Бугун «Жар», эртага «Пахтакор» марказий ўйингоҳларида бўлиб ўтадиган учрашувларни ўзбек футбол мухлислари интиқлик билан кутишаётгани ҳеч кимга сир эмас. Ўзбекистон миллий терма жамоасининг жаҳон чемпионати саралаш босқичидаги омадсизлигидан сўнг мухлисларнинг бор умидлари ана шу икки жамоа - «Пахтакор» ва «Бунёдкор»дан бўлиб қолди. Осиё Чемпионлар Лигасида ҳозирча муваффақиятли иштирок этаётган вакилларимиз аввал чорак, кейин ярим финалда рақибларини доғда қолдириб, кўнгли вайрон мухлисларга Токио ўйингоҳида «Ўзбекча финал» деган спектакль намойиш қилиб беришса, йиринглаб кетган ярага малҳам босган бўлишарди. Токиода ким ютишининг қизиғи йўқ. Муҳими, жамоаларимиз финалгача етиб боришса бўлгани. «Кўнгли осмон ўзбегим», деб қўшиқ куйлаб юборишга ҳам тайёрмиз.
Роса пардани юқори олиб юбордим-а? Ишқилиб, «Иштаҳангизкарна-ю, оғайни», демаяпсизми? Рост, бироз фантазияга берилиб кетдим. Энди, буёғиишқибозчилик. Ниятга яраша дейишади-ку, яхши ният ярим давлат, деб бежизга айтишмаган. Шояд Яратган амкўнглиярим ўзбек мухлиси бир тантана қилиб олсин дегандай ниятларимизни ижобат қилибюборса.
Бироз фантазияга берилиб, кайфиятни кўтариб олдик. Энди воқеъликка реал кўз билан қараб кўрсак. «Жамоаларимизнинг чорак финал учрашувларида ғалабага имкониятлари қай даражада», деган саволга жа-а мутахассис даражасида бўлмасада, тажрибали мухлис сифатида жавоб излаб кўрсак.
Аввало фикримизни ОФК кубогидан бошлаб қўя қолайлик. Маълумки, ОФК кубоги мавқе борасида ОЧЛдан кўра бирмунча пастроқ. Унинг иштирокчилари эса савия ва маҳорат борасида Чемпионлар Лигасида қатнашаётганлардан кучсизроқлар. Бу исбот талаб қилмайдиган ҳақиқат. Шу боис ҳам Фарғонанинг «Нефтчи» жамоасига «Пахтакор» ва «Бунёдкор»дан осонроқ бўлишини тахмин қилгандик. Саркисян шогирдларининг бу кубокни қўлга киритишга бўлган имкониятлари ОЧЛда қатнашаётган вакилларимизникидан-да баландроқ туюлганди. Гонконгнинг ўзбек мухлисларига мутлақо нотаниш бўлган жамоасини енгиш фарғоналиклар учун чўт эмас, деб ўйлагандик. Аммо ўтган сешанба куни бўлиб ўтган учрашув қаттиқ янглишганимизни кўрсатиб қўйди. «Тўп тепишни билмайдиган» гонконгликлар Фарғонада «Нефтчи» дарвозасига озмас-кўпмас нақд тўртта тўп киритишга муваффақ бўлдилар. Бошқаларни билмадиму, шахсан мен «Нефтчи»нинг ўз майдонида шунча тўп ўтказиб юборганини эслай олмайман. Мана сизга кучсиз рақиб! Тўғри, фарғоналик футболчилар рақибларини менсишмаган, шу боис ҳам ўйин пайтида ўзларини ўнглай олмаган бўлишлари мумкин. Ҳали олдинда жавоб ўйини турибди. Унда «Нефтчи» биринчи учрашувдаги хатоларини такрорламаслиги мумкин. Бироқ нима бўлганда ҳам бу учрашув ОЧЛ иштирокчилари учун ўзига хос огоҳ қўнғироғи вазифасини ўтаб бериши лозим.
«Бунёдкор» ҳозиргача рекордлар янгилаш билан машғул бўлиб келди. Жамоа фақат ғалаба қозонмоқда. Аммо ушбу мавсумда Сколари шогирдлари, айтайлик, «Поханг Стилерс» даражасидаги жамоа билан, «Пахтакор» билан ўтказилган икки ўйинни ҳисобга олмаганда, куч синашишмади. Шу боис жамоа аъзоларида ўзларига бўлган ишонч бироз чегарадан ошиб кетмадимикин? Назаримда айнан ўзига ортиқча ишониб юбориш «бунёдкорчилар»га Бухорода панд бераёзди. Сколари «Поханг» билан бўладиган муҳим учрашув арафасида Ривалдо, Ҳасанов, Жўраев, Ғофуров каби футболчиларга дам беришга қарор қилганди. Деярли икки таркибга етадиган футболчиларга эга бўлган жамоа учун 3-4 футболчининг йўқлиги ортиқча қийинчилик туғдирмаслиги керак. Аммо омадсиз кечган биринчи бўлимдан сўнг Сколари Ривалдо, Жўраев ва Вильянуэваларни майдонга туширишга мажбур бўлди. Пешқадам қийинчилик билан бўлсада, ўйинни ғалабали финишга олиб борди. Бироқ бу ҳолат жамоа мухлисларини ташвишга солмай қўймади. Муҳим учрашув олдидан жамоанинг нурсиз ҳаракат қилгани эртанги ўйин натижасига таъсир ўтказмасмикин? Ё бу тажрибали мутахассиснинг ўзига хос тактик юришимикин? Одатда баъзи жамоалар рақиб «айғоқчилари»дан кучли томонларини яшириш учун ҳам ярим куч билан ҳаракат қилишади. Агар бизникилар ҳам шундай қилишган бўлса қанийди.
Чемпионлар Лигасидаги иккинчи вакилимиз «Ал-Иттиҳод» билан бўладиган баҳсга тайёргарлик вазифасини ўтаган ўйинни «Қизилқум»га қарши ўтказди. Очиғини айтиш керак, охирги пайтларда «Пахтакор»нинг ўйини мухлису мутахассисларни ташвишга солмоқда эди. Шу боис ҳам «Қизилқум»га қарши кечган баҳсни диққат билан кузатдик. Дастлабки 15 дақиқани инобатга олмаганда «пахтакорчилар» ёмон ўйнашмади. Афтидан бир неча тур давом этган тушкунлик ортда қолган кўринади. «Пахтакор»нинг янги аъзоси Рўзим Аҳмедовнинг жамоадошлари билан тил топиша бошлагани кўриниб турди. Магдеев ҳам ўз спорт формасини тиклаб бормоқда. Одил Аҳмедов одатдагидай жанговар ҳолатда. Хуллас, хавотирга ўрин йўқдай. Аммо...
«Бунёдкор»да ҳам, «Пахтакор»да ҳам яратувчанлик борасида муаммо йўқ. Жамоа ярим ҳимоячилари ҳужумчиларни доимий равишда қўллаб туришибди. Керак бўлса, ташаббусни ўз қўлларига олишяпти ҳам. Бежизга ҳар икки жамоа ярим ҳимоячилари ҳам маҳсулдорлик борасида ҳужумчилардан қолишмайдилар. Тўғрироғи, устунлик ҳам қилишяпти. Ҳар икки жамоада ҳам энг сермаҳсул ўйинчилар ярим ҳимояда ўйнашади. Қолаверса, Аҳмедов ҳам, Ривалдо ҳам жамоа етакчилари саналишади. Бунинг эса салбий томони ҳам йўқ эмас. Нега дейсизми? Бордию, етакчилар майдонга тушишмаса нима бўлади? Уларнинг ўрнига етакчиликни ўз қўлига оладиганлар борми?
Шунингдек, ҳар икки жамоада ҳам мамлакатимизнинг энг кучли ҳимоячилари ўйнашларига қарамай, бу чизиқда муаммолар борлиги кўзга ташланмоқда. «Бухоро» ва «Қизилқум» футболчилари тирқиш топа олган ҳимоя «Поханг» ёки «Ал-Иттиҳод»нинг тезкор ҳужумларига дош бера олармикин?
Ҳа майли, муҳим учрашувлар арафасида қалбингизга хавотир уруғларини сепмай қўя қолай. Ҳимоячиларимизнинг маҳорати ва тажрибаларига ишонганим учун ички учрашувларда йўл қўйган хатоларини беписандликка йўйиб қўя қолай. Уларнинг Ватан шаъни учун майдонга тушилган пайтда бор эътиборни жамлаб, юқори савияда ўйнашларига шубҳам йўқ.
Ижозатингиз билан, азиз мухлислар, барчамиз номимиздан ҳар икки жамоамизга ОМАД тиласам. ЗАФАР қучгин, «Бунёдкор»! ОМАД ёр бўлсин, «Пахтакор»!
Манба: "ИнтерФУТБОЛ" газетаси
