 Сардор Раҳимхон ижод уммонига шўнғиган. Юртбошимизга унвонни олиш чоғида берган ваъдасига дилдан садоқат билан ёндашган ҳолда, санъатимиз боғида янги-янги истеъдод ниҳолларини унишига хизмат қилиш тараддудини бошлаб юборди. Бир неча ойлар илгари "New Star” продюсерлик марказини ташкил қилган хонанда тўртта янги лойиҳани юзага чиқариш учун тинимсиз ҳаракат қиляпти. Ҳумоюн Мирзо, "Баён” гуруҳи, Дилсўз ва Жаъфар ушбу марказнинг илк юлдузчаларидир! Хонанда нега айнан продюсерликка қўл урди? -Шу соҳани жуда яхшши тушунаман ва биламан. Бир пайтлар айнан продюсерлик марказини очиш орзуим эди. Ҳамиша ёшларимиз бошини силаётган муҳтарам Президентимиз билан юзма-юз учрашиш бахти насиб этган кун, яъни унвон топширилган маҳалда менга янада катта масъулият юкланганлигини ҳис этдим. Шундай экан, бошқа иқтидорли ёшларга кўмак бериш, уларнинг истеъдодларни юзага чиқаришда бошу қош бўлишни фарзим деб биламан. Дарвоқе, Сардор Раҳимхон ўз ижодини ҳам унутиб қўйганича йўқ. Унинг бирйўла иккита клипи тайёр. "Ёр-ёр”га Рустам Муродов, Мирмақсуд Охуновлар, "Акангга боқ”қа Сарвар Исаев клип суратга олди. "Акангга боқ” клипи сюжетли сценарий асосида яратилиб, бир неча таниқли инсонлар суратга тушди: Паризода, Адиз Ражабов, Шукрулло Исроилов, Зуҳра Солиева...Хонанданинг эътирофича, клип томошабинларга баҳорий кайфият улашади! Жасур ҲАМРОЕВ
|
