Ozarboyjon poytaxti Boku shahrida O'zbekistonda ishlab chiqarilayotgan «Chevrolet Cobalt» avtomobilining taqdimoti bo'lib o'tdi.
Marosimda qatnashgan O'zbekistonning Ozarboyjondagi Favqulodda va Muxtor Elchisi Sherzod Fayziyev global moliyaviy-iqtisodiy inqirozga qaramay, so'nggi yillarda O'zbekistonda o'rtacha 8,5 foizlik iqtisodiy o'sish kuzatilayotganini ta'kidlab o'tdi. «O'zavtosanoat» va AQShning «General Motors» kompaniyalari muassisligida tashkil etilgan «GM Uzbekistan» qo'shma korxonasi o'zbek avtomobilsozligining bosh bo'g'ini hisoblanadi», – dedi Fayziyev.
«O'zavtosanoat» raisi o'rinbosari Tohir Jalilov Ozarboyjonda «Chevrolet Cobalt» va boshqa o'zbek avtomobillarining bo'lishi ikki xalqni yanada yaqinlashtirishga xizmat qilishiga umid bildirdi.
Taqdimot marosimida aytilishicha, Chevrolet Cobalt yiliga 120 ming dona ishlab chiqariladi, shuning yarmisi MDG' mamlakatlariga, jumladan, Ozarboyjonga yetkazib beriladi. Marosimda O'zbekiston xalq artisi Nasiba Abdullayeva ham ishtirok etib, o'z qo'shiqlarini ijro etdi.
