"Реал" клубининг ярим ҳимоячиси Криштиану Роналдунинг фикрича, ҳозирда каталонияликлар "Қироллик клуб"дан кучли ўйин намойиш қилишаётган экан. Португалия термаси етакчисининг гапларига қараганда, бу йил Европанинг энг яхши футболчиси унвонига Месси сазовор бўлади.
"Ҳозирда "Барселона" биздан кўра кучли. Буни тан олиш керак. Нега шундай? Чунки, каталонияликлар бу таркиб билан анчадан бери ўйнаб келмоқда. "Реал"га келсак, мавсум оралиғида бизда деярли янги жамоа шаклланди. Биз майдонда бир-биримизга унчалик ҳам кўникиб кетмадик. Лекин, кўрамиз мавсум охирида ким яхши натижани қайд этаркин", - дейди Reuters ахборот агентлиги 24-ёшлик футболчи сўзларидан парча келтириб.
Бунга қўшимча қилиб Роналду шундай деди: "Месси ажойиб ўйинчи, у шу йил "Олтин тўп" совринини ҳам қўлга киритса керак".
