Меҳмонлардан эса Илҳом Шомуродов ва Жасур Бобоевлар жароҳат олганликлари боис, майдонга тушолмасдилар.
Қаршиликлар «бронза» учун кураш олиб бораётган бўлишса, майдон эгалари турнир жадвалининг қуйи - «хавфли зона»сидан узоқлашишга ҳаракат қилиш­япти. Бундай принципиал ўйинларда одатда ягона гол ўйин тақдирини ҳал қилади. Бу сафар ҳам шундай бўлди. «Машъал»да тўп сурган кезлари Наманганда бўлиб ўтган ўйин­ларда кўп маротаба мезбонларни ранжитишга муваффақ бўлган Рустам Қодиров учрашув қаҳрамонига айланди. У захирадан майдонга тушганлигига қарамай, юзага келган имкониятни қўлдан бой бермади. Рустам тўп киритган вазиятда «Навбаҳор» ҳимоячилари ва дарвозабон Ботир Носиров бир-бирларини тушунишмади. Бундан Қодиров усталик билан фойдаланиб, жамоасини ҳисобда олдинга олиб чиқди.
Учрашув давомида майдон эгаларидан Темур Султонов, Носир Отақўзиев, Алишер Маҳмудов, Дилшод Жабборов, Илҳом Бойдедаев, меҳмонлардан эса Баҳодир Пардаев, Артём Филипосян, Сергей Кротларда қулай вазиятлар юзага келди. Аммо уларнинг сўнгги зарбаларига аниқлик етишмади. Учрашувнинг 50-дақиқасида Баҳодир Пардаев томонидан урилган гол эса, ҳужумчи ўйиндан ташқари ҳолатда қолганлиги сабабли инобатга олинмади.
Ушбу ғалабадан сўнг «Насаф» ўз мавқеини мустаҳкамлаб олган бўлса, «Навбаҳор» бир поғона пастлади. Энг ачинарлиси, наманганликлар етти ўйиндан буён гол ура олишмаяпти. Бу омадсизлик қачонгача давом этаркин-а?

Мустафо Байрамов («Навбаҳор» бош мураббийи): - Шогирдларимнинг ғалабага иштиёқлари кучли эди. Негаки, анчадан буён жамоамиз ютуққа ташна. Ушбу баҳсда йигитлар бунга эришиш учун қўлларидан келганча ҳаракат қилиб, рақиб дарвозаси олдида бир неча хавфли вазиятларни юзага келтиришди. Аммо худди сеҳрлаб қўйилгандек, тўп дарвозадан жой олмади.
«Насаф» бронза медали учун курашаётган кучли жамоа. Клубнинг ҳар бир чизиғи яхши шаклланган. Таркибидаги футболчилар аввалги мавсумларда «Машъал» сафида бирга тўп суришгани учун бир-бирларини яхши тушунишади, барқарор ўйин намо­йиш этишади.
Аслида Қаршида бўлган биринчи давра баҳсида бугунгидан кўра, яхшироқ ўйин кўрсатгандик. Бу гал эса ҳаракатларимиз унчалик қовушмади.
Жамоамиз етти учрашувдан буён рақиб дарвозасини ишғол қилолмаяпти. Сабаби, бизда тўпурар ҳужумчи йўқ. Футболчилар билан машғулотларда бунинг устида қаттиқ иш олиб боряпмиз. Йигитлар ҳам гол уришга интилишяпти. Бироқ...
Биринчи даврадан сўнг жамоамизни асосий таркибнинг саккиз нафар аъзоси тарк этди. Уларнинг ўрнини тўлдириш учун ўринбосарлар сафидан бир қатор футболчиларни бош жамоага жалб этдик. Аммо уларда бироз тажриба етишмаяпти. Айрим ўйинчилар эса жароҳатланган. Бир сўз билан айтганда, захира ўриндиғимиз қисқа. Бу албатта, ўйинларимизга салбий таъсир кўрсатмоқда.    
- Жамоадаги молиявий муаммолар ҳал этиляптими?
- Албатта. Хабарингиз бор, жамоа раҳбариятида ўзгариш юз берди. Клубимизнинг янги президенти Ҳакимжон ака Ҳошимовнинг саъй-ҳаракати билан маошларимизнинг бир қисмини олдик. Клуб раҳбарлари яқин кунларда барча футболчилар билан тўлиқ ҳисоб-китоб қилишга ваъда беришди.
- «Навбаҳор» ҳозирги қийин вазиятдан чиқиб кетишга қодирми? 
- Ҳа. Ҳали олдинда яна бешта ўйин бор. Уларда ижобий натижаларни қайд этишга ҳаракат қиламиз. Ишонтириб айтаманки, жорий мавсумда клубимиз олий лигадан тушиб кетмайди ва мавсумни 10 ёки 11-ўринда якунлаймиз. Фақат мухлислардан шундай қийин вазиятда жамоамизни қўллаб-қувватлаб туришларини илтимос қилардим. Кейинги ўйинларда уларнинг ишончларини оқлашга интиламиз. 

Виктор Кумиков («Насаф» бош мураббийи): - Намангандаги учрашув рақиб жамоалар учун доимо қийин кечган. Бугун ҳар икки клубда ҳам гол уриш учун имкониятлар юзага келди. Аммо биз кўпроқ ҳудудий устунликка эришдик. Бундан ташқари, хавфли вазиятлар ҳам майдон эгаларига қараганда, бизда кўпроқ бўлди. Улардан биттасини голга айлантириб, муҳим уч очкони қўлга киритдик. Олдимизга ушбу ўйинда ғалаба қозониш вазифаси қўйилганди. Бу мақсадимизга эришдик.
- Ушбу ғалабадан сўнг «Насаф»нинг 3-ўринни эгаллаш имконияти ошдими? 
- Ҳар бир ютуқдан кейин клубимиз «бронза»га яқинлашяпти. Аммо бу ҳақда гапиришга ҳали эрта. Барчасини асосий рақобатчиларимиз - «Нефтчи» ва «Локомотив» клубларига қарши кечадиган учрашувлар ҳал қилади. Асосийси, ҳаммаси ўз қўлимизда.