|
Яқинда Интернет тизимидаги кўплаб сайтларда бир мақола чоп этилди. Қизиғи, бу мақоланинг илдизи қаердан бошлангани ҳеч кимга маълум эмас. Поя бериб, шох чиқаргани-чи? (Илдизи йўқ кўчатни ерга тиққан билан дарахт бўлиб қолармиди?!) Сайтлар фаолияти ҳам ажойиб, мақолада келтирилган маълумотларнинг қай даражада ишонарлилиги инобатга олинганми-йўқми, муҳими, ўқувчилар орасида ваҳима кўтаришдан бошқа нарса эмас. Биз ижодкорлар ҳам бу борада жуда қизиқдиқ. Сабаби, русийзабон кўплаб сайтларда (инглиз тилига ҳам ўгирилган) келтирилишича, ўзбек радиоканалларида Стинг ва Хулио Иглесиас каби жаҳон юлдузларининг қўшиқларини эфирда берилиши таъқиқланган. Шу юртда яшаб, биз буни сезмабмиз, улар қаердан ўйлаб топишди экан? Қизиқ, офисга келгунга қадар таксида "Максима” радиоканали орқали Стингнинг "Shape of my heart” таронасини ҳозиргина тингладим-ку? Воқеага ойдинлик киритиш мақсадида,(мақола қай даражада ҳақиқатга яқинлиги жуда қизиқ эди. Хорижий ҳамкасбларим бирон маълумот тарқатишидан олдин "ойга боқдимикан” ё "ерга термулдимикан»? ) «Максима” радиоканалига телефон қилдим ва бош муҳаррир билан боғландим.
-Мен Алишер Канаев, "Максима” радиоканали бош муҳарририман.
-Кечирасиз, сизга бир саволим бор. Эфирингизда Хулио Иглесиас ва Стинг каби хонандалар қўшиқлари таъқиқлангани ростми?
-Интернетдаги тарқалиб кетган мақоладан келиб чиқяпсизми? Ҳаммаси, писта-пўчоқ гап. "Максима” радиоканали Стинг, Хулио Иглесиас каби жаҳон санъати тарихида дурдона қўшиқлар яратган хонандалар ижодига ҳамиша эътиборли. Бу фикримни барча тингловчиларимиз тасдиқлашига ишонаман. Бу мақолани ёзган одам маълумотни қаердан олганини тушунмайман. Аҳмоқлик бу, муҳокама қилишга ҳам арзимайди.
Шу каби истеҳзо, таажжуб ва кулгу билан ифода этилган фикрларни бир неча радиоканал бошловчилари, муҳаррирлари ҳам ўртоқлашди. Шу ўринда доно халқимизнинг оммабоп, қадимий ҳамда ҳар биримизга ёд бўлиб кетган бир нақли ёдга тушади: "Мевали дарахтга ҳар доим тош отилади”. Бундай тошларнинг кўпини кўрганмиз…Яна бир бора кўрдик. Бироқ, ҳаётий бир фалсафага яхшилаб назар ташласак, дарахтнинг меваси ҳамиша юқорида, баландда етилади, отилган тошу кесаклар эса жойини пастдан топади. Юқорида номи тилга олинган жаҳон юлдузларининг юртимизга ташрифи, маданиятимиз ва санъатимиз оламида олиб борилаётган изчил сайъ-ҳаракатлар, истеъдодли болажонларни қўллаб-қувватлашга қаратилган жонбозликлар бир неча хорижлик таниқли меҳмонларнинг эътиборини тортгани, таъбир жоиз бўлса, уларнинг ҳам шундай ғамхўрликлар бобида ҳамкорлик истаги борлиги ҳамда амалда исбот этаётгани айрим фисқу фасодчи, миш-мишга мойил ҳамкасбларимиз юрагига ғулғула солгандир? Алам билан қалам тортган журналист журналистмикан? Хулоса ўрнида шуки, ғайирликни унутиб, сиз ҳам эзгулик йўлида шундай оғир юкни бир кўтариб кўринг-да, майли, кейин тош отинг...Кесак эмас!
Jasur HAMROYEV
|
