Mana men ham do’stlarim, opa-ukalarim qatori oltindan qimmat o’quvchilik davrini shu aziz dargohda, sizlarning mehrga to’la sidqidildan bergan minnatsiz ta’lim va tarbiyangizni olgan ekanman, avvalom bor sharafli va oliyjanob kasb egasi bo’lgan siz ustozlarimni 1-oktyabr "Ustoz va murabbiylar” kuni bilan chin qalbimdan samimiy muborakbod etaman.
Shu baxtli kunlarda qadrdon maktabimni, dunyoni tanish, o’qish o’rganish zavqi bilan o’tgan sho’xliklarga boy, beg’ubor o’quvchilik yillarimni yodga olar ekanman, o’zining mashaqqatli mehnati, hayotiy tajribasi, nurga to’la vasli ila ozod yurtimizning ozod farzandlariga nafaqat ilm-fan sirlarini, balki Vatanga muhabbat, unga munosib farzand, hamda el-yurtga sadoqat kabi tuyg’ularni yuraklarda kamol toptirayotgan siz aziz va ustoz va o’qituvchilarimga o’zimning kattadan-katta minnatdorchiligimni bildiraman.
Ayniqsa bugun sizlar bergan insoniy fazilatlarga xos ilm va tarbiya, hamda sizlardan olgan mustahkam bilimlar mustaqil kelajak hayotimizda o’zining ulkan samaralarini bermoqda.
Hurmatli ustozlarim.!
Barchangizni bugungi bayram bilan yana bir bor qutlab, sizlarga sihat salomatlik, oilaviy baxt saodat, xonadoningizda hamisha tinchlik xotirjamlik hukm surishini Buyuk Tangridan so’rab qolaman.
Kelgusi ish va hayotingizda, qolaversa biz kabi farzandlaringizga bilim va tarbiya berishdek xayrli ishlaringizda ham ulkan yutuq va muvaffaqiyatlar tilab-
Sobiq o’quvchingiz Munavvar Hamroyeva MADADKORSIZ.
Ta’zim qilgum sizga doim aziz muallim,
Siz erursiz har sohada berguvchi ta’lim.
Ta’rifingiz madh etmoqda ojiz qalamim
Siz doimo omon buling aziz muallim.
Beqiyosdir ustoz sizning bergan mehringiz
Oh bunchalar yuksak erur ustoz sehringiz
Sizni har on esga olib orziqib dilim
Siz doimo omon bo’ling aziz muallim
Ilk bor aziz bolajonlar deya suydingiz
Puxta bilim bermoqlikni dilga tuydingiz
Nodonlarga uqturolmay yonib kuydingiz
Siz doimo omon bo’ling aziz muallim
Yaxshi yomon kunimizda hamdard bo’lgansiz
Yig’laganda yig’lab kulsak birga kulgansiz
Yutuqlarga erishsak gar olqishlagansiz
Siz doimo omon bo’ling aziz muallim.
Ta’zim qilay qo’llarimni ko’ksimga qo’yib,
Cheksiz issiq mehringizni dilimga tuyib
Ranjitsam ham kechirgaysiz erkalab suyib
Siz doimo omon bo’ling aziz muallim.
Ustozlarim uzr agar ranjitgan bo’lsam
Bir umrdayodimdasiz qayerda yursam
Har bir ishda madakorsiz mehringiz yuksak
Siz doimo omon bo’ling aziz muallim.
Qalb qo’rin ko’z nurin butun umrini
Ilmu ma’rifatga aylagan fido
Hayot sabog’ini bergan ustozlar
Shogirdlar nomidan sizga tasanno.!
|
