"Nimaga, ne uchun?" degan o`y, savol
Qalbimdan bir umr ketmasa kerak.
Sog`inchlar og`rig`i kelmoqda malol,
Shuncha yukni qanday ko`tarding, yurak?
Andisha atadim ko`nglim otini,
Sodda deb kuldilar, bilmadim, nega?
Odam yashar ekan, nur hayotini
Bezamasin, deyman, zarra ham chega.
Yurak nogoh chil-chil bo`lib sinmasin,
Sopoldan yaralgan piyola kabi.
Hazrati inson dard nima bilmasin,
Qatiqni puflamay sipqorsin labi.
Borar manzilimiz bitta joydir, do`st,
Egningga ilmagil kiborlik libos.
G`aribning kamiga, qani, koring qo`sh,
Yashaylik bir umr insonlarga xos.
Umr bu - daryodir, chayqalib tinar,
Kecha ko`rgan kishing bugun bo`lmaydi.
Hayot ulkan sinov - bizlarni sinar,
Mehring biroz to`kkin, ado bo`lmaydi,
Toki, qalb sinmasin seni deb sira,
Chegalansa bo`lar, darzi qoladi.
Suhbatingdan ko`ngil bo`lmasin xira,
Odamning taftini odam oladi...
Umr shirin o`tsin, mazali, ta`mli,
Yashamaylik siniq piyola kabi...