|
Қирғизистон архитектура, қурилиш ва уй-жой коммунал хўжалиги агентлиги директори ўринбосари Данияр Шейшеканов ишга велосипедда қатнашни бошлади. Бу ҳақда Knews.kg хабар бермоқда.
Амалдорнинг Ҳукумат уйидан велосипедда чиқиб кетаётгани тасвирланган фотосурат дастлаб Facebook ижтимоий тармоғи фойдаланувчилари томонидан эълон қилинган, шундан сўнг бу ҳолат қизғин муҳокама мавзусига айланган.
“Велосипедда ҳаракатланиш қулай ва нисбатан тез, бунда шаҳардаги тирбандликларда қолиб кетмайсан, шунинг учун мен айнан велосипеддан фойдаланаман. Ягона муаммо – қишда бундай бўлмайди”, – деди амалдор KNews.kg’га берган интервьюсида.
Шейшекановнинг сўзларига кўра, ҳамкасблари ҳам велосипедда ҳаракатланиш қулай эканлигини кўриб, директор ўринбосаридан намуна олишни режалаштиришмоқда.
Қирғизистонлик аксарият амалдорлар қимматбаҳо машиналарда юришни маъқул кўришларига қандай муносабатда эканлигига қизиқилганида, Шейшеканов бундай имтиёзларга қарши эканлигини маълум қилган.
Интернет-нашрнинг қайд этишича, 31 ёшли амалдор 19 июнь куни бош вазир фармойиши билан агентлик директори ўринбосари этиб тайинланган.
| 
