2012-yilda chiqarilishi kutilayotgan Windows 8operatsion tizimining yuklanishi uchun ketadigan vaqt Windows 7 operatsion tizimiga qaraganda ancha kamni tashkil qiladi. Bu haqda Microsoftkorporatsiyasi operatsion tizimning yangi versiyasiga bag‘ishlangan maxsus "Building Windows 8” blogida xabar qilgan.
Microsoft tomonidan tasvirga tushirilgan video-rolikda Windows 8 operatsion tizimining yuklanishi namoyish qilingan. Rolikda ko‘rsatilishicha, noutbukning akkumulyatori chiqarib olingan va qaytadan solingan. "Power” tugmachasi bosilganidan so‘ng, operatsion tizimning ishga tushishi uchun ketadigan vaqt atigi 8 soniyani tashkil qilgan.
Kompaniya ushbu tajribani 30 ta kompyuterda sinab ko‘rdi. Natija shuni ko‘rsatdiki, yangi operatsion tizimning yuklanishi uchun ketadigan vaqt avvalgisiga qaraganda 30-70 foiz kam vaqtni tashkil qiladi. Yuklanishning aniq vaqti kompyuterning xarakteristikasiga bog‘liq.
Eslatib o‘tamiz, Windows 8 operatsion tizimi x64/x86 arxitekturali chiplar o‘rnatilgan desktop kompyuterlar va noutbuklarda ham, ARM arxitekturali planshet kompyuterlarda ham ishlaydi. Yangi operatsion tizim xuddi Microsoft Office 2007 hamda 2010 paketlari kabi lentali interfeysda ishlaydi.
