|
Актёр ёки актриса бўлиш осон, лекин элга севимли бўлиш қийин.
Режиссёр бўлиш осон, лекин элнинг юрагидан жой оладиган фильм суратга олиш қийин.
Журналист бўлиш ҳам балки осондир, лекин фикрларни келтириб ёзиш қийин.
Шунингдек, касб танлаш осон, лекин ўша касбда ном қозониш қийин.
Яқинда шоубизнес оламидаги бир дўстим билан суҳбатлашиб қолдим. У
эса фильмига актёр ва актриса қидираётганлигини айтди. "Ҳаммаёқда актёр
ва актриса кўпайиб кетди дейишади” – деди у. "Лекин фильмга суратга
олиш учун қидирсам, ролга мос тушадиганини топиш қийин бўляпти. Ноилож,
санъат институтини тугатган ёшлар ичидан ролга мосларини тополмагач,
бошқа соҳада таҳсил олаётганларга мурожаат қилишимга тўғри келяпти. Яна
актёр ва актриса кўпайиб кетди дейишгани–чи?”
Шу ўринда савол туғилади, бошқа касб эгалари камми? Масалан, йилига
қанчалаб талабалар шифокорлик, юристлик, менежерлик, таржимонлик каби
соҳалар бўйича таҳсил оладилар. Лекин, улардан қанчаси ўз соҳасининг
мукаммал билимдонига айланади?
Санъат соҳасида ҳам худди шундай менимча. Йилига қанчалаб талабалар
санъат институтини режиссёрлик, актёр ва актрисалик мутахассислиги
бўйича тамомлайдилар. Лекин, улардан қанчаси чинакамига яхши режиссёр
ёки элга таниқли актёр ва актриса бўлиб етишади, буни вақт кўрсатади
назаримда.
Шунингдек, касб танлаш ҳам муаммо эмас, лекин ўша касбни сирларини
чуқур ўрганиб, ўша касб бўйича профессионал даражага эришиш, ўз хато ва
камчиликларини англаш, ўша касб бўйича танқидларни тўғри қабул қилиш ва
инсоний фазилатларни ўзида сақлаб қолган ҳолда, ўша касбнинг мукаммал
эгасига айланиш осон эмас менимча.
Шундай экан, шоубизнес оламида ҳам, бошқа касбда ҳам юлдуз ясаш осон, лекин уни осмонга илиб қўйиш қийин.
Феруза Фаттохова
| 
