|
Ўз даврида Ди Джей Пилигрим деса қизлар сочларини юлишган. Бугун ҳам ёмон эмас-у, барибир олдингидай эмас. Асосан клуб мусиқалари билан танилган ижодкор ўзбек шоу оламининг кўплаб вакиллари ҳурматини қозонган. Ўзбек ОАВларида жуда кам ёритила бошлагач, Пилигрим ўз клипларини россия мусиқий телеканалларида тақдим эта бошлади. Асл исм шарифи Илҳом Йўлчиев феврал ойида янги альбомини пойтахтимизнинг кўзга кўринган тунги клубларининг бирида тақдимотини ўтказди. "С energy” деб номланган ушбу альбомни шу кунларда Деҳлида янги клип суратга олдираётган хонанда Нодир Жўраев бизга ҳам махсус тарзда совға қилди. Альбомни диққат билан тинглар эканмиз, қуйидагича фикрлар уйғонди. Пилигрим ўз услубига содиқ қолган тарзда, альбомнинг жами 10 та қўшиғини ҳам клуб мусиқалари асосида яратган. Альбом устида ишлаган бир неча ҳамкасблари жумладан, Сурат Каримов, Жасур Бадалбоев, Зафар қодиров,Павел Упоров кабиларни келтириб ўтганидан ҳам маълумки, мусиқани тушунадиган ҳақиқий ижодкорлар билан ҳамкорлик қилинган. Илҳом асосан инглиз ва рус тилларида куйлаган. Талаффузидаги жузъий нуқсонларни инобатга олмаганда инглиз тилида чакки куйламаган. "С energy”, "Everything inside”, "Ответ”, «Небо помоги» каби янги тароналар ўз тингловчиларини топишига шак шубҳа йўқ. Бироқ, шу қўшиқлар сафида бири борки, тинглаб тавба дейсан. "MF” деб номланмиш қўшиқ сўзларида хонанда инглиз тилида сўкиниб куйлайди. Нима, Илҳомнинг сўз бойлиги шу қадаб камбағаллавшиб қолдими, ё атайлаб шундай иш тутди? Аслида қўшиқда сўкиниш мумкинми? Дунё мусиқаси ҳар балони кўтаради деган ақидаги суяндимикан? Дарвоқе, альбом ичида хонанданинг дил сўзларига кўзингиз тушади ва этингиз жимирлаб кетади. Шундай гўзал ва ишончли қалб оҳига эга инсон сўкиниб қўшиқ куйлаши, бу ҳам етмагандан кенг оммага ҳавола этилажак альбомга киритиши мумкинми? Эҳ, Йўлчиев, янгилик қилибсизу, сал хом қилибсиз... Майли, инсоннинг ўзи тушуниб етмагунча, ўзганинг гапи ҳеч қандай қийматга эга бўлмай қолаверади. Бироқ, янги клипга гап йўқ! "Ответ” видеоклипи замонавийлик бобида ҳам, мантиқ ва қизиқарли сюжет борасида бугун кўпчилик хонандаларга росманасига "жавоб” бўла олади!
Jasur HAMROYEV
|
