Google компанияси ўзининг Street View сервисига футбол бўйича 2014 йилги жаҳон чемпионати учрашувларини қабул қилувчи Бразилиядаги 12 стадионнинг панорама-суратларини жойлаштирди. Бу ҳақда Google’нинг расмий блогида маълумот берилган.

Жаҳон чемпионатига боришни мақсад қилган ёки мусобақа ўйинларини телевизор орқали томоша қиладиган мухлислар ҳозирнинг ўзидаёқ футбол учрашувларини қабул қилувчи Бразилиядаги 12та стадион билан яқиндан танишишлари мумкин.

Бундан ташқари, Street View’да жаҳон чемпионати шарафига граффити ва байроқлар билан махсус безатилган кўчаларнинг ҳам панорамали суратларини томоша қилиш мумкин.

Google вакилларининг сўзларига кўра, муҳим футбол мусобақалари арафасида кўчаларни безаклаш, уларни бўяб чиқиш – Бразилиядаги миллий анъаналардан биридир.

Бундан ташқари, Google ЖЧ-2014 ўйинларини қабул қиладиган 12 шаҳарда мобил телефонлар ёрдамида ҳаракат йўналишини ташкил қилиш имкониятини тақдим этган.

Шунингдек, юзлаб ташкилотлар – аэропортлар, савдо марказлари ва яна ўша стадионларнинг – биноларнинг ички хариталари ҳам Google фойдаланувчилари учун очиқ жойлаштирилган.

Футбол бўйича 2014 йилги жаҳон чемпионати баҳслари 12 июнь – 13 июль кунлари Бразилиянинг 12 шаҳрида бўлиб ўтади.