Санъаткорлар оиласида таваллуд топган бугунги қаҳрамонимиз болалигида ҳуқуқшунос бўлишни орзу қилган. Лекин "хонанда бўлишни хоҳлайман!” деганида ҳам унинг бу истаги ҳеч кимни ҳайратга солмаслиги шубҳасиз эди.

Нилуфарнинг интервьюсидан хулоса қилганим шу бўлдики, агар қизиқиш бўлмаса, ҳатто буюк ҳофизнинг оиласида таваллуд топсангиз ҳам, барибир санъаткор бўла олмас экансиз... Нилуфар ўзининг илк бор саҳнага чиққан пайтини ёдга олар экан, қуйидагиларни гапириб берди: "Илк бор етти ёшимда саҳнага чиққанман. Онам билан "Халқлар дўстлиги”, ҳозирги "Истиқлол” санъат саройида "Шайтонга бўйсунган юраклар” қўшиғини жонли ижрода куйлаганмиз (ўшанда фонограмма деган нарса ҳали йўқ эди). Ростини айтсам, "қўшиқ айтасан” деганларида аввалига қаттиқ қўрқиб кетганман. Билмадим, жажжигина бўлганим учундир балки. Ўша концерт видеотасмасини томоша қилган бўлсангиз, қўшиқни тез-тез айтиб, тугаши билан саҳнадан югуриб чиқиб кетганим, яъни саҳнада ўзимни жудаям ноқулай сезганлигим билиниб қолган...”

 -  Ошхонада яхши бекасиз деб эшитганман.
- Тўғри эшитибсиз. Агар жиддий киришсам, антиқа овқатлар пишира оламан. Лекин афсуски, ишим туфайли ҳамиша овқат тайёрлагани вақт тополмайман.

- Аёл қачон тўкис бахтга эришади деб ўйлайсиз?
- Қачонки қаноатли бўлса. Кимдир "пулим кўп бўлса бахтлиман” деса, яна кимдир "оқ кўйлак кийсам, бахтнинг ўзи шу” деб ўйлайди. "Болам бўлса мендан бахтиёр одам йўқ” дейдиганлар ҳам кўп... Яна кимдир уй олса бахтли, кимдир қимматбаҳо тақинчоқ... Бахтнинг кўринишлари кўп. Лекин энг катта бахт бу борига шукр қилиш!
- Дуэтдошларингизнинг қай бири билан ишлаш сиз учун осонроқ кечган?
- Шу пайтгача Шоҳруххон, Шахриёр, Отабек Муталхўжаев ва Акбарлар билан дуэт қўшиқлар яратган бўлсам, ҳаммаси билан келишиб ишлаганмиз. Умуман қийинчиликлар бўлмаган. Бунинг сабабини шундай изоҳлашим мумкин: мен биргаликда дуэт куйлаганларим истеъдодли йигитлар! Шахриёрни оладиган бўлсак, ижро этадиган рэп йўналишидаги қўшиқларнинг матнини ўзи ёзади, Отабек ҳақида гап кетганида, у ҳақда энг аввало энг кўркам деб гап бошлашади. Лекин унинг нафақат ташқи кўриниши, балки овози ҳам чиройли, қолаверса, у яратадиган ижод маҳсулотларини халққа чиройли етказиб бера олади. Шоҳруххонга келадиган бўлсак, у талантнинг ўзгинаси. Хонанда бўлишидан ташқари бастакор ҳам. Кўплаб ёш истеъдодларга ашулалар ёзиб беради. Акбарнинг ҳам овози ўзига хос. Овози овозимга мос тушгани учун дуэт куйлаганмиз.
- Сиз то битта қўшиқни ёзгунингизга қадар айримлар альбом чиқаришга улгуради. Бу ҳолатдан сиқилиб қолмайсизми?
- Соғлом рақобат бор жойда ривожланиш бўлади. Ҳозирда санъатга кириб келаётганларнинг сони жуда кўп. Лекин бу майдонда ким қолишини халқимизнинг ўзи ҳал қилиб беряпти. Тўғри, битта қўшиқни узоқ вақт яратаман. Уни ёзиб, анча вақт "ҳазм” қиламан, кейин кимга аранжировкага бераману, кимга бермаслигимни ўйлагунимга қадар анча вақт ўтиб кетиб қолади. Лекин  "кимлардандир ортда қолиб кетяпман” деб ярим чала таронани мухлисларимга узата олмайман. Нега десангиз, "санъатда биринчи бўлишим керак” деган ўйдан мутлақо йироқман.
- Январ ойи ҳам охирлаб қолмоқда, нималарга улгурдингиз?
- Шу кунларда янги альбом устида ишлаяпман. Альбомга ном ҳозирча ўйлангани йўқ. Ишлар якунига етиши билан тақдимот маросимини чиройли тарзда ўтказишни режалаштирганмиз. Янги альбомимизда 5та ҳеч қаерда куйланмаган тароналарим ўрин олади. Буларнинг барчаси албатта мухлисларга туҳфа тарзида тайёрланмоқда. Альбомга янги фотосессияларим ҳам киритилади. Янги йил кириб келганидан буён 4та янги қўшиқ ёзишга улгурдим. Илтимос қилганларга 3та қўшиқ ёзиб бердим. Клип суратга оляпмиз. Лекин ҳозирча бу ҳақда кўп маълумот беролмайман, фақат шуни айтишим мумкинки, клип янги қўшиққа суратга олиняпти.
- Йилни бундай шижоат билан бошлаганингиз ривожланаётганингиз, ўсаётганингиздан дарак беради. Бу яхши. Лекин нега концерт беришга қизиқмаслигингиз бизни ҳайратга солади.
- Мен ҳали ўзимни концерт беришга тайёр деб ҳисобламайман. Аввал фундаментни мустаҳкамлаб олай-чи, бир гап бўлар. Барча ишда мукаммалликни хуш кўраман.
 - Нилуфар Усмоновадан омадли бўлиш қоидаси?
- Ота-онангиз, ёру биродарларингизга эмас, ўзингизга ишонинг! Одамнинг энг катта душмани бу – дангасалик. Бу иллатдан қутулиш осон, меҳнат қилишдан қўрқмасангиз, ўз орзуларингизга албатта эришасиз! Одамлар бор, меҳнат қилмай бирдан бойиб кетишни орзу қилади. Йўқ, бундай бўлмайди ҳеч қачон. Одам ҳар жойда меҳнати билан обрў топади.

Маълумот учун:
Мусиқадан ташқари қизиқиши: тарихий обидаларни томоша қилишни ёқтиради.
Энг катта камчилиги: дангасалик... эди. "...Бу душманимдан яқинда халос бўлдим. Меҳнат қилишни бошлаганимдан буён кўз тегмасин, ишларим яхши кетяпти”.
Фазилати: самимий, киришимли.
Севимли актёр ва актрисалари: Николь Кидман, Анжелина Жоли, Брюс Уиллис, Жонни Депп, Фаррух Соипов, Улуғбек Қодиров, Адиз Ражабов ва Шоҳруххон.
Нимага пул сарфлашга ачинмаган бўларди: кўчада қолган жониворлар учун бошпана қуришга.
Нимасиз яшай олмайди: "Аввало "Аллоҳга муҳаббатли бўлиш керак” дейишади, лекин... оиламсиз яшай олмасдим...”.
Бир қарашдан муҳаббатга ишонадими: "Ишонаман. Бир қарашдан муҳаббат бўлади. "Кўзимга ўтдек кўриниб кетди” дейишади-ю, бу ҳис-туйғулар эса бора-бора муҳаббатни пайдо қилади”.

"Дадам билан онамга Нилуфар деган исм жуда ёққани учун туғилишим билан дадам "Бўлди, Нилуфар қўямиз исмини” деган экан. Бувим, яъни дадамнинг оналари эса "Агар қиз набирали бўлсам, исмини Малика қўяман” деб ният қилиб юрганлар. Лекин дадамнинг хоҳишлари билан Нилуфар бўлганман. Исмим ўзимга ёқади, уни ўзгартириш фикри хаёлимга ҳам келмаган...”

P.S: Нилуфар Усмонова ҳақида кейинги пайтларда  "у овозини компьютерда ўзгартириб қўшиқ куйлаётганмиш”, "қўшиқларини ўрнига онаси куйлаб бераётганмиш” қабилидаги миш-мишлар тарқала бошлади. Мазкур гап-сўзларга чек қўйиш учун Нилуфар бир эмас, иккита тарона: яъни "Армонли муҳаббат” ва онасининг "Бегонанг” қўшиғини жонли ижрода, ҳеч қандай компьютер аралашувисиз ва микрофонсиз куйлаб берди. Нилуфарнинг овози оддий қўл телефонига ёзиб олинган. Сиз уни бемалол sayyod.com сайтида тинглашингиз мумкин.

Суҳбатдош Гавҳар Раҳматова.