Жерар Депардье Россияни, руслар маданиятини, адабиётини, шеъриятини севишини айтди. Бундай юксак эҳтиромга жавобан Россия Федерацияси президенти уни қизил муқовали пасспорт билан сийлади. 2013-йилнинг энг катта шов-шувига айланган бу воқеа позитив ва негатив фикрлар баҳсини бошлаб юборди. Ким Депардье жуда ақлли йўл тутди деб ҳисобласа, бошқа биров, 1 миллион даромад кўрадиган бойнинг давлат ғазнасига 75 фоиз солиқ тўлашдан бош тортиб, ўз туғилиб ўсган она Ватанидан осонгина кечганини қаттиқ қоралади. Сочида учрашган актёр ва президент бўлган "бахтли” воқеадан жуда мамнун. Қизиқ, энди 63 яшар француз русларнинг нағмасига ўйнаб ҳаёт кечирадими? Ҳаёт ишлари қизиқ.
***
Феруза Жуманиёзова сайтимизда берилган жўяли танқидлардан тўғри хулоса чиқарди. Бу борада бўлса-бўлмаса аразлайдиган хонандаларга ўрнак бўлса, нур устига аъло нур. Жуманиёзова олдинги машҳурлигини қайтариш илинжида. Одамларнинг кўзи унинг сарвқоматига ўрганиб қолишгани эса айни ҳақиқат. Латофатни чақиришнинг йўли эса озишни тўғри йўлга қўйиш. Яқин кунларда севимли қўшиқчи яна 20.кг вазн ташламоқчи. Ана ундан сўнг бемалол яккахон концерт берса ҳам бўлади. Олға, Жуманиёзова!
***
Шоира Отабекова ўз кучига таяниб, ижод қилаётган саноқли хонандалар рўйхатига киради. "Пан Терра” студияси билан ҳамкорликда янги альбомини сотувга ҳозирлаган хонанда мухлисларига ажойиб тақдимот устида туну кун тер тўкмоқда. Ахир, бу унинг ижодида янги имтиҳон. "Табассум” номли янги қўшиқлар гулдастаси 10-январ куни омма олдида ифорини таратади. Отабекова жонли ижрода янги қўшиқларини куйлаб, альбомининг рақобатбардош ва оммабоплигини исбот этмоқчи. Мухлислар ва журналистлар эа бош ҳакам. Кўрамиз, катта ижодга гуриллаб қайтган Шоиранинг янги ижро маҳоратларини қандай баҳолашади?
***
Обид Асамов яна Нью-Йоркда. "Океан орти”га энг серқатнов кулгу устаси гоҳ ўзбекона тўйда, гоҳ концертларда хизматда бўлади. Бу галги сафар америкалик хонанда Юханнинг таклифи билан амалга ошди. Нью-Йоркдаги муҳташам саройларнинг бирида ўтказилган Юханнинг яккахон концертида ўзбек кулгу устаси томошабинларни ичакузди ҳангомалари билан хурсанд қилди. Айниқса, Асамовнинг рубоб чалиб, айтган ҳазиллари эсда қоларли бўлди.
Jasur HAMROYEV
OMAD 
