 Россия Маданият вазирлиги томонидан «Эротик ва порнографик материаллар айланмасини чеклаш тўғрисида»ги Қонун лойиҳаси тайёрланди.
Ниҳоят, ушбу ҳужжатда порнография тушунчасига тўғри таъриф берилди. Шунингдек, лойиҳага порномаҳсулотлар айланмасига қўйиладиган чеклашлар киритилган. Маданият вазирлигини бундай қарорга келишга фуқаролардан келаётган юзлаб шикоятлар ва ташвишли хатлар мажбур бўлди: ҳар мингта хатнинг 800-900 тасида порнографиянинг оммалашиб кетаётганлиги, айниқса унинг телеэфирда кўпайиб бораётганлиги устидан шикоятлар ёзилмоқда. Ички ишлар вазирлигининг сентябр ойи якунлари бўйича берган маълумотига кўра, Интернетда фақат болалар порнографияси билан тўлдирилган сайтларнинг сони деярли 30 фоиздан кўпроқни ташкил қилган. Мустақил (бетараф) экспертларнинг фикрига кўра, бундай интернетдаги бундай ифлос ресурсларнинг сони 300 миллионга етиб қолган. Айни пайтда порносайтларга ҳар ойда 30 мингдан кўпроқ киши кираётганлиги ҳам маълум қилинган. Россия Ички ишлар вазирлигининг маълумотларига кўра, болалар порнографиясига оид материалларнинг сони 1997 йилга нисбатан 25 бараварга ошган. Эътибор беринг, бу рақамлар порнобозорнинг ҳали энг оммалашмаган сегментидаги аҳволни кўрсатяпти. Бугунги кунда порномаҳсулотларни исталган киоскдан сотиб олиш мумкин. Улар прайм-тайм пайтида (телевизор энг кўп кўриладиган вақтда) телевидение орқали бемалол эфирга узатилмоқда. Порнографиянинг ёш болаларнинг шахсининг шаклланишига кўрсатаётган таъсири экспертларни айниқса жиддий ташвишга солмоқда. Россия Жамоатчилик палатасининг бағрикенглик ва виждон эркинлиги масалалари бўйича комиссиясининг аъзоси Комилжон Қаландаровнинг айтишича, оммавий ахборот воситалари маиший бузуқ, зинокор авлодни тарбияламоқда. «Бизнинг телевидение шафқатсизлик, зўрлик, наркотиклар, секс ва қимордан иборат бўлиб қолди. Телевизор олдида ўсаётган бола энди бу иллатларнинг барчасини оддий ҳолат деб қабул қиладиган бўлиб қолди. Бу болалар фильмлардаги бундай «қаҳрамон»ларга тақлид қилишмоқда, оқибатда ёшлар ўртасида таносил касалликлари, наркомания ва бошқа зарарли одатлар кенг тарқалмоқда. Бу – секин таъсир қиладиган бомбадир. Яна 10-15 йилдан кейин бу болалар ўсиб, улғаяди. Ва агар улар шу давр мобайнида мана шу «заҳар»дан озиқланишда давом этсалар, маънавий ногирон бўлиб етишадилар», - дейди у. Айни пайтда, экспертлар порнографияни тақиқлашга ҳам ақл билан ёндашиш кераклигини таъкидлашмоқда. «Ҳеч нарсани ман қилиш мумкин эмас. Ундай қилсак, қизиқиш ўз-ўзидан янада кучайиб кетади», - дейди Қаландаров. Давлат Думасининг депутати Александр Крутовнинг айтишича, бу ерда эҳтиёткорлик керак. Дастлаб порномаҳсулотларни кундузи намойиш қилишни чеклашдан бошлаш керак. Маълум вақт ўтгачгина, уни махсус пуллик каналларга батамом ўтказиб юбориш мумкин. Босма маҳсулотларга келсак, бу соҳада аввал порнографик мазмундаги газета-журналларни муқовадаги ярим-яланғоч суратлар кўринмайдиган қора пакетларда соттиришга ўтиш керак, кейинроқ эса бундай маҳсулотларни махсус, ихтисослашган дўконлардагина сотиладиган қилиш лозим. Интернетдаги барча порносайтларни пуллик қилиб қўйиш, уларнинг бош саҳифаларидаги беҳаё суратларни эса олиб ташлаш керак. Ана шу чеклашлар тўлиқ амал қила бошлаб, кўпчилик бунга кўниккандан кейингина бутунлай тақиқлаш масаласини кўтариш мумкин бўлади. Бундан ташқари, экспертларнинг фикрича, порноиндустрияни чеклаш кутилаётган натижалар келтириши учун, давлат томонидан унинг ўрнига нимадир таклиф қилиниши ҳам керак. «Телевизор орқали инсонда гўзаллик ҳиссини тарбияловчи қизиқарли дастурлар, фильмлар намойиш қилиниши лозим. Болаларни спорт билан ёки бошқа қандайдир ижтимоий фойдали фаолият билан банд қилиш керак, токи уларда мана бу разолат билан шуғулланишга вақт қолмасин», - деб хулоса қилади Крутов.
|
