"BIR SAVOL"

Kulaman deymanu, yig`layman nega,
Qalbim darzlariga bormikan chega,
Dardli bir armonga nahot men ega,
Bir savol yodimdan bo`lmas faromush.
"Sevaman" demagan nimaga Kumush?
Hijron oylarini almashib yilga,
Havasga berilmay, qulf urib dilga,
"Chidolmayman" demay, erk bermay tilga,
Oriyatni asrash - bu qanday yumush,
"Sevaman" demagan nimaga Kumush?
Qoloq bo`lganmi yo - chetda yurmagan,
Serial ko`rmagan, "chat"ga kirmagan,
Internet, "sotka"da ko`ngil bermagan,
Kiyib jinsi shim yo "mini", qo`yib "tush".
"Sevaman" demagan nimaga Kumush?
Shaddod nevaraga yoqarmish biri,
Buni hamma bilar yo`q emish siri,
Ne diyishin bilmas cholga kampiri,
Dunyoning holiga boqaman xomush,
"Sevaman" demagan nimaga Kumush?
"O`tgan kunlar" orga tiklangan bino,
Takror kitob qarab ko`raman kino,
Qancha nazokatu, qancha istig`no,
Qancha odob bilan dilni aylab xush,
"Sevaman" demagan nimaga Kumush?

Bobur Bobomurod