Американинг “Steet Wise Security Products” компанияси АҚШ фуқаролари тунги кўчаларда ўзларини ҳимоя қилиши учун пистолет кўринишидаги янги ва мукаммал деб айтилаётган ўқотмас қурол яратди. Бу ҳақида “The Firearm Blog” нашри хабар берди. Хабарда айтилишича, ушбу қурилма асосан 3 қисмдан иборат, унда кўзни қамаштирувчи фонарик, электрошокер ва аччиқ тутунли газбаллон жамланган. Ушбу қуролдан 7-8 метр масофадаги рақибга таъсир кўрсатиш мумкин, электрошокер эса 8,5 млн вольт кучланишга эга. Фонардан чиққан ёрқин нур рақибни бир муддат ухлатиб қўйиш хусусияти билан таъминланган. Буюмнинг оғирлиги 1,4 кгни ташкил этади. “Police Force Triple Defender” (PFTD) деб номланган ушбу ҳимоя қуроли 130 доллардан сотилмоқда. Лойиҳа муаллифлари қуролни янада такомиллаштириб, унга пичоқ ҳамда тунги кўриш воситасини ҳам ўрнатиш бўйича иш олиб боришмоқда.