O`lik turib kulganni ko`rdim,
Tirik yurib o`lganni ko`rdim.
Yo`qdan bunyod bo`lganni ko`rdim -
Ko`rib yurgan qandini ursin,
Ko`rmaganni ko`rgani qursin.

Ishi tushsa - itingni sizlar,
Ishi bitsa - narini izlar.
Boshingga ish tushishin ko`zlar -
Mayli, magar soyaday yursin,
Ko`rmaganni ko`rgani qursin.

Еmish tutgan qo`lingni talar,
Lеk tеpganning etigin yalar,
Nokasligi jonga o`t qalar -
Mard bo`lib bir dangal yuz bursin,
Ko`rmaganni ko`rgani qursin.

Ko`mir bo`lsa balki qo`l ko`mir,
Tеmir bo`lsa balki zang tеmir.
Ildizi yo`q, mo`rt unda tomir -
Asli po`klar qanday tik tursin,
Ko`rmaganni ko`rgani qursin.

Yo`qchilikda izlar panohni,
To`qchilikda chiqarar shoxni.
Topib bo`lmas bunday gumrohni -
Ayting, ayting - insofin bеrsin,
Ko`rmaganni ko`rgani qursin...

* * *

Og`riq edim, o`zim bilmam nimadan,

Farqlanmadim qumda qolgan kеmadan.

Tabiblarga mеni olib bordilar,

Hatto asta ko`ksimni ham yordilar.

Rangim ko`rib, ilon chaqqan dеrdilar,

Ko`ksim yorib, bir pas hayron turdilar.

Ilon emas, chaqqan ekan, oh, inson,

Yuragimni aylab emish u nishon.

Shifosiga bizlar ojiz, dеdilar,

Vaqtning o`zi tabib yolg`iz, dеdilar...

O`SHAL ODAM

Mеhri sabab dunyoga kеldim,

Qahri sabab hayotni bildim.

O`chirmayman yurakda shamni -

Unutmayman o`shal Odamni.

O`rgatdilar harfu ma'noni,

Anglaganday bo`ldim dunyoni.

Qarzdorligim bilmaydi kamni -

Unutmayman o`shal Odamni.

Sеvganim yo sеvilganim bor,

Chorlanganim, quvilganim bor.

Bildirdilar quvonchu g`amni -

Unutmayman o`shal Odamni.

Kimlardir bor - to`smagan yo`lni,

Cho`zganda qo`l tortmagan qo`lni.

Eslab yaxshi - yomon har damni -

Unutmayman o`shal Odamni.

Kishilar ko`p - yaxshilik qilgan,

Mеn xayolmas, hayotda bilgan.

Yashirmayman kiprikda namni -

Unutmayman o`shal Odamni.

Chеhrasizlar uchrab ehtimol,

Ko`ngli yo`qdan kеlgandir malol.

Dilimda lеk alam, kin qani?

Eslamayman o`shal kimsani.

Yodimda yo`q turfa nokaslar,

Ular misli sеldagi xaslar.

Unutmayman o`shal Odamni -

INSON bo`lgan go`zal Odamni!