Екатеринбургнинг «Урал» жамоаси шарафини ҳимоя қилаётган ҳамюртимиз Владимир Шишелов ҳозирги кунда 14 гол билан Россия биринчи дивизиони тўпурарлари рўйхатини бошқариб бормоқда. 

Яқинда «Урал» ФК расмий сайти мухбирлари ҳужумчининг уйида меҳмон бўлишди. Майдонда Владимир Шишелов ҳақиқий «довул»дир. У ҳамиша қаергадир югураётган, нимадир қилаётган бўлади. Хуллас, ҳамиша «жанг»да. Аммо оддий ҳаётда у «жангчилик» қобилиятини ишга солмайди, - деб ёзади «Комсомолская правда» нашри. Ўттиз ёшни қоралаб қўйган ҳужумчи одатдагидек кечки сайрга отланмоқда. Эгнида оқ футболка, шортик, оёғида эса крассовка. Қўлидаги гипс эса унинг мунтазам «жангчи» сифатида фаолият юритишидан дарак беради.  
Шишеловнинг Екатеринбург марказидаги уйи яхши масканда жойлашган. Бу элит турар-жой мажмуи. Аммо ҳолати шоҳона, деб бўлмайди. Диван, телевизор, шкаф ва ноутбук. Ўз касбини яхши кўрадиган футболчи учун идеал хонадон. Бу ерда тартибни бузиш учун асос йўқ.

- Вова, яхши яшаркансиз. Аммо камтарона. Биз футболчилар шоҳоналикка интилишади, деб ўйлардик.

- Яшашим учун менга кўп нарса керак эмас. Ҳамиша борига кўникиб яшаганман. Эсимда, фаолиятимни янги бошлаганимда уч йил базада истиқомат қилганман. Ҳеч қандай шинамликни кўрмаганман. Югурганман, еб-ичганман ва ётганман. Дам олиш кунлари эса ота-онамнинг олдига ошиқардим. Бундан ортиқ нима керак? Ҳозир ҳам шундайман... 
Владимирнинг оиласи Екатеринбургга бир ой олдин, давралар оралиғида меҳмонга келганди. Бу ғалати туюлсада, шундай. Рафиқаси Ирина, 9 ёшли ўғли Егор ва 4 ёшли қизи Дариналар Химкида истиқомат қилишади. Шишелов «Химки» сафида ўйнаганида у ердан уй сотиб олганди. Бунгача оиласи билан Молдова, Ўзбекистон ва Тольяттида бирга яшашган. Айтганча, Шишелов Тольятининг «Лада» жамоасида ҳам тўп сурган. 
Егор ҳам отаси изидан борди. Химкида у футбол мактабига қатнайди ва чап қанот ярим ҳимоясида ўйнайди. «Ким билади, балки, ўғлим билан ҳали бир жамоада ўйнарман»,-дейди Шишелов. 
Бир неча соатдан сўнг «Уралмаш» стадионида машғулотлар бошланади. У ерга етиб олиш учун қаҳрамонимиз такси чақирди. Екатеринбургда бир йилдан буён ўйнаётганига қарамай, Володя шахсий автомобилидан фойдаланмайди. «Машинам Химкида. Бу ерда уни менга нима кераги бор?»,-дейди у. 
Шишелов Хабаровскдаги учрашувда жароҳат олганди. Серғайратлиги туфайли ҳам рақиб дарвозабони билан тўқнашиб кетганди. 
Шунга қарамай, ушбу ўйинни тўлиқ ўтказди. Екатеринбургга қайтганларидан сўнг унинг қўли сингани маълум бўлди. Умуман олганда, бу Шишелов фаолиятидаги бешинчи синиш. Ҳаммаси деярли бир хил. Икки марта оёғи ва уч марта қўлини синдириб олган. 
- Биламан, жароҳатлардан қочиб қутулиб бўлмайди. Ўйин услубим шунақа, ҳамиша таваккал қиламан. Менинг вазифам ҳимоячидан ўзиб, гол уриш. Шу боис ҳам қанча кўп ҳаракат қилсам, шунча фойда беради. Ахир ёнимдан ўтиб кетаётган тўпга қараб туролмайманку. Курашга киришаман ва эвазига жароҳат билан «тақдирланаман». Лекин голларни ҳам шу кураш эвазига ураман. 
- Жароҳат олгандан сўнг қандай ўйнаш мумкин?

- Оғриққа чидаб... Бундай майда-чуйда нарсаларга эътибор бермаслик лозим. Деярли ҳар бир футболчи соломатлигидан шикоят қилади. Айниқса, биринчи дивизионда. Бу лигада ўйинлар ҳар уч кунда ўтказилади. Кичик жароҳатингиз бўлса ҳам майдонга тушишга мажбурсиз. Даволанишга вақт йўқ. Мухлислар эса буни билишмайди. Улар трибуналарда бақир-чақир қилаверишади. Тўғри, баъзида футболчилар ҳам ўз имкониятлари даражасида тўп сура олмайдилар. Бунга ҳам микрожароҳатлар сабаб бўлади. Аммо ўйинлардан олдин мухлисларга ҳеч ким қайси футболчининг қай даражада жароҳати борлигини айтмайди. 
Аслида Шишелов шу ҳолати билан машғулотларни тўхтатиб, жароҳатини даволатиши керак. Лекин у синган қўли билан майдонга тушмоқда. Чунки «Урал» сафида ундан яхшироқ ҳужумчи йўқ. Айни пайтгача Шишелов рақиблар дарвозасига 14та тўп киритган. Жамоанинг бошқа ўйинчиларининг умумий голлари сони ҳам шунча. 
Маълум бўлишича, «Урал» ҳужумчисига премьер-лигадан таклифлар тушган. Бироқ Шишелов мавсум охирига қадар Екатеринбург клубини тарк этишни истамади.

- Премьер-лига ажойиб, бу менинг орзум. Лекин бир қарорга келганда, уни ўзгартирмайдиган инсонларданман. Мени таклиф қилишганида, «Урал» билан шартнома имзолаб бўлгандим. Уни охирига етказишим керак, - дейди у. 

Шишелов билан энг қизиқ холат 2005 йили юз берган. Олдинги икки мавсумни у анча муваффақиятли тарзда ўтказганди. Ўшанда Молдованинг энг машҳур клубларидан бири «Зимбру» шарафини ҳимоя қиларди. Аслида уни кишинёвликлар ўринбосар ҳужумчи сифатида таклиф қилишганди. Бироқ Владимир жамоанинг асосий ўйинчиларидан бирига айланади. Икки мавсумда рақиблар дарвозасини 28 марта ишғол қилган футболчи УЕФА кубогида ҳам ўйнади. Шундан сўнг футболчини «Химки»га таклиф қилишди. Мураббий имконият беришини айтганди. Лекин ўз билганидан қолмади. Биринчи ўйинда Шишеловни 15 дақиқа ўйнатди. Иккинчисида эса уни захирага ўтказиб қўйди. Учинчи ўйинни Шишелов кутиб ўтирмади. У нарсаларини йиғиштириб, Хитойга йўл олди. 
- Эрталаб қўнғироқ қилиб, «Вова Хитойга кўрикдан ўтгани борасанми? Самолёт кечда учади» дейишди. Турмуш ўртоғимнинг бир ойдан сўнг кўзи ёриши керак эди... Лекин кўп ўйлаб ўтирмадим. Оқшомда Хитойга етиб бордим ва мавсумнинг қолган қисмини ўша ерда ўтказдим, - дейди қаҳрамонимиз. 
Володя Россияга 2008 йили қайтиб келди. Аввалига мавсумнинг биринчи қисмини Иркутскнинг «Звезда»сида ўтказди. Кейин уни «Урал»га таклиф қилишди. Унинг ҳисобида ЦСКА дарвозасига киритилган ғалаба тўпи бор. Ўша ўйиннинг видеоёзувини Вова Ўзбекистоннинг Зарафшон шаҳрига олиб кетади. Ушбу шаҳарда Володя 4 ёшидан 17 ёшигача яшаган. У ерда унинг биринчи мураббийи Виктор Пужалин истиқомат қилади. У шогирдининг энг яхши ўйинлари ёзилган видео тасвирларни коллекция қилади. 
- Ўзбекча гапира олмайман. Бироқ ҳаётда ва футболда нимага эришган бўлсам, улар Ўзбекистон билан чамбарчас боғлиқдир. Биринчи мураббийим мени ҳужумчи қилиб тарбиялади. Катта жамоаларда ўзимни қандай тутишимни ўргатди. Хиёл бурнинг кўтарилса тезда ўрнингга тушириб қўйишарди. Умуман олганда, Россияда ҳам, Модовада ҳам, Хитойда ҳам катталарни Ўзбекистондагидай ҳурмат қилишмайди. У ерда ҳеч қачон ёшлар катталарга беҳурматлик қилишмайди ва бақаришмайди, - деб ўзбекларга бўлган ҳурматини изҳор этади Шишелов. 
 
Маълумот учун: Владимир Александрович Шишелов

Туғилган санаси ва манзили: 1979 йил 8 ноябрь, Апшеронск (Краснодар ўлкаси, Россия) шаҳри. Фуқаролиги: Ўзбекистон|Россия., Бўйи: 176 см. Вазни: 72 кг. Амплуаси: ҳужумчи. Ўзбекистон термасида 27 ўйин ўтказиб, 11та гол урган. 
Хоббиси: боулинг. Бўш вақтини оиласи билан ўтказади. 
Ёқтирган таоми: кайфиятга қараб. Ёқтирган кийими: спорт либослари. Ёқтирган автомобили: янгиси. Ёқтирган фильмлари: комедия. 
Эсда қолган учрашуви: барча ғалабаларни эслаб юради. 
«Урал»да нима учун ўйнайди: жамоа олдига юқори мақсадларни қўйгани учун. Бу мавсумдаги мақсади: «Урал» билан премьер-лигага чиқиш. «Урал» мухлисларига тилаги: омад.