Gavhari jonim

Men dunyoga kelgan kundanoq,
Yo’llarimga bo’ldingiz chiroq.
Ulga’ysin – deb chekdingiz firoq,
Onajonim – jonu jahonim,
Duogo’yim – chin mehribonim.

Yiqilganda suyanch edingiz,
Qoya kabi tayanch edingiz,
Nur edingiz, quvonch edingiz,
Onajonim – dono sarbonim,
Duolari tillo karvonim.

Qadringizni goho bilmadim,
Qo’lingizga hassa bo’lmadim,
Kulbangizga vassa bo’lmadim,
Onajonim – gavhari jonim,
Duogo’yim – shirin zabonim.

Uzoq ketsam yo’limga qarab,
O’ltirgansiz zor-zor mo’ltirab,
Men go’l esa yurganman "yayrab”,
Onajonim – chashmi giryonim,
Nigohbonim – sarvari jonim.

Ayting, Sizni qaylardan topay,
Kalishingiz gardlarin o’pay,
Qabringizga ko’z yoshim sepay,
Onajonim – toza vijdonim,
Tomirimda oqqan pok qonim.

O’lim-ku haq, hamma o’tadi,
Lekin ona qolsa netadi?
Nahotki yer to’ymay ketadi?
Onajonim – ko’zda mijgonim,
Munisginam obro’yim,shonim.

Yulduzlarga boqib so’zlayman,
Izlaringiz bedor izlayman,
Topib ber deb, yelga bo’zlayman,
Onajonim – guli rayhonim,
Duogo’yim – ruhi ravonim.

Siz – bag’rimda botmas oftobim,
Tunlarimda so’nmas mohtobim,
Dunyolarga bermas kitobim, 
Onajonim – gavhari jonim,
Duog’oyim – nuri Iymonim…

ONA QADRIGA YETAYLIK

WWW.SHERLAR.UZ

JAVOXIR