Kanadaning Vankuver shahrida bo`lib o`tayotgan navbatdagi qishki olimpiada o`yinlari jahon sport muxlislari e`tiborida desak mubolag`a bo`lmaydi. Bu musobaqaga bo`lgan uzoq vaqtlik tayyorgarchilik ham ayrim muammolarni hal eta olmadi. Quyida aynan shu muammolar haqida so`z yuritamiz...
- 500 metrgacha bo`lgan konkida uchish musobaqasida ilk 10 ta sportchi juda ajoyib chiqish qilishdi. Muzni tozalash va silliqlash maqsadida maydonga tushirilgan mashina kutilmaganda yaxshi ishlamadi va natijada yo`lakcha musobaqani davom ettirgan sportchilarga talay noqulaylik tug`dirdigan holatga kelib qoldi. Shu sababli musobaqa bir soat kech davom ettirildi.
- Kecha, ya`ni dushanba kuni mukofotlarni topshirish marosimida ham yana bir noqulaylik yuzaga keldi. Gap shundaki, bir necha o`n ming muxlis yig`ilgan majmuada 10 daqiqa davomida elektr tarmog`ida uzilish yuzaga keldi va marosim yana cho`zilib ketishiga sabab bo`ldi. Aytish kerakki, aynan shu kuni Kanada o`zining ilk oltin medaliga ega bo`ldi.
- Sportchilar va muxlislar uchun yuzaga kelayotgan muammolardan yana biri transport bilan bog`liqdir. Vankuver ko`chalarida mashinalar tiqini yuzaga kelishi bilan bir qatorda jamoat transportlari jadvalining qat`iy emasligi muxlislarga qiyinchilik tug`dirmoqda.
- Olimpiadaning ochilish marosimida Olimpiya olovi tagligining oynalaridan biri singan edi. Shu bilan birga tizimda yuzaga kelgan buzilish tufayli uni qayta tiklashning imkoni bo`lmayapti. Hozirgi kunda taglikning singan tarafi yer bilan bitta darajada turibdi.
- Olimpiada musobaqalari boshlanishidan oldin noqulay ob-havo tufayli fristayl va snovbord musobaqalari o`tkaziladigan maydon qorsiz qoldi. Shu sababli musobaqa oldidan yo`laklarni vertolyot yordamida boshqa joyga ko`chirishga to`g`ri keldi.
- 12-fevral kuni Gruziya vakili bo`lgan 21 yoshli sportchi Nodar Kumaritashvili vafot etdi. Uning o`limiga mashg`ulotlar vaqtida maydon chetida o`rnatilgan to`siqqa borib urilganligi sabab bo`ldi. O`zini to`xtata olmay qolgan sportchi borib to`siqqa urildi va jarohat oldi. U zudlik bilan kasalxonaga elitildi. Lekin shifokorlarning urinishlari samarasiz yakunlandi...
Musobaqalar hali davom etmoqda. Vankuverdagi bu kunlar hali ko`p kishilarga quvonch ulashsa, ko`pchilikning alam bilan xotirasida qolishi turgan gap. Kuzatamiz...