Toshkent shahridagi Next savdo-ko‘ngilochar markazi xaridorlar uchun aksiya tashkil qildi. Markazning Facebook sahifasida yozilishicha, mazkur aksiya ishtirokchilari Chevrolet Malibu avtomobilini yutib olish imkoniyatiga egalar. Bu to‘g‘rida ushbu markaz saytida ham ma’lumot berilgan.
Qisqacha aytganda, aksiyaning qoidalari quyidagicha: xaridor Next savdo-ko‘ngilochar markazining birinchi qavatida joylashgan Trend supermarketida kamida ellik ming so‘mlik xaridni amalga oshiradi. Shu bilan u 2014-yilning 13-dekabrida o‘ynaladigan o‘yin ishtirokchisiga aylanadi.
Xaridor necha marta 50000 so‘m yoki undan ortiq qiymatli savdoni amalga oshirsa, unga shuncha lotereya taqdim etiladi va, tabiiyki, yutuqqa ega chiqish imkoni ham shuncha ko‘payadi. Har birida 9 ta raqamdan iborat alohida kod mavjud bo‘lgan mazkur lotereyalarni shikastlantirmasdan saqlash lozim.
Nihoyat, 13-dekabrda aksiya g‘olibini aniqlash marosimi ishtirokchilarning ko‘zi oldida o‘tkaziladi. Bunda bolalar yordamida to‘qqizta raqamni yig‘ish orqali yutuqli lotereya kodi chiqariladi. Yutuqqa esa qora rangli Chevrolet Malibu avtomobili qo‘yilgan.
Lotereya aksiyasida O‘zbekiston Respublikasi fuqarosi bo‘lmagan, o‘n sakkiz yoshga to‘lmagan shaxslar, shuningdek, Next savdo-ko‘ngilochar markazi va Trend supermarketi xodimlari ishtirok eta olmaydilar.
