Kecha prognoz qilinganidek, poytaxtda kechasi bilan gupillatib qor yog‘ib berdi. Ijtimoiy tarmoqlarda haqiqiy qish manzaralari, bolalar quvonchi aks etgan suratlar bilan birga, qor tufayli yuzaga kelgan ba’zi noqulaylik va ko‘ngilsizliklar haqida hikoya qiluvchi postlar ham joylanmoqda.
Facebook foydalanuvchilaridan biri shaharda ko‘plab daraxtlar sinib tushgani, kabellar uzilgani, bu ham yetmaganidek, chiroq ustunlari ham ba’zi joylarda egilib qolganini qayd etgan. Va bunga dalil sifatida rasm ilova qilgan. Postga fikr bildirganlardan biri bugun ertalab kattagina daraxt shoxi ostida qolib ketishiga sal qolganini yozgan.
Kommentlardan birida osilib qolgan kabel suratini ko‘rish mumkin. Muallifning qayd etishicha, bu yerdan yuk mashinasi o‘tgudek bo‘lsa, butun mahalla chiroqsiz qoladi.
Yana bir achinarli holat daraxt shoxlarining avtomobillar ustiga qulaganidir. Tongdanoq bunday manzaraga guvoh bo‘lganlar anchagina. Facebook’ka joylangan rasmlardan birida yoqqan qor og‘irligini ko‘tara olmagan daraxt shoxi sinib, Epica’ni bosib qolganini ko‘rish mumkin.
Twitter’ga joylangan fotosuratda esa kattagina daraxt ostida qolib, jiddiy zarar ko‘rgan Tiko aks etgan.
Ushbu foydalanuvchi ilova qilgan yana bir rasmda esa bunday daraxtlardan boshqasi Spark avtomobili ustiga qulaganini ko‘rish mumkin. Har qalay, mashinaga ziyon yetmagan.
