Shu yilning 1-iyun kuni Microsoft korporatsiyasi o‘zining yangi Windows 8 operatsion tizimini namoyish qildi. Bu haqda kompaniyaning rasmiy saytida e’lon qilingan.

Butun dunyoga mashhur operatsion tizimning yangi versiyasi nafaqat x86 kompyuter arxitekturasida, balki ARM mobil chiplarida ham ishlaydi. Windows platformasining yetakchi dasturchisi Stiven Sinofskining (Steven Sinofsky) so‘zlariga ko‘ra, endilikda Windows 8 operatsion tizimi vositasida planshet kompyuterlar uchun ishlab chiqarilgan ilova-dasturlar oddiy kompyuterlarda ham ishlaydi va ularni sichqoncha hamda klaviaturada boshqarish imkoniyati paydo bo‘ldi.

Yana shuni ham aytib o‘tish joizki, Windows 8 – hozircha yangi operatsion tizimning kodli nomidir. Pirovardida, operatsion tizim bozorga qanday nom bilan chiqarilishi haqida hanuz biror ma’lumot mavjud emas.

Yangi operatsion tizimning interfeysi hozirgi kundagi Windows 7 dan keskin farq qiladi. Masalan, "Boshlash” ("Пуск”) menyusi o‘rniga ekrandagi ilova-dasturlarning vidjetlari ishlatiladi. Bu xususiyat Windows Phone 7 mobil operatsion tizimida ham mavjud.

Yangi operatsion tizimda ikki turdagi dasturlardan foydalanish mumkin: odatiy Windows-dasturlar va ilova-dasturlar; HTML5 va JavaScript yordamida ishlab chiqilgan dasturlar. Windows 8 operatsion tizimiga yangi Internet Explorer 10 brauzeri o‘rnatilgan bo‘ladi.

Yangi operatsion tizimning sotuvga chiqarilish vaqti hali noma’lum. Biroq, Microsoft korporatsiyasi o‘zining platformasini har ikki-uch yilda yangilashini ma’lum qilganligini hisobga olsak, Windows 8 ning 2012-yilda reliz qilinishi kutilmoqda.

infoman.uz