|
Шарқ нозиқ ёндашувни талаб қилади. Таниқли ўзбек хонандаси ва актрисаси Шаҳзода бунинг навбатдаги исботи бўлди. Юракнинг туб-тубигача етиб борадиган нозик овоз соҳибаси, назокатли ва мафтункор шарқ гўзалининг образи кўпчиликнинг диққатини ўзига тортгани шубҳасиз. Бугун хонанда – яқин ва узоқ хориж мамлакатларининг энг кутилган меҳмони. У ўз ижоди билан кўплаб мамлакатлардаги тингловчиларнинг юрагини забт эта олди.
Бугун Шаҳзода ўз ижоди, мавқейи ва россиялик тингловчиларга чиқиши ҳақида Krasota.uz сайтининг фойдаланувчилари билан ўртоқлашади.
Шоу-бизнес: Ўзбекистонда ва Россияда
Шоу-бизнес худди ҳаёт мактабидай кўп нарсага ўргатади. Эсимда, бу соҳага мутлақо янги воқеликни кашф этган ҳолда 19 ёшимда кириб келганман. Шу пайтгача шоу-бизнес дунёсини билмасдим. Унга мослашиш даврим анча оғриқли бўлган, узоқ вақт давомида у кўзимга эртакдай кўринган. Кўп нарсалар менга мутлақо ғаройиб ва тушунарсиз туюларди. Олдинига қийинчиликлар бўлди, чидай олмайман, уддалай олмайман, деб ўйлардим. Аммо уддасидан чиқдим...
Вақт ўтиши билан шоу-бизнес одамни синдирмаслигини, уни бузмаслигини тушуниб етдим. Аксинча у одамни рухан чиниқтиради, маънавий кучли қилади. Биласизми, ҳаммаси одамнинг ўзига боғлиқ, агар унда ёмон ишларга мойиллик бўлса, унда салбий жиҳатлар устун бўлса, шоу-бизнес уни шунчаки очиб беради, холос. Бу бор ёки йўқ. Агар айтганимдай, одам ёмон ишларга мойил бўлса, у қайси соҳада ишлашининг фарқи йўқ.
Агар Ўзбекистондаги ва Россиядаги шоу-бизнеснинг фарқли томонларига тўхталадиган бўлсак, хафа бўлмайлиг-у, бизда эстрадага чиқиш осонроқ, клипни суратга олиш ҳам, радиостанциялар ва TVда чиқиш ҳам жуда осон. Албатта, буни Россияда ҳам қилса бўлади, аммо фақат бир ёки икки кун. Яъни сени TVда кўрсатишади, аммо истеъдодинг бўлмаса, астойдил меҳнат қилмасанг фойдаси йўқ. Ўз позициянгни забт этиш жуда қийин, уни сақлаб қолиш эса ундан-да қийинроқ. Бунга сабаб – у ердагиларнинг барчаси ўз ишининг устаси – ҳаммаси. У ерда истеъдодсиз одамлар ушланиб қолмайди. Россияда мусиқага муносабат бошқача. Мен бу яхши, бу ёмон деб баҳо бераётганим йўқ, аммо у ерда ҳақиқатан ҳам ҳаммаси ўзгача. Бу ерда мен исталган композиция тез ва осон ёзилишига ўрганганман. Кўпи билан ярим соат: келдим, қўшиқ айтдим, ёздим, кейин кетдим. Россияда эса битта нақоратни деярли бир кун ёздик. Узоқ ёзганимизга сабаб, қўшиқ айтишни уддалай олмаётганингда эмас, балки у ерда натижа аъло даражада бўлмагунга қадар сендаги бор нарсани чиқариб олишга ҳаракат қилишади.
Россия тингловчисига чиқиш
Сўнгги икки йил ичида мени Россияга тез-тез таклиф қиладиган бўлишди. Ўзимнинг яккахон концертларим билан унинг жанубий қисмини, яъни Махачкала, Каспийск, Кавказ ва бошқа жойларни кезиб чиқдим.
Рус тилида қўшиқ ижро этиш таклифлари кўплаб тушди. Биз ҳатто бу ҳақда ўйлаб кўриб, рус тилида ижро этилган қўшиқлар альбомини ёзишга ҳам қарор қилдик. Ҳозир ушбу альбом устида фаол иш кетмоқда. Ҳар бир композицияга жиддий қараяпмиз. Ҳозирги ҳолатда альбомни ёзиш жараёни жуда узоқ ва мураккаб бўлиши табиий. Ёзиб бўлинган ва бироз танилган қўшиқларим орасида “Минг ва бир кеча” қўшиғини алоҳида қайд этишни истардим. Россиялик тингловчиларга илк бор айнан шу қўшиғим билан чиққанман.
Ижод ҳақида: Шаҳзода ва DJ Smash
Шунингдек янги рус тилида чиқадиган альбомимдан DJ Smash билан дуэтда ижро этилган “Между небом и землёй” (“Ер ва осмон ўртасида”) қўшиғи ҳам ўрин олган. Ҳозир шу қўшиққа клип оляпмиз. Сизларга бир сирни очмоқчиман: шарқ экзотикаси ва ўзига хослигини акс эттириш мақсадида тасвирга олиш ишлари Ўзбекистонда, асосан Хоразмда олиб бориляпти. Тасвирга олиш ишларининг бир қисми Лос-Анжелес ва Россияда амалга оширилади. Клип режиссёри россиялик истеъдодли режиссёр Павел Худяков (ХУДЯКОВ Production). Тимати билан Snoop Dogg нинг Groove on деб номланувчи ҳамкорликдаги клипи унинг охирги ишларидан бири ҳсобланади.
Тўғрисини айтсам, дуэт бўлиб куйлаш кимнинг миясига қандай келиб қолганини эслай олмайман. Бу иккаламизнинг ҳам хоҳишимиз бўлган. Мени ҳайрон қолдиргани DJ Smash ёқимли ва очиқ одам бўлиб чиқди. Одатда, шоу-бизнесда характери жуда мураккаб кишилар айланади, улар билан тил топишиш қийин. Уларнинг кўпчилиги ўша “юлдузлар касали”га мубтало бўлади. Андрейда эса буни кузатмадим. Биз тез тил топишдик, ҳамкорлик ҳақида келишиб олдик ва “Между небом и землёй” қўшиғига тўхталдик. Бу Андрейнинг композицияси, унинг ёзилганига 10 йилдан ошган. Биз қўшиққа янги элементларни қўшган ҳолда унга иккинчи ҳаётни бағишладик. Натижа тингловчиларга ёқишига умид қиламан. Бугунги кунда интернет тармоғида ушбу композициянинг клуб вариантини тинглаш мумкин. Яқин кунларда эса, уни Россия радиостанцияларида ҳам, Ўзбекистон радиоларида ҳам тинглаш мумкин бўлади.
Москвада “Между небом и землёй” қўшиғи устида ишлаётган пайтимда ТНТ телеканали учун “Cosmopolitan-видеоверсия” кўрсатуви ёзиб олинди. Бу мен учун кутилмаган ҳол бўлди. Биз DJ Smash билан студияда эдик, шундай бўлдики тасвирга олиш ишлари қўшиқ ёзиб олинаётган пайтда бўлиб ўтди. Сенга камераларнинг объективи қараб турганида бир пайтнинг ўзида ҳам қўшиқ айтиш, ҳам ўзингни одатдагидай тутиш керак бўлганлиги учун сал ҳаяжонландим, аммо бу Андрейнинг ўзини эркин тутиши туфайли тезда ўтиб кетди.
Шунингдек россиялик таниқли сураткаш Максим Арюков студиясида DJ Smash билан ҳамкорликдаги фотосессиямиз бўлиб ўтди. Ҳаммаси жуда тез, осон ва қувноқ содир бўлди. Мен ҳаммаси айнан шундай бўлади, деб ўйламагандим ҳам. Бизда Ўзбекистонда ишга масъулият билан қарашади. Фотосессиялар ҳам жиддий ўтади, ҳамма диққатини жамлаган, барчанинг ишлаётгани шундай кўриниб туради. Бу ерда эса – бунинг мутлақо акси.
Мен замонавий ўқитувчи образида эдим. Андрейни ўбек тилига, асосан учта сўзга – “ер”, “осмон” ва “муҳаббат” сўзларига ўргатишим керак эди. Аммо, Smash сўзларни унчалик эслаб қололмади.
Фотосессия ҳам ўз-ўзидан бўлиб кетди. Мен тезлик билан шу образга мос келадиган кийимни танлашим, кўзойнак тақиб олишим керак эди. У ерда стилистлар бўлишига қарамасдан, ўзимни ўзим тартибга солдим, сочларимни турмакладим, макияж қилдим. Мана 10 йилдирки томошабинлар олдидаги образимни ўзим яратиб келаман. Ҳаммасини кийимдан тортиб макияжгача, уларнинг майда деталларигача ўзим ўйлаб топаман.
Маълум бир вақтдан сўнг Россияда менга ёрдам берадиган услубчининг хизматлари керак бўлади, деб ўйлайман.
Ҳамкасб фикри: DJ Smash Шаҳзода ҳақида
Шарқ нозик ёндашувни талаб қилади. Шаҳзода – бунинг ёрқин исботи. Хонанда ғаройиб, нозик овоз соҳибаси. “Между небом и землёй” (“Ер ва осмон ўртасида”) деб номланувчи композиция айнан у учун ёзилгандай. Шаҳзода томонидан намойиш этилган кўнгилни эритувчи вокал кўплаб тингловчиларнинг юрагидан жой олишига ишончим комил. Дуэтимиз ҳам тасодиф эмас, биз электрон ритмларни шарқ экзотикаси билан бирлаштирган ҳолда янги бир нарсани яратдик.
У билан ишлаш осон, ҳамкорлик қилиш эса ёқимли, у ўз соҳасида профессионал дейиш мумкин. “Между небом и землёй” (“Ер ва осмон ўртасида”) трекини ёзишга бор-йўғи бир кунимизни сарфладик. Ҳамкорликда ишлаш давримизда у билан яқин дўст бўлиб олдик, шунинг учун Туғилган Кунимга кела олмаганидан афсусдаман. Ҳечқиси йўқ, яқин кунлар ичида биз ҳамкорликдаги клипимизни тасвирга олиш учун Лос-Анжелесга жўнаб кетамиз. У ерда унумли ишлаб, вақтимизни яхши ўтказамиз, деб ўйлайман.
Менинг услубим
Онам филолог, рус тили ва адабиёти ўқитувчиси, аммо бундан ташқари у ажойиб чевар ҳам. Айнан улар туфайли ўзимга яраша дидим бор, чиройли либосларни яхши кўраман. Менга классик услуб яқинроқ, ортиқча бежамдорликни ёқтирмайман. Тўғри, шоу-бизнесда бу услубга амал қилиш қийинроқ, чунки касбингизнинг ўзи шуни талаб қилади. Агар сен санъаткор бўлсанг, анчайин кўзга ташланадиган ва эсда қоладиган образинг бўлиши керак. Аёл баданининг гўзаллигига урғу берувчи очиқ кечки байрам либосларини жуда ёқтираман. Баъзида ниманидир озгина очиш ёки унга урғу бериш мумкин, деб ўйлайман, фақат буни тўғри қилиш керак.
Урф бўлган либосни кийишни эмас, сенга ярашадиган либосни кийиш тўғри деб ҳисоблайман. Ўшандагина шу либос сенда жуда чиройли кўриниши ва чиройингга чирой қўшиши шубҳасиз. Мен доим шу қоидага амал қиламан. Шунга қарамасдан, мунтазам равишда жуда кўп миқдорда мода журналларини, Fashion-каналларни кузатиб юраман. Кўрганларимни қоматим билан таққослайман ва менга нима ярашса, шуни танлайман. Мен қоматимнинг барча кучли ва заиф томонларини биламан, нимани яширишни, нимани эса, аксинча бўрттириш кераклигини биламан.
Актёрлик фаолияти
Бугунги кунда фильмотекамда бешга яқин фильмим бор. Қийин бўлишига қарамасдан, кинода рол ўйнаш менга жуда ёқади. Мен профессионал актриса эмасман, бу санъат турига ўқимаганман. Образга кириш, қаҳрамонинг тарихи ва тақдирини ҳис қилиш мен учун қийинроқ бўлган. Аммо бунинг ўзига яраша ёқимли томонлари ҳам бор. “Фотима ва Зуҳра” фильмида образга шунчалик кириб кетдим-ки, кейин ярим йилгача худди туман ичида юргандек бўлдим. Ҳақиқатан ҳам мен учун бу ҳолатдан чиқиш қийин бўлганди. Образни ҳис қилиш ва унга кириш осонмас, аммо ундан чиқиш ундан ҳам қийинроқ.
Фильмни тасвирга олиш жараёни умуман бошқача. Қўшиқчи ва актриса бўлиш – бу мутлақо турли нарсалар. Қўшиқчи – бунда қандай бўлсанг шундайсан, бор санъатингни, қалбингни саҳнада кўрсатасан. Кинода эса бошқа образга киришинг, балки сен учун бегона бўлган бошқа характерни кўрсатишинг керак бўлади.
Концертлар: энг яхшилари ва эсда қолганлари
Юқорида айтганимдай, мен тез-тез Россиянинг жанубий қисмида концертлар бериб тураман. Айнан Кавказда бўлиб ўтган концертимни ҳеч қачон унутмасам керак. Мени тинглашга ҳақиқий тоғликлар келишганди. Мен эса фақат ўзбекча композицияларни ижро этдим, у пайтда рус тилидаги қўшиқларим мавжуд эмасди, ҳатто “Минг ва бир кеча” деб номланувчи композициям ҳам йўқ эди. Навбатдаги қўшиқни ижро этиш пайтида менга қўшилиб куйлашаётганини сездим. Олдинига менга шундай туюлаётган бўлса керак, деб ўйладим. Бундай бўлиши мумкин эмас, улар ўзбек тилини билишмайди-ку. Кейин чидай олмасдан, концерт ўртасида бир нечта одамни саҳнага олиб чиқишга қарор қилдим. Улардан мен билан бирга улар учун бегона бўлган ўзбек тилидаги композицияни куйлашни илтимос қилдим. Улар мен билан бирга куйлашди. Бу мени жуда таъсирлантириб, катта илҳом бағишлади. Ана шундай дақиқаларда яна кўпроқ ишлагинг, янги қўшиқлар яратгинг келади. Афсуски, мен бирортаям кавказча машҳур қўшиқни билмайман. Лезгинкани ижро этиш таклифи тушганди, аммо биз бунга журъат этмадик. Мени шунчалик илиқ ҳислар билан кутиб олгани учун бу халқдан жуда миннатдорман.
Мен ҳақиқатан ҳам ҳеч қачон унутмайдиган концертлар бор. Шундай концертлардан бири денгиз бўйида Махачқалада бўлганди. Концерт кечқурун соат еттида бошланиши керак эди. Тошкент – Москва, Москва – Махачқала рейси билан концертдан бир неча соат олдин учиб келишим ва концертга хотиржам тайёргарлик кўришим керак эди. Москвага учиб келдик. Бизни бироз ушланишимизни айтиб, самолётдан туширишди. Бироз вақтдан кейин яна самолётга чиқдик ва Махачқалага қараб учдик..., аммо у ерга дарров етиб боролмадик. Қўниш пайтида учувчи бошқарувни йўқотиб қўйдими, ё бошқа нарса содир бўлдими, самолёт даҳшатли силкина бошлади. Салонда ўтирганларнинг барчаси жуда қўрқиб кетиб, бақира бошлашди. Натижада самолётни қўндира олишмади ва йўналишимиз чўзилиб кетди. Самолётни бошқа шаҳарда – “Минеральные воды»да қўндиришмоқчи бўлишди. Самолёт у ерда ҳам қўнолмади. Владикавказга учдик, у ерда озгина ерга қўнгандай бўлдик, кейин яна Махачқалага қараб учдик. Шаҳарга фақат кечки тўққизда етиб келдик.
Концерт бўладиган майдонга деярли ярим кечаси етиб бордик. Ҳеч ким кетиб қолмаганига ҳайрон қолдим. Шу тарзда бўлиб ўтган воқеалардан кейин кечаси оёқларим қалтираган ҳолда концерт бердим. Илиқ ва дўстона кутиб олишганидан кейин ҳаммасини унутдим, десам ҳам бўлади.
Тоғликлар жуда ҳиссиётли халқ. Бизда Ўзбекистонда куйлашинг концертга келган тингловчига ёқса, сенга гуллар, ўйинчоқлар ҳадя қилади. У ерда эса менга қараб уяли алоқа телефонларини “Ушла, бу сенга!” деб отишган пайтлар ҳам бўлди. Бунисини мен энди ҳеч қачон унутмасам керак (кулади).
Яқинда Тожикистонда қизиқ воқеа юз берди. Мен у ердаги стадионларнинг бирида концерт беришим керак эди. Концертдан олдин кучли жала қуйди. Мен концертни бошқа кунга кўчирсакмикин, деган хаёлга ҳам боргандим. Аммо концерт бўлди, одамлар келиб, қўшиқларимни тинглашди, ёмғир эса ҳамон ёғарди... бунинг учун мухлисларимдан жуда миннатдорман.
Миш-мишлар: уларга муносабатим
Қанчалик юқорига кўтарилсанг, миш-мишлар шунчалик кўп бўлади. Буни энди тушуняпман. Шунинг учун миш-мишларга унчалик эътибор қилмайман. Аммо илк бор уларга дуч келганимда бунга жуда жиддий қараб, руҳий тушкунликка тушганман. Ҳаётимда анча мураккаб даврлар ҳам бўлган... Қандайдир бемаъни миш-мишлар тарқалганди. Олдинига бу менга кулгули бемаъни нарсадай туюлди. Кейин улар ҳар хил тафсилотлар билан тарқала бошлади. Ана шунда менга оғир бўлди, кўп йиғлардим, ташвиш чекардим. Кўчага югуриб чиқиб “бу ундай эма-а-а-а-а-ас, қулоқ солманглар, ишонманглар!”, деб қичқиргим келган пайтлар ҳам бўлди.
Шундай пайтда мени қўллаб-қувватлаган яқинларимга, дўстларимга, ҳамкасбларимга алоҳида миннатдорчилик билдирмоқчиман. Айнан улар вақт ҳаммасини даволашини ва жой-жойига қўйишини тушуниб етишимга ёрдам беришди.
Ўшанда чиниққан бўлсам керак. Вақт ўтиши билан миш-мишларга артист кўникиши керак бўлган нарсадай қарай бошладим. Ҳозир яқинларимнинг фикрига қулоқ соладиган бўлганман, умуман олганда эса, олдин ҳам шундай эди. Мен учун уларнинг баҳоси ҳамма нарсадан устун.
Мусиқий ижод
Ижодим, мусиқам, қўшиқларим ўзим билан бирга ўзгарди. Вақт ўтиши билан мусиқани тушунишим ҳам ўзгарди. Бунинг устига тингловчига такрорланмасдан доим янги нарсани бериш керак. Шунинг учун ҳар бир альбомим олдингисидан фарқ қилади, уларнинг ҳар бири ўзига хос. Айниқса тез орада мусиқа бозорига чиқадиган охирги альбомимни алоҳида қайд этишни истардим. Унинг фарқли томони шундаки, у глобалроқ. Мусиқаси ўйноқи, клуб мусиқаси деса ҳам бўлади.
Артистлик қисмати ҳақида ўйлар
Артист бўлиш қийин. У катта ирода, сабр-тоқат ва доимий меҳнатни талаб қилади. Агар озгина тўхтаб қолсанг – буни дарров сезишади. Томошабин бу заифлигингни кечирмайди, у ёнингдан ўтиб кетиши ва сени унутиши мумкин. Шунинг учун доимо ишлаш, зўр бериб ғайрат билан ишлаш зарур. Аммо бунда қиз бола эканингни, аёллик нафосатингни ҳам унутмаслигинг лозим. Бу нарса доим сезилиб туриши керак. Артист бўлиш ундан ҳам қийин. Афсуски, қўшиқчи аёл касбига хоҳлаганингдай унчалик жиддий қарашмайди. Ҳамма ҳам буни истаганингдай тушунмайди, қабул қилмайди.
Келажакдаги режалар
Амалга оширмоқчи бўлган режаларим жуда кўп. Жуда кўп нарсани ният қилиб қўяман, бироқ юзага келган вазиятлар туфайли уларни амалга оширишнинг иложи бўлмай қолади. Келинг ниятларим билан ўртоқлашай: ўз исмимни патент қилиб, ўз либосларим линиясини чиқариш ғоям бор эди.
Яна бир амалга оширса бўладиган орзуим – китоб чиқариш, йўқ китоб ҳам эмас, мен бўлган мамлакатлар, маданиятлардан олган таассуротларим ёзилган очерклар тўплами. Бундай кашфиётлар мени доим ҳиссиётларга тўлиб-тоширади, уларни қоғозга битгим келади.
Ҳуқуқшунос бўлишни истайман. Ишонмайсиз, бу менинг болаликдаги орзуим. Кичкина пайтимда инсон ҳуқуқларини ҳимоя қилишни жуда истардим. Ўзимни доим адолат учун курашувчи сифатида тасаввур қилардим. Аммо, афсуски, бу бўлмади, мен умуман бошқа соҳага ўтиб кетдим. Бу иш билан шуғулланишга ҳеч қачон кечмас, деб ўйлайман. Ҳаммаси ҳали олдинда!
Олия Абдунабиева
| 
