 Suyukli do’stim! Tasavvur qil, bir ozdan so’ng uyingga Payg’ambarimiz Muhammad solallohu alayhi vasallam kirib keladilar. Xayolingga keltirmagan tashrif… Nima qilgan bo’larding shunda? Axir u zot odam bolalarining eng yaxshisi… Payg’ambar… Ollohning suyukli do’sti…Ana o’sha zot sening eshiging ostonasida turibdilar…Seni ziyorat qilmoqchilar…
Tasavvur et, o’sha paytda nima qilasan? “Bugun hayotimdagi eng baxtiyor kun, axir kimsan Payg’ambar biznikiga keldilar”, degancha hayajon va xursandchilik bilan u zotga peshvoz chiqasanmi yoki bir oz taraddudlanib, javoningda qalashib yotgan turli-tuman chet el qo’shiqchilarining xonishlari yozilgan disk-kassetalar o’rniga Qur’oni karim tilovati, hadisi sharif yozilganlarini terish uchun yugurib qolasanmi? Behayo, zulmu zo’ravonlikni targ’ib qiluvchi, mazmunsiz videokassetalaringni ham yashirarsan? Xonang devorlarini to’ldirib yotgan suratlarnichi? Ularni ham ko’chirib, uloqtirib tashlarsan? Axir Rasululloh solallaohu alayhi vasallam bu manzarani ko’rsalar, xursand bo’lmasliklari aniq.
Yuvinish xonasida tish cho’tkalaring yoniga u zotning sunnatlariga ergashayotganingni bildirish uchun misvokni ham tirkab qo’yarsan, a?
Sen-chi, muhtarama singlim, qanday kutib olasan Payg’ambaringni? Balki necha yillardan beri o’zingga or bilib, qaror qilolmay yurganing ro’molingni o’shanda o’rab chiqarsan? Yo shu ahvolingda – sochlaring yoyilgan, egningda tor kiyimlar, yuzingga turli bo’yoqlar chaplangan holingda qarshi olasanmi u zotni? Bunday ahvolni ko’rsalar, seni kim deb o’ylashlari mumkin?
Sarvari koinot uyingga kirib: “Sendan bomdod namozi, jamoat namozlari, tungi ibodatlarni qoyim qilish haqida so’rashim uyat, shubhasiz, bular sening hayotingda muhim o’rin tutgan ishlar, shunday emasmi?” deb qolsalar, nima der ekansan, do’stim? O’sha vaqtda nimani his qilasan? Uyalasanmi? Afsuslanasanmi? Yoki bez bo’lib tirjayib turaverasanmi?
Necha oylardan beri namoz o’qimayotganingdan yoki umring bino bo’lib, atigi bir marta Qur’onni qo’lingga olib o’qiganing haqida do’stlaringga maqtanib yurganingdan xabar topsalar, nima derkinlar?.. “Qiyomatda men faxrlanadigan ummat sen emassan”, dermikinlar yoki indamay, g’azabdan yuzlari qizarganicha uyingdan chiqib ketarmikinlar?..
Mayli, bunday bo’lmadi ham , deylik, Sayyidimiz bilan nima haqda suhbat qurgan bo’larding? Musulmonlarning g’am-alamlari, musibatlari xususidami yoki din ilmlari, musulmonlar tarixi, ummatning kelajagi haqidami? Yo restoran, konsertlarga birga boradigan do’sting haqida so’zlab berasanmi? Yoki serilallar qahramonlari haqidagi oxirgi mish-mishlarni, yangi kinolar, futbol o’yinlari, modaga kirayotgan kiyimlar, moshinalarni so’zlab berarsan?..
Xo’sh, aziz do’stim, ushbu tasavvuring qalbingda ne tuyg’ularni uyg’otdi? Asli kimsan-u, lekin kimlarga o’xshab yurganingni angladingmi? O’tayotgan umringga ozgina bo’lsa-da nadomat chekdingmi? Rasululloh solallaohu alayhi vasallamning bir zumlik ziyoratlariga hali tayyor emasligingni his etdingmi? Demakki, Alloh taolo huzurida turishga umuman tayyor emassan.
Senga nima bo’lganki qalbing qotib qolibdi. Diling dag’allashibdi. Sendan qochayotgan dunyoning ortidan quvib yuribsan. Alloh taolo senga har kuni ochayotgan minglab tavba va munojot eshiklaridan yuz o’girgansan…
Aziz do’stim! Hech shubhasiz, sen qiyomat kuni ushbu maqolani eslaysan. U kunda sen ikki kishining biri bo’lasan: yo maqolani o’qigach, hayoti yaxshi tarafga o’zgarishiga sabab qilgani uchun Allohga hamd aytgan yoki o’qigan bo’lsada, o’zini yig’ishtirib olmagan, oqibatda ushbu maqola qiyomat kuni zarariga hujjat bo’lib qolgani sabab qattiq nadomatga uchragan kishi…
Do’stim, tavbaga shoshil, yomonliklardan o’zingni tiy. Alloh sendan rozi bo’lsin!
|
