Бўйи паст қўллари кичкина аёлларга ингичка бир ёки бир нечта майда тошли узуклар мос келади: агар узук йирик бўлса, тоши чўзинчоқ ингичка шаклда бўлиши лозим. Тирноқ томонга ингичкалашиб кетган овал шаклидаги ёки нок кўринишидаги кўзларга эга узуклар бармоқларни визуал узун ва нозик қилиб кўрсатади. Қизлар ва ёш аёлларга унчалик катта бўлмаган битта тошли узукларни тақиш тавсия этилади. Ўрта ёшли аёлларга эса йирикроқ тошли ёки кўплаб майда тошлари бор узуклар мос келади. Иккитадан кўп узук тақишга ҳожат йўқ. Йирик ва кенг узуклар бармоқлари калта ва йўғон қўлларда ҳаддан ташқари оғир кўринади.

 

 

Дўмбоқ ва юзи катта аёлларга ҳамда кўзойнак тақадиган аёлларга шокилали ҳамда катта думалоқ зиракларни тақиш тавсия этилмайди. Бундай зираклар кўпроқ юз тузилиши чўзинчоқ ёш ва ўрта ёшли аёлларга ярашади. Кичкина япалоқ зираклар думалоқ юзли аёлларга мос келади. Ёш қизларга эса катта зираклар умуман тўғри келмайди.

 

Билагузуклар

 

Билагузукларни одатда ўнг қўлга тақишади. Тош кўзли билагузуклар қўлга ёпишиб туриши керак, тошсиз обруч ёки занжир кўринишидаги билагузуклар эса қўл панжаси ёнида эркин туриши лозим. Иккала қўлга ҳам фақат жуфт билагузуклар тақилади. Нозик билакни бежирим билагузуклар тўплами чиройли қилиб кўрсатади. Қўллари йўғон аёлларга эса бундай безак ярашмайди, у диққатни эътибор жалб қилиниши керак бўлмаган жойга тортади.

Зеб-зийнатлар ўз мавсуми ва вақтига эга. Ёз ойларида ёйилиб турадиган юбкалар, пахта ва зиғир матосидан тикилган блузкалар билан ёрқин ранглардаги мунчоқлар ва хира шиша, керамика ва пластмассадан ясалган билагузукларни тақиш мақсадга мувофиқдир.

 

 

Думалоқ юзга қиррали, мураккаб шакл ва кўзга ташланадиган рангдаги кўзойнак гардишлари мос келади; учбурчак ёки квадрат шаклдаги юзларни думалоқ ёки овал шаклидаги гардишлар бироз юмшатади.

Агар юз тузилишингиз квадрат шаклида ёки ёноқларингиз туртиб чиққан бўлса, жуда кичкина ёки энсиз кўзойнакларни сотиб олманг, улар юз тузилишингизни бироз оғирроқ қилиб кўрсатади. Йирик гардишли кўзойнаклар ҳам сизга тўғри келмайди.

Кўзойнак гардишининг туташтирувчи жойига эътибор қилинг.

· Агар бурнингиз узун бўлса, у юқорироқда жойлашган бўлиши керак.

· Аксинча, агар гардишнинг туташтирувчи жойи пастроқда жойлашган бўлса, у калта бурунни узунроқ қилиб кўрсатади.

· Шаффоф рангли туташтиргич бир-бирига яқин жойлашган кўзлар орасидаги масофани «очади», агар кўзлар бир-биридан узоқда жойлашган бўлса, туташтиргич тўқ рангда ва кенг бўлиши керак.

Кўзойнак шишасининг ранги гардишиники каби сочингиз, терингиз ва кўзларингиз рангига мос келиши лозим. Асосий қоида ранглар контрастига амал қилиш, чунки сарғиш-жигар ранглар ҳаммагаям ярашавермайди. Улар юзга хорғинлик ва ҳатто касалманд кўринишни бериши мумкин.

 

 

Ким нима дейишидан қатъи назар, барибир сумка билан пойабзалнинг ранги бир-бирига мос келиши лозим. Аммо бу улар бир хил рангда бўлиши керак, дегани эмас. Масалан, сариқ рангли сумкачага платформаси тўқ тилла рангда бўлган жигар ранг-қизғиш рангли пойабзални танлаган маъқул. Оч кул ранг сумкача билан эса худди шу рангдаги безак элементларига эга туфли жуда мос тушади. Ҳозир жуда урф бўлган бинафша ранг сумка ва пойабзални бир-биридан бир неча тон фарқ қиладиганларини танлаган маъқул.

Аёлларникидан фарқли ўлароқ эркаклар жинсиси образнинг унчалик ёрқин ва мустақил детали ҳисобланмайди. Эркаклар жинси шимининг етарли даражадаги оддий бичими ва фурнитуранинг йўқлиги шундан далолат беради. Эркаклар жинси шими – бу замонавий эркакнинг асосий буюмларидан бири бўлиб, у кишини ўзига тортмаслиги, аммо шу билан бирга сиз истаётган образни яратиши лозим. Жинсиларнинг услуби турли-туман бўлиши мумкин, аммо асосийси шим сиз учун иложи борича қулай бўлиши шарт.

 

Ушбу мавсумда турли услуб, бичим ва ранглардаги жинси шимлар урф бўлган.
Классикани ёқтирувчиларга бичими тўғри жинсилар (normal, regular) ёқиши шубҳасиз. Бундай жинси шимларни истаганча кийиш мумкин бўлиб, агар ранглар гаммаси тўғри танланса, ишбилармон киши образини ажойиб тарзда тўлдиради. Бичими тўғри тушган жинси шимлар туфли билан кийиладиган ягона жинси бўлса, ажабмас. Жинсидаги ишқаланиб шилинганлик ва стиллаштирилган узуқ-юлуқ қисмлар уларнинг одмилигига янада урғу беради.

 

Бу йилги мавсумда bootcut жинси шимлари ўз ўрнини бошқаларига бўшатиб берган бўлса-да, уларни кийишни ҳеч ким ман этгани йўқ. Пасти бироз кенгайиб кетган бундай жинсилар унинг соҳибини хушбичим қилиб кўрсатади ва кундалик кийиш учун жуда қулай.

 

 Slim fit модели ўзининг оригинал тор бичими билан фарқ қилади. Бу жинсилар эркаклар модасидаги ҳақиқий инқилоб бўлиб, классик услубдаги жинси шимларнинг буткул аксидир. Slim fit шими casual услубидаги зиғир толали матодан тикилган пиджаклар билан жуда мос тушади. Баданга ёпишиб турадиган шим қулайроқ бўлиши учун ишлаб чиқарувчилар денимга стрейч ҳам қўшишган. Тор жинси шимлар ўз танасига эътибор қаратишдан чўчимайдиган хушбичим йигитларга жуда ярашади.