Haligi kuni bekatda tasodifan ikki dugonaning suhbatini eshitib qoldim.

- Dugonajon, bugun man uchun juda og’ir kun bo’lar ekan. Ishlarim yurishmasmish, sog’lig’im ham yomonlasharkan….

-Qo’ysangchi Nargiz, qaerdan olding bu bo’lmagur tushunchalarni?

-Sanga aytish oson, hecham munajjimlar bashoratini o’qimagansanda. O’qiganing-da tushunarding.

-Nimani tushinardim, "Munajjimlar bashorati” bo’lmagan gap. Sani nima kutayotganini Ollohdan boshqa hech kim bilmaydi.

Menimcha davom ettirishning foydasi yo’q, bu gaplarning davomiga ishonmasligingiz tayin. Ishonganlarni masxara ham qilsangiz kerak. "turgan-bitgani uydirma-ku buning, kulgimni keltirma”, deb. Men deyarli har kuni kulaman.”Munajjimlar bashorati”ni o’qiyotganlarni ko’rib. Kulaman deyish biroz o’rinsiz, achinaman. "Yakshanba kuni yulduzlarning joylashishi yomonroq” deb yozganlarga ham, uni o’qib haftada bir keladigan dam olish kunini uyga berkinib o’tkazib yuboradiganlarga ham.
Xabarlar haqiqatga yaqinlashgani yo’q, "bashoratlar” haqiqatdan aa-a-ancha uzoqlashib ketdi.
"Munajjimlar bashorati”ni yozish, tarqatish va ommalashtirishga aralashish emas, balki uni oq’ish, shunga bag’ishlangan nashrlarni sotib olish Islom dinida keskin ta’qiqlangan. "Munajjimlar bashorati” kelajakni bashorat qilish bilan shug’ullanar ekan, unga murojaat qiladigan o’quvchi Payg’ambarimizning (S.A.V) quyidagi hadisga muvofiq tushadi: "Kimki arrof(bashoratchi)ning oldiga borsa va undan biron narsa haqida so’rasa, uning ibodatlari qirq kecha qabul qilinmaydi” (Sahih Buxoriy, 5540-hadis).
Ushbu hadisda bashoratchining oldiga borish haqida gapirilyapti xolos, siz uning gaplariga ishonasizmi-yo’qmi, bu boshqa masala. Garchi "Munajjimlar bashorati”ni o’qigan odam unga ishongisi kelmasa ham, yoki qalbida shubha uyg’onsa ham, yuqoridagi hadisga muvofiq jazolanaveradi, chunki bashoratning rost yoki yolg’onligiga shubha bilan qarash uni aytgan odamning kelajakni bilish yoki bilmasligiga shubha bilan qarashni anglatadi. Bu esa, Qur’onda bashorat qilinganidek, Allohga shirk keltirish hisoblanadi. (Qarang: An’om, 59 va Naml,65)
Bu hali "Munajjimlar bashorati” ni o’qigan, ammo unga ishonmagan odamning ta’rifi. Endi agar bashorat ishonch bilan o’qiladigan bo’lsa, bunday kishi Payg’ambarimiz (S.A.V) hadisiga muvofiq dindan chiqadi:
"Kimki kelajakni bashorat qiluvchi oldiga borsa va u aytgan narsalarga ishonsa, Muhammadga yuborilgan narsaga uning aloqasi yo’q!” (Sunani Abu Dovud, 3895-Hadis)
"Munajjimlar bashorati”da insonlar taqdiri yulduzlar tomonidan boshqariladi deb da’vo qilinadi. Ularning fikricha, odamlarning hayoti, kelajagi yulduzlarga yozib qo’yilgan. Bu Payg’ambarirmiz (S.A.V) hadisida aytilgan kaftga qarab yoki idish tubiga qarab fol ochadigan bashoratning boshqacha ko’rinishi, xolos.
"Munajjimlar bashorati” ga ishonadiganlarning niyati ertaga nima bo’lishini oldindan bilib, unga munosib tayyorgarlik ko’rish. Shu tarzda ular yomonliklardan o’zlarini saqlab, yaxshiliklardan imkon qadar unumli foydalanishni maqsad qilishadi. Lekin Payg’ambarimizga (S.A.V) Alloh bu haqda boshqacha xabar beradi (Qarang: A’rof,188).
O’zini haqiqiy musulmon deb hisoblaganlar bu kabi xavflardan uzoqroq yurishlari, nafaqat "munajjimlar bashorati”ni o’qimaslik, balki balki shu bashorat ramzlari hisoblangan turli shakllar aks ettirilgan uzuklar, taqinchoqlar va boshqa zararli narsalardan ham o’zlarini ehtiyot qilishlari shart. Nafaqat o’zimiz, farzandlarimiz ham o’zi tavallud topgan burjining "munajjimlar bashorati” da ramzi tushirilgan taqinchoqlar taqib yurishmasin. Bularning hammasi maxsus hisob-kitob qilingan tashviqot ishlari mahsuli ekanini va uning bu qadar ommalashib ketishi tasodif emasligini yodimizda tutaylik! Mo’min hatto o’z burji nima ekanini bilishga ham harakat qilmasligi kerak!
Nashrlardagi "munajjimlar bashorati”ni o’qishdan va hatto o’qiyotganlarni eshitishdan ham chin qalb bilan hazar qilish kerak. Bu ish bilan shug’ullangan, unga ishongan va uni muntazam o’qib borganlar esa, Allohga tavba qilishsin.