|
"МЕН БУ МЕН". ЮБИЛЕЙ ФИЛЬМ ТОМОШАБИНЛАР ИШОНЧИНИ ҚОЗОНА ОЛАДИМИ?
Рустам Саъдиев ҳақида ортиқча таъриф керак эмас. Унинг яратган барча фильмлари ҳамиша омма томонидан катта қизиқиш билан қарши олинади. "Муҳаббат синовлари”, "Наҳотки сен”, "Кўзларинг маъюс”, "Келгинди келин”, "Келгинди куёв”, "Паноҳ”, "Йиғламагин” каби фильмларининг томошобини бугунги кунда, таъбир жоиз бўлса, ҳар бир ўзбек хонодонида топилади. Режиссёр бугун биринчи рақамли даражасини ҳам олгани бежизга эмас. Саъдиевнинг узоқ фурсат давомида, энг юқори бюджетли янги фильм яратгани ҳақидаги шов-шувлар бошланди. Биз эса ҳаммасига ойдинлик киритиш мақсадида режиссёрни суҳбатга чорладик. -"Мен бу мен” – юбилей фильмингиз. Фильмингиз оммалашишидан умидингиз катта бўлса керак? -Албатта. -Нега янги қиёфаларни жалб этдингиз. Агар, бир хилликдан воз кечиш учун қилинган ҳаракат десак, нур устига аъло нур. Бироқ, кенг оммани янги актёрлар билан жалб этиш қийин-ку? -Менинг ижодимда янги қиёфаларни халқ эътиборига ҳавола этиш анъана бўлиб қолган. Шу пайтгача халқ ёмон қабул қилмаган. Назаримда, бу кинокартинамдаги янги чеҳралар ҳам томошабинларга анча маъқул келади. Ўзбек киноси машҳурлари орасида уларнинг саҳифаси ҳам очилади. Оммага қандай фильм тақдим этилмасин, актёрлар қай даражада таниқли ё бўлмасин, муҳими, яхши ижро бўлса бўлди. -Кимларни "мен кашф этдим” деб ҳисоблайсиз? -Бу саволга актёрларнинг ўзи жавоб берса тўғри бўлган бўларди. Мен жавоб берсам нокамтарлик бўлади. Томошабинлар ҳам жўяли жавоб беради. Ўйлайманки, Фаррух Сойипов, Дилноза Кубаева кабиларнинг танилишида мен яратган фильмларнинг ҳиссаси бор. Мушоҳада юритсак, машҳур ва таниқли актрёрлар фарқланади. Таниқли деган сифат ҳақида яхшигина хулосамиз бор. Машҳур деганда эса, томошабин қалбини ёриб кирадиган роллар ижро этиб рейтингни забт этганлар тушунилади. Назаримда, кинода экспримент қилишдан қўрқиш керак эмас. Фильмда янги қиёфаларни, ёш истеъдодларни кўрсатиш ҳар доим қизиқарли. Тўртта актёрга ёпишиб қолиш керак эмас. Ижодкорнинг ҳаётида бемалоллик ҳукм сурса, яхшиликка олиб келмайди. Таниқли актёрларга ёпишсак, уларнинг машҳурлигига ҳам ишониб қоламиз. Ҳеч ким танимайдиган қиёфаларни танитиш саволига жавоб топиш учун режиссёрлар куйиб пишади. -Ҳозирги кино оламидаги мутлақ жадаллашув жараёни ҳамда бу қадар тез орада кўп фильмлар яратилишига нима сабаб деб ўйлайсиз? -Чунки, ўзбек киносига бўлган эътибор ортиб боряпти. Кино олами тадбиркорларни ҳам қизиқтириб қўйган. Ачинарлиси эса, ўзини режиссёр деб биладиган сохта режиссёрларга алданиб пул бераётган тадбиркорнинг кўпи алданиб қоляпти. Ҳозирги кунда биринчи вазиятда профессионал режиссёр кино санъатини, саноатини ҳамда бозори талабини жуда яхши билади. Бу учта позицияни билмаганлар эса инқирозга учрайди. Тўйхоналар кўпайяпти. Ўзбек ҳамиша дастурхонли халқ. Айрим тўйхона қурмоқчи бўлганлар кинотеатр қуриш режаси ҳам бўлганида ҳақиқий миллий фильмларимиз халқнинг қон-қонига сингишига ҳиссасини қўшган бўларди. -Юқорида санаб ўтган учта позициядаги қайси ҳамкасбларингизни биласиз? - Мирмақсуд Охунов, Абдувохид Ғаниев, Аюб Шаҳобиддинов, Акбар Бектурдиев кабилар ҳозирги кинобозорнинг шиддатига чидаб келишяпти. -Нега айнан ўнинчи фильмингизни илмий фантастик жанрда суратга олдингиз? -Чунки, кинога янгилик олиб киришни анъана қилиб олганман. Бу қийинчиликни енгиб ўтиш муаммо. Бироқ, ҳар бир соҳани ўз эгалари ўзгартиради. Буни фақат тушунадиган одам қила олади. Киномизда оз бўлса-да, ўзишга бир қадам бўлсин, деб шу фильмга қўл урдим. -Янги кинокартиналардан қай бирига муносиб баҳо берасиз? -"Ўзимдан ўзимгача”, "Жаноб ҳеч ким”, "Пойма-пой”, "Сўнгги лаҳза”. -Айни пайтда яхши фильмлар яратилиши учун қандай тўсиқлар бор? -Ҳеч қанақа тўсиқлар йўқ. Лекин яхши маънодаги кўрсатмалар бор. Юксак маънавиятимиз, ёшларимиз онгига салбий таъсир кўрсатадиган вазиятлардан чекланиш ҳақида қайғуришади.. -"Мен бу мен” орқали томошабинларга нималар демоқчисиз? -Ҳар бир инсоннинг "мен” деган тушунчаси бор. Ҳар бир инсонда эса аслида иккита "мен” яшайди. Бироқ бу тушунчалар ҳамиша курашади. Яъни, нафс ва иймон орасидаги кураш. Томошабинларимиз яхши ибрат олади, деган умиддаман. Қолгани томошабинлар ҳукмига ҳавола. Бу мураккаб фильм. Ёшларимиз дунёқарашини яхши томонга ўзгаришига хизмат қилади, деган умиддаман. -Каран Жоҳарнинг фильмларида Шохрух Хонниг кўришга кўникиб қолишган. Улуғбек Қодиров ва Фаррух Сойиповларни Рустам Саъдиевнинг фильмларисиз тасввур қила олмайдиганлар ҳам талай... -Менинг номимни бу икки актёр номи билан боғлашларини истамайман. Ўз ўрнимни топишим улар билан ҳамкорлигим билан боғлиқ эмас. Фильмда ким рол ижро этишидан қатъий назар, аввало, фильм моҳияти халққа қизиқарли бўлиши керак. Улуғбек ва Фаррухни яхши кўраман. Мен учун уларнинг истеъдоди бирдек. Уларга ўхшаб ичида олови бор йигитлар кези келиб пайдо бўлишига ишонаман. Бир томондан ўйлаб қарасангиз, томошабин олдида уларни соғинтириб ҳам туриш керак. -Қайси актёрларни фильмингизда рол ижро этишини чин дилдан истайсиз? -Евгений Миронов, Сергей Безруков, Беҳзод Муҳаммадкаримов, Ёқуб Аҳмедов, Убайдулла Омон, Брэд Питт, Жерар Депардье, Амитабх Баччан, Карина Капур, Шохрух Хон. -Актриса Диана Ягофаровани ҳам бирон фильмингизга таклиф этишингиз ниятингиз бор экан? -Бир пайтлар бўлган. Энди йўқ. -Нега? -Бу саволга жавоб беришнинг ҳожати ҳам бўлмаса керак. Бироқ, Дилноза Кубаевани яна суратга олиш ниятмим бор. -"Мен бу мен” фильми яратилишидаги энг қийин жараён? -Махсус технологик вазиятлардан ташкил топган эпизодларни суратга олиш. -Дунё кинематографиясида сизни ҳануз ҳайратга соладиган картина? -"Россиюмон”, "Кабирий кечалари” -Рустам Саъдиев ижодига чеккада туриб бир баҳо беринг-чи? -Ҳали ўз устида кўп ишлаши керак. Ҳали у қиладиган иши кўп! Ҳақиқий киноасарлар у учун энди келади. -Қайси таъриф сизга кўпроқ яқинроқ: "фильмлари оммабоп”, "у ёмон режиссёр эмас”, "ўзбек киносида унга рақиб йўқ”, "no comment…” -Ўзига хос, ҳеч кимга ўхшамайдиган услубга эга! P/S: Дарвоқе, 4-5 декабр кунлари "Мен бу мен” фильмининг премъераси бўлиб ўтади. Энг юқори бюджетли фильмни энг биринчи томошабини бўлишни истайсизми? Сайтимиз мухлисларида бундай имконият мавжуд! Бунинг биргина шарти сайтимизнинг виждонан ашаддий мухлиси бўлсангиз, кифоя! Jasur6666@mail.ru манзилига ўзингиз ҳақингизда маълумот ва телефон рақамингизни юборинг! Сизга икки кишилик махсус таклифнома тақдим этилади! JASUR HAMROYEV
|
