Саудия Арабистонида Ҳажга тайёргарлик кўриш ишлари авжида: ҳожиларни жойлаштириш учун бинолар, янги монорельс темир йўл барпо қилинмоқда, хавфсизликни таъминлаш учун назорат камералари ўрнатилмоқда.
“Макканинг муқаддас ибодатгоҳларида қоим ва кўчма камералар ўрнатилиб, улар орқали ҳожиларнинг ҳаракатларини кузатишга, зарур ҳолларда эса хавфсизлик кучларини сафарбар қлишга хизмат қилади”,- дейилади Ҳажни ташкил қилиш Олий Қўмитасининг ҳисоботида.
Маккаи Мукарраманинг ҳаж амаллари бажариладиган муқаддас жойларига яқинроқ ерларда ҳожилар жойлаштириладиган «тажрибавий» иншоотлар қурилди. Ҳар бири 25 минг ҳожини сиғдира оладиган бу иншоотлар Мино водийсида ҳожилар учун қўшимча жойлар ташкил қилиш мақсадида бино қилинган, деб хабар берилади “Ислам для всех” сайтида.
Шунингдек, замонавий асбоб-ускуналар Жамарот кўпригида ҳам ўрнатилган бўлиб, улар ёрдамида шайтонга тош отиш пайтида издиҳом юз берганда вазиятга аралашиш мумкин бўлади. Маълумки, 2006 йилги ҳаж мавсумида Жамарот кўпригига чиқиш чоғида вужудга келган тиғизликда 364 киши вафот этган эди.
Умр сафари ҳисобланмиш бу муборак зиёратнинг авж нуқтасида ёнғиннинг олдини олиш учун ўт ўчириш ускуналарнинг янги тизими ўрнатилди.
Бу тизим қудратли электр ва дизел моторли насосларни ишга тушириб, минутига 1500 галлон (ёки 5679,35 литр) сув ҳайдаб бера олади.
Монорельс
Саудия Арабистони ҳукумати муқаддас жойларни бир-бирига боғловчи, бир неча миллирд долларлик монорельс темир йўл қурилиши лойиҳасини амалга оширмоқда.
«Бу лойиҳа бўйича қурилиш ишлари 2008 йилнинг декабрида бошлаб юборилди ва кейинги ҳаж мавсумига қадар йўлнинг 35 фоиз қисмини тугатиб, ишга тушириш режалаштирилган”, - дейилади ҳисоботда. Маккани Мино, Арофат ва Муздалифа билан боғлайдиган мазкур темир йўл қурилиши милодий 2011 йилда тугатилади. Мазкур темир йўлдан юрадиган поезд Арофатда, Муздалифа ва Мино водийларида тўхтаб ўтади. Минодаги станция Жамарот кўпригининг тўртинчи қаватида қурилади.
Ушбу поезд 6-8 соат давомида камида беш юз минг кишини ташиш имконига эга бўлиб, Маккадаги ҳаракат тирбандлигини енгиллаштиради.
“Мазкур лойиҳа туфайли Қиролликнинг турли шаҳарларидан, Форс кўрфазининг бошқа давлатларидан келаётган ҳожиларга хизмат кўрсатувчи 53 мингта автобус ва бошқа автомашиналардан воз кечиш имкони туғилади”, - дейилади ҳисоботда.
Бундан ташқари, монорельс темир йўлини Маккадаги Масжидул Ҳаромгача давом эттириш, яъни Макка ва Мадинани боғлаб турувчи Ҳарамайн темир йўлига уланиш имкониятлари ўрганилмоқда.
