Май ойининг охирида Нодавлат Телекомпаниялар Телетармоғи (НТТ) орқали «Омад ва бахт» номли телесериал намойиш этила бошлади. Айтиш жоизки, сериал 2005-2006 йилларда Ҳиндистоннинг энг машҳур телеканалларидан бири ZeeTVда эфирга узатилган бўлиб, ҳинд телетомошабинларининг муҳаббатини қозонди.

Шундан сўнг сериал бошқа давлатлар телеканаллари дастурларидан жой олди. Телесериалда Кулраж Рандхава, Судхир Пандей, Вандана Гупта, Атул Шри, Шарокх Баручалар билан бир қаторда Шоҳруҳхон, Абҳишек Баччан ҳамда Приянка Чопра каби ҳинд киноси юлдузлари рол ижро этишган.
Телесериал асосан ёш телетомошабинлар оммасига мўлжалланган комедия жанрида бўлиб, уни ҳеч иккиланмасдан бутун оила билан томоша қилиш мумкин. Бош қаҳрамон Карина ўз уйидан онасининг қаршиликларига қарамасдан Мумбайдек катта шаҳарга иш қидириб йўл олади ва у ерда ўз ўрнини топишга ҳаракат қилади. Шаҳарда яшовчи инсонларнинг бегона бир қизга кўрсатган ғамхўрликлари ёки аксинча унинг муваффақиятларини кўролмасдан қизнинг йўлига тўғаноқ бўлувчиларнинг турли ғийбат ва иғволари, Каринанинг Мумбайдаги қизиқарли саргузаштлари – буларнинг ҳеч бири томошабинни бефарқ қолдирмайди. Зеро, бугунги кунда ҳаётимизда бундай тақдирга эга инсонлар ҳаётимизда учраб туради. Бу ҳолатлар биз учун таниш...



Кулраж Каун Рандхава 1983 йилнинг 16 май санасида Ҳиндистоннинг Деҳродун шаҳарчасида дунёга келган. Ҳозирги кунда энг кўзга кўринган ёш ҳинд актрисаларидан бири саналади. Кулраж шу кунга қадар "Kaринанинг саргузаштлари»дан ташқари яна тўртта сериалларда роль ўйнаган. Актриса модел сифатида ҳам фаолият юритади.

Дарвоқе...
НТТ канали ижодкорларининг гапларига қараганда, ушбу сериал ҳинд киноижодкорлари томонидан тақдим этилган ўнга яқин сериаллар ичидан танлаб олинган. Саралашда телесериалнинг Ҳиндистон ҳамда бошқа давлатларда эфирга узатилган вақтдаги рейтинги, телетомошабинларнинг фикр-мулоҳазалари инобатга олинган.
Карина ҳақида яна нима дейиш мумкин? Карина аслида ёлғон гапиришни хуш кўрмайди, аммо шароит, вазият тақозоси уни шунга мажбур қилади. Қаҳрамонимиз «ёлғон агар яхшиликка хизмат қилса, ундан фойдаланиш мумкин» деб ўйлайди. Шуни алоҳида таъкидлаш зарурки, сериал ғояси ёлғон гапиришни, бировларни ўз фойдаси учун алдашни тарғиб қилмайди. Карина гапирган ёлғонлари натижасида кўп марта панд ейди. У ёлғоннинг умри қисқа эканлигини тушуниб етади.
Телесериал ҳақида жуда кўп гапириш, қизиқарли маълумотларни келтириш мумкин, келинг, яхшиси, уни НТТ каналида душанбадан жумагача соат 21:00да кузатиб борамиз. Унутманг, сериал энди бошланди, шу сабабли «кеч қолдим» деб хавотирга тушманг, воқеалар ривожи айни авж палласига яқинлашмоқда.
Сериал ҳақида фикр-мулоҳазаларингизни serial@ntt.uz электрон почтасида қолдиришингиз мумкин.