2011-yilning I choragida Nokia kompaniyasining mobil telefonlar bozoridagi ulushi 25% ni tashkil qildi. Bir yil davomida bu ko‘rsatkich 5,5 foizli punktga yoki o‘tgan yil bilan solishtirganda 18% ga kamaygan. Bu haqda Gartner tadqiqot kompaniyasining yaqinda e’lon qilgan hisobotida ma’lum qilingan.

Jahon mobil telefonlar bozorida ikkinchi va uchinchi o‘rinlarni Janubiy Koreyaning Samsung va LG kompaniyalari bo‘lishib oldilar. Hozirda Samsung ushbu bozorda 16,1% ulushga ega bo‘lsa, LG esa atigi 5,6% ulush bilan kuchli uchlikka kirgan.

Joriy yilning yanvar-mart oylarida butun dunyo bo‘ylab jami 427,8 million dona yangi mobil telefon sotilgan. Taqqoslaydigan bo‘lsak, o‘tgan yilning xuddi shu davrida bu ko‘rsatkich 359,6 millionni tashkil qilgan edi. Shunday qilib, bir yil davomida mobil telefonlar bozori 19% ga o‘sgan.

Biroq, kuchli o‘nlikka kirgan kompaniyalardan to‘rttasi – Nokia, LG, Motorola va Sony Ericsson hisobot davrida o‘tgan yilga qaraganda kamroq telefon sotgan.

Eng yuqori o‘sishni Apple kompaniyasi ko‘rsatdi. Butun dunyoga mashhur iPhone smartfonlari o‘tgan yilning I choragida 8,3 million dona sotilgan bo‘lsa, joriy yilning xuddi shu davrida bu ko‘rsatkich ikki barobarga oshib, 16,9 million donadan iborat bo‘ldi. Apple hozirda o‘zining 3,9% ulushi bilan mobil telefonlar bozorida 4-o‘rinni egallab turibdi. "Tishlangan olma” bu borada HTC, Motorola va Sony Ericsson kabi kompaniyalarni ortda qoldirib ketdi.

Tayvanning HTC kompaniyasi ham mobil telefonlar savdosida katta muvaffaqiyatlarga erishmoqda. U o‘tgan yili yanvar-mart oylarida atigi 3,4 million dona telefon sotgan bo‘lsa, joriy yilda ushbu raqam 2,8 martaga ortdi va 9,3 million donani tashkil qildi.

Gartner tadqiqot kompaniyasi faqatgina mobil telefonlar savdosi bilan cheklanib qolmay, uning bir segmenti hisoblangan smartfonlar bozorini ham tahlil qilib chiqqan. Kompaniya hisob-kitoblariga ko‘ra, 2011-yilning yanvar-mart oylarida butun dunyo bo‘ylab 100 million donadan ortiq smartfon sotilgan. O‘tgan yil bilan solishtiradigan bo‘lsak, o‘sish 85% ni tashkil qildi.

Shunday qilib, hozirda dunyodagi eng mashhur mobil operatsion tizim – Google internet-giganti tomonidan ishlab chiqilgan Android (36%) platformasidir. Keyingi o‘rinlarda esa Nokia kompaniyasining Symbian (27,4%), Apple kompaniyasining iOS (16,8%) va Research in Motion (RIM) kompaniyasining BlackBerry (12,9%) mobil platformalari turibdi.

Yuqorida sanab o‘tilgan eng mashhur to‘rtta mobil operatsion tizim birgalikda bozorning 93% qismini egallamoqda.

Manba: Lenta.ru