Nukusda xususiy taksopark xodimi, "Matiz” avtomashinasi haydovchisi Ozod Qulenov (ismlar o‘zgartirilgan)ni ayovsiz kaltaklagan uch bezori qo‘lga olindi. Bu haqda "Postda” gazetasi ma’lumotiga tayanib, Podrobno.uz xabar bermoqda.
Bezorilar boshlig‘i O‘rozboy va uning ikki hamtovog‘i taksi to‘xtatadi, haydovchi aytgan yuqori narxga so‘zsiz rozi bo‘lib, mashinaga o‘tiradi.
Mashina shahar tashqarisiga chiqishi bilan jinoyatchilar haydovchining boshiga zarba beradi, o‘zini mashinadan uloqtiradi. Biroq hushidan ketgan haydovchi o‘ziga kelib, baqirgancha, qochishni boshlaydi. Atrofda aholi yashamasligi sababli haydovchining urinishlari behuda ketadi. Bezorilar uni mashinada quvib yetib, qarshilik ko‘rsatishni to‘xtatguncha, ayovsiz kaltaklaydi. Shundan so‘ng behush Qulenovni voqea joyida qoldirib, bezorilar mashinada qochib ketadi.
Biroq ularning uchalasi ham shirakayf bo‘lganligi sababli O‘rozboy boshqaruvidagi mashina ag‘darilib ketadi. Yengil jarohatlangan jinoyatchilar tez orada hibsga olinadi. Mazkur holat yuzasidan ularga jinoyat ishi qo‘zg‘atiladi.
Baxtli tasodif tufayli jabrlanuvchi Ozod Qulenov topilib, hayoti saqlab qolindi.
Ma’lum bo‘lishicha, voqeaning asosiy qahramoni 26 yoshli O‘rozboy bezorilik yuzasidan birinchi marta jinoiy javobgarlikka tortilishi emas. O‘rozboy bezorilikni o‘ziga kasb qilib olgan: qorong‘i joylarda yo‘lovchilarni to‘xtatgan, ularni qo‘rqitib, bor narsasini zo‘ravonlik bilan tortib olgan. Tergov davomida o‘zining tan olishicha, qurbonlarining ko‘zidagi qo‘rquv unga huzur bag‘ishlagan.
O‘rozboy, keyinchalik, ikki voyaga yetmagan shaxsni o‘ziga qo‘shib olib, jinoiy faoliyatini kengaytirgan.
