Жорий ҳаётида ҳам бирор нарсага эришишга интилган одамларни бой бўлиш йўллари қизиқтириши табиий. Ахир орамизда ким ҳам бадавлат бўлишни хоҳламайди, дейсиз. Фоний дунё ўз ўрнида, лекин бу дунёда ҳам маълум даражада баланд дорга осилишдан бош тортмаймиз. Ахир бой бўлиш гуноҳ эмас-ку. Муҳими, қонунга хилоф иш қилинмаса бўлгани. Хўш, қандай одамлар катта даромад топиши мумкин экан?

Американинг тадбиркорликка бaғишланган нуфузли Forbes журнали сайёранинг барча бадавлат одамларини бирлаштирадиган учта асосий омилни кўрсатди. Муваффақият сирларини очиб бериш учун нашр ўнлаб миллиардер ва мультимиллионерни сўроққа тутди.

«Ҳақиқий бой одамларнинг биринчи сири шундаки, улар омадсизликка учрашдан қўрқишмайди», - деб ёзади журнал. Нашр маълумотларига қараганда, бойнинг асосий фазилати умуман хатога йўл қўймасликда эмас, балки қилган хатоларидан тўғри хулоса чиқаришдадир. Ҳар бир миллиардер ҳеч бўлмаса бир марта ишига салбий таъсир қиладиган қарор чиқарган, лекин бунда албатта ноўрин ишларидан сабоқ олган. «Хатолардан тўғри хулоса чиқариш зарур» - бу жаҳон магнатларига хос бўлган ҳикмат. Ақлли одам ўз хатоларидан ўрганса, доно одам бировларнинг хатосидан сабоқ олишини ҳам унутманг.

«Асл бойларнинг иккинчи сири шундаки, улар янги даромад келтирадиган муаммоларга креатив назар ташлашади», - деб таъкидлайди Forbes. Ҳақиқатан ҳам, жаҳон бизнеси акулалари эришган ютуқлари билан кифояланмай, натижаларига танқидий муносабатда бўлишади ва иложи борича кўпроқ муваффақият қозонишга интилишади.

Сайёрамиз миллиардер ва мультимиллионерларнинг учинчи сири сифатида журнал турмуш ўртоғини тўғри танлай билиш деб кўрсатди. Бахтли никоҳ бой меросхўрларни излаш билан кифояланмайди, албатта. Лекин танланган аёл бадавлат бўлса нур устига аъло нурдир. «Сени қўллаб-қувватлайдиган ва, энг муҳими, муваффақият сари одимлаб кетишингга қатъий ишонадиган рафиқа топиш жуда зарурдир», - дейди нуфузли ва таниқли журнал. Бунда ўз маблағини ўзи топган, биринчи авлод бойлари учун тўғри турмуш қуриш ўзига хос пойдевор бўлиб хизмат қиладиган асосий шартлардан бири сифатида кўрсатилади.