан эмас, сўзингиз билан қадрлашади. Шу боис, ҳар замон бўлса-да "Дадаси, бахтимизга соғ бўлинг, ишда бўлсангиз уйимиз хувиллаб қолади-я" деб эркалаб туришни асло унутманг.
Ўзгарувчан "об-ҳаво”...
Саратон (22.06-22.07) Бир қарасангиз тўлиб-тошиб атрофингизда парвона-ю, гоҳида эса бор-йўқлигингизни ҳам пайқамайди. Афсуски, бу қисқичбақа буржи эркакларининг феъл-атворларидаги ўзига хос "фазилат". Агар буни ўзгартирман деб ўйласангиз, ўзингизни қийнайсиз, холос. Бундай эркакларга фақат ширин сўз билан муомила қилиш керак. Айтайлик, рўзғор учун бозорлик керакми, "Бу уйда мен эркакми сизми? демасдан "Дадаси, рузгорга ул-бул керак эди, ўзим олиб келай дейману, аммо шундоқ пахлавон эрим турганида менга йўл бўлсин дедим, тўғри қилибманми?!" десангиз сиздан-да оқила, доно, аъло рафика топилмайди. Аммо эрингизнинг олдида асло бошқа эркакни мақтаманг. Бундай эркакларнинг рашки жуда ёмон бўлади.
Иззатталаб ва бошқарувчи..
Асад (23.07-23.08) Турмушдаги асосий ролни унга топширинг, агар ижро махоратидан дарс бераман десангиз, уйингизни тополмай қоласиз. Чунки мазкур бурж эркаклари эътибор ва мақтовни жуда хуш кўрсалар-да, аммо аёл кишининг ақл ўргатишини хазм қилишолмайди. Улар ўзларини жуда ақлли ва кўп нарсани биладиган деб уйлашайди. Агар эрингиз ҳам шу буржнинг вакили бўлса, нотўғри гапини ҳам тўғри деб тураверинг. Арслон буржи эркаклари бошқарувни севишади. Шунинг учун ҳам қаерга борсангиз ва нима иш қилсангиз, албатта огоҳлантириб олдидан ўтишни унутманг.
Гўзаллик шайдоси...
Сунбула ( 24.08- 23.09) Бундай эркакларни нозик дидли ва ўта эътиборли десак, мутлако адашмаймиз. Бу бурждаги эркаклар атрофларида доимо гўзал нарсалар бўлишини исташади. Шунинг учун юзингиздаги пардоз, эгнингиздаги либос гўзал бўлсин. Эрингизни кўз ўнгида доимо ўзгариб турсангиз, сиздан бошқасига қайрилиб ҳам қарамайди. Бироқ бу тоифадаги эркаклар ортиқча мақтов ва олқишларни унчалик ҳам хушламайди. Бордию, эрим менга эътибор қилмайди деб ўйлаётган бўлсангиз, адашсиз, у шунчаки самимиятни ёқтиради. Аммо ўзига нисбатан жуда талабчан бўлгани боис, атрофдагиларидан ҳам шуни талаб қилади.
Ғазабидан қўрқинг...
Мезон ( 24.09- 23.10) Улар билан тил топишиш жуда осон. Сабаби, улар тинчликсевар бўлишади. Мабодо эрингиз мезон буржига мансуб бўлса, сабрини синайман деб овора бўлманг. Ҳар қандай вазиятдан шундай чиқиб кетадики, ўзингиз ҳам ҳайрон қоласиз. Аммо жахлини чиқарсангиз, манаман деган коялар ҳам силкиниб кетади. Бундай эркаклар оилапарвар бўлишса-да, уйдаги гап-сўзлардан кочиб, кўчадан ортмай қолишади. Чунки уларнниг феъл-атворида катта давралар ва қизиқарли сухбатларга мойиллик бор. Тушунган бўлсангиз, шундай йўл тутингки, сих ҳам, кабоб ҳам куймасин.
Назоратни севувчи...
Ақраб (24.10-22.11) Чинакам жангчи ва бошлаган ишини охирига етказмаса тинчимайдиган эркак. Унинг феъл-атворидаги бу афзаллик сизга анча қулайликлар яратади. Нима учун дерсиз? Масалан, кир ювиш машинасини ўзгартирмоқчисиз, аммо буни эрингизга қандай айтишни билмай бошингиз қотган. Шунда вазиятни унинг фойдасига караб буринг. "Хамом жиҳозларини янгилаш учун йиғаётган пулга кир ювиш машинасини ҳам қўшсак бўларди, ахир янги жихозлар орасида онамдан қолган мослама жуда хунуқ кўринса керак. айниқса ошна- оғайнинигиз кириб қўл-пўлини юваман деганида". Бу бурж эркаклари бундай таклифдан сўнг, алббатта вазиятни назоратсиз қолдиришмайди. Сабаби, уларда етакчилик ва бошқалардан ажралиб туриш хусусияти кучли.
Самимият биринчи ўринда...
Қавс (23.11-21.12) Эрингиз қавс буржига мансуб бўлса, муомилангизда сохталик бўлмаслиги керак. Улар доимо ўзларини ҳақ деб ўйлашади. Шунинг учун ҳам ҳар қандай ишда ўз фикрларида мустахкам туришади. Агар гапимни ўтказаман деб озгина овозингизни баландлатсангиз, томошани кутаверинг. Улар билан хушмуомала муносабатда булиш керак. Бундай эркакларда мақсад сари интилиш кучли бўлади. Айниқча маррага оз қолганини ҳис этишса, куч ғайратлари тўлиб тошади.
Кутилмаган совғаларга ҳуши йўқ...
Жадий (22.12-20.01) Кечки овқат тайёр эмас, хаммомда бир талай кир-чир, ўзингиз ҳам хавас қилгудек эмассиз. Бундай кутилмаган совғаларни мазкур бурж эркаклари умуман ёқтиришмайди. Улар учун тартиб-қоида биринчи ўринда туради. Лекин аёлнинг хазил-мутойиба қилишини яхши қабул қилишади. Демак, эрингиз шу буржнинг вакили бўлса, у билан яхши кайфиятда, очилиб-сочилиб гапиришни ўрганинг. Таомингиз хали тайёр эмасми? Вазиятни қўлга олинг, "Сизни хурсанд қиламан деб, янги таом бошлагандим, аммо узоқ тайёрланишини билмабман-да, яна озгина кутасизми", денг-да, ортидан кулиб қўйинг. Бундай ғамхўрликдан кейин, қани бир уришиб кўрсин-чи.
Чекловни ёқтирмайди...
Далв (21.01-20.02) Оила қургач ҳам мустақил бўлиб, сиз билан ҳам маслахатлашишни эп кўрмаса, билингки, сиз танлаган инсон далв буржининг вакили саналади. Ҳа, афсуски уларнинг мана шу феъли доимо бошларига бало бўлади. Лекин эрим шундай экан, деб хафа бўлманг, ковғалар ўз жуфтларига жуда содиқ бўлишади. Бироқ шуни хам унутмангки, бундай эркаклар учун сиз пиширган ёғлиқ паловдан кура, қизиқарли суҳбатингиз тўйимлироқдир. Уларни қандай бўлса шундайлигича қабул қилинг.
Яхши суҳбатдош ва кўнгилчан...
Ҳут (21.02-20.03) "Инсонни бахти уни тинглашларида" деган гап, айнан ҳут буржидаги эркакларга хосдир. Улардан яхши сухбатдош чиқади. Бордию эрингиз балиқ буржига мансуб бўлса, соатлаб сухбатлашсангиз ҳам бечора индамай чидайди. Камига тўйиб-тўйиб йиғлаб олишингиз учун шароит ҳам яратиб беради. Бироқ бундан унчалик ҳам хурсанд бўлманг. Уларнинг феъли жуда таъсирчан бўлгани боис, дуч келган одамга ҳам раҳми келаверади. Шу учун эрингизга доимо эътиборли бўлинг, йўқса унинг кўнгилчанлигидан «уддабурон аёллар» фойдаланиб қолишмасин тағин. А, лаббай..
Cамира Улуғбекова тайёрлади
safsata
