Главная » 2015»Январь»10 » Mirjalol Qosimov: g'alabani haqli ravishda qo'lga kiritdik.
21:49
Mirjalol Qosimov: g'alabani haqli ravishda qo'lga kiritdik.
10.01.2015 // Osiyo kubogi-2015 Mirjalol Qosimov: “G‘alabani haqli ravishda qo‘lga kiritdik” Osiyo Kubogi doirasida O‘zbekiston — KXDR terma jamoalari o‘rtasida kechgan uchrashuvdan so‘ng (1:0) matbuot anjumani o‘tkazildi, deb xabar bermoqda “Uff.uz”. Jurnalistlar bilan muloqotda avval Shimoliy Koreya terma jamoasi bosh murabbiyi o‘z fikrlarini bildirdi. Matbuot anjumaniga Mirjalol Qosimov uchrashuvning eng yaxshi futbolchisi Igor Sergeyev hamrohligida kirib keldi. Murabbiy zalga kirib kelishi bilan jurnalistlar olqishlay boshladi. Murabbiydan an’anaviy tarzda o‘yin haqida fikrlari so‘raldi. “Bugungi o‘yinda g‘alaba juda muhim ahamiyatga ega edi. Bunday musobaqalarda mudom his-hayajon bo‘ladi. Ammo biz bugun yaxshi o‘ynadik va haqli ravishda g‘alabaga erishdik. Shu o‘rinda uzoqdan, minglab kilometr masofa bosib kelgan muxlislarga minnatdorchilik bildirmoqchiman. Ular bizga katta madad bo‘lmoqda”, — dedi Mirjalol Qosimov. OFK xodimi tomonidan berilgan savol: Igor, bugun siz ajoyib gol urdingiz va uchrashuvning eng yaxshi futbolchisi deb tan olindingiz. Bu haqida fikringiz? Javob: Albatta, bundan juda mamnunman. Ammo bugun o‘yinning eng yaxshi futbolchisi bo‘lishga terma jamoamizdagi har bir futbolchi haqli edi. G‘alabada jamoadoshlarimning hissasi ko‘proq. Eng muhimi — biz g‘alaba qozondik. Demak, o‘z oldimizga qo‘ygan maqsadimizga erisha oldik. Biz uchun shaxsiy sovrindan ko‘ra, jamoaviy g‘alaba muhimroq. Avstraliyalik jurnalist: Janob murabbiy, jamoangiz darvozaboni Nesterov so‘nggi soniyalarda muqarrar golni qaytarib qoldi. Bu borada fikringiz? Javob: Darhaqiqat o‘yinning oxirgi soniyalarida raqib bosimni oshirdi. Ignatiy esa mahorati evaziga kuchli zarbani qaytarib qoldi. Darvozabon — yarim jamoa degani. Bu g‘alaba butun jamoamizning g‘alabasidir. Biz yaxshiroq o‘ynadik va g‘alabani haqli ravishda qo‘lga kiritdik. Avstraliyalik jurnalist: Birinchi bo‘limda Shimoliy Koreya terma jamoasi qarshi hujumda o‘ynadi. Bu kutilgan uslub edi. Ammo ikkinchi bo‘limda raqib tashabbusga egalik qila boshladi. Bu haqida nima deysiz? Javob: Futbolda hech qachon 90 daqiqa davomida pressing qilish mumkin emas. Shu sababli o‘yin uslubini o‘zgartirib turish kerak. Boz ustiga kuchli jala yoqqanini ham inobatga olish kerak. Shu sababli o‘yin uslubimizni biroz o‘zgartirdik. Biz qay tomonlama kuchlimiz — to‘pga egalik qilib turganda. Ammo yomg‘ir tufayli bunday o‘yin ancha xavfli ko‘rinish olishi mumkin edi. Shu sababli boshqacharoq harakat qildik va adashmadik deb o‘ylayman. Xitoylik jurnalist: Avvalo, g‘alaba bilan tabriklayman. Kelasi turlarda Xitoyga qarshi kechadigan o‘yin haqida nima deyishingiz mumkin? Javob: Avval ham aytgandim, yana takrorlayman. Bu musobaqadagi har bir jamoa kuchli. Hozir, siz bilan matbuot anjumanida o‘tirgan vaqtimizda Xitoy va Saudiya Arabistoni o‘rtasida o‘yin kechmoqda. Bu uchrashuv ancha qiziqarli o‘tyapti. Shu sababli biror jamoani alohida ajratib ko‘rsatmagan bo‘lardim. OFK rasmiy sayti tomonidan berilgan savol: Janob Qosimov, tabriklaymiz. O‘yin davomida to‘pni nazorat qilganingiz rost, ammo raqib darvozasi oldida o‘zaro pas berishda oqsadingiz. Hatto oddiy zarba bilan gol urish mumkin bo‘lganda ham imkoniyatdan foydalana olmadingiz. Hujumdagi bunday muammolar sizni xavotirga solmaydimi? Javob: Albatta, futbolda bunday vaziyatlardan foydalanish kerak. Agar biz ikkinchi bo‘limda yaratilgan imkoniyatlarni golga aylantira olganimizda, boshqacha hisob bo‘lardi. Biz ham har bir zarba golga aylanishini istaymiz. Ammo futbol ham shunisi bilan qiziq bo‘lsa kerak. Men jamoamiz hujumida kamchilik borligini inkor etmayman va bu borada ishlashda davom etamiz. Kelasi uchrashuvlarda bu kamchilikni to‘g‘rilashga harakat qilamiz. Xitoylik jurnalist: Yaqinda bildirgan fikringizda Xitoy terma jamoasi o‘sishga erishgani haqida aytgan edingiz. Aytingchi, Xitoyga qarshi qandaydir maxsus tayyorgarlik ko‘rdingizmi? Javob: Biz bugungi o‘yinni o‘tkazgunga qadar faqat KXDR haqida o‘yladik. Endi kelgusi uchrashuvlarga tayyorlana boshlaymiz. Bir o‘yindan boshqasiga sakrab bo‘lmaydi. Biz navbatdagi raqibga qarab mashg‘ulotlarni davom ettiramiz. Avstraliyalik jurnalist: 2011- yilda yarim finalga qadar borgan edingiz. Bu safar ham shu natijani takrorlay olasizmi? Javob: Agarda yaratilgan vaziyatlardan foydalansak va omad biz tomonda bo‘lsa, albatta, yarim finalga qadar yetib boramiz.
