Uznetda yangi via.uz sayti paydo bo‘ldi, u yerdan 8 ta yo‘nalishdagi transport vositalarining ayni paytdagi qatnovini kuzatish mumkin. Bu haqda iLike.uz nashri xabar berdi.
Buning uchun avvalo, saytda ro‘yxatdan o‘tish zarur. So‘ng marshrutlar ro‘yxatidan sizga kerakli yo‘nalish raqamini tanlab olish va siz turgan bekat nomini ko‘rsatishingiz kifoya — o‘sha yo‘nalishdagi transportlar sizning bekatgacha qancha vaqtda yetib kelishi haqidagi ma’lumotlar ekranda paydo bo‘ladi.
Xabarda keltirilishicha, ma’lumotlar har daqiqada yangilanadi. Hozirda saytga bor-yo‘g‘i 8 ta yo‘nalish kiritilgan bo‘lsa-da, tez orada ularni ko‘paytirish ko‘zda tutilgan.
Eslatib o‘tamiz, 2013-yilning 13-noyabrida Shahar yo‘lovchi transporti tizimini mukammallashtirish chora-tadbirlari to‘g‘risida qaror qabul qilingan, unga ko‘ra, "Transport xizmatlari sifatini nazorat etish boshqarmasi” unitar korxonasi "Toshtransdispetcherxizmat” unitar korxonasiga aylantirilgan, u jamoatchilik transporti harakatini GPS yordamida onlayn boshqarish bilan shug‘ullanishi belgilangan edi.
