— Келинг, бу ҳақда гаплашмайлик. Шахсий ҳаёт ҳақида умуман гапиргим йўқ.
— Демак, Алишер шахсий ҳаётга алоқадор?
— Биласизми... ҳали ҳеч нарса аниқ эмас. Гап-сўз нимадан чиққанини билмайман. Бир фильмда Алишер билан роль ижро этдик. Кейин вилоятларга чиқиш қилиб, суҳбатлашиб қолдик. Билмасам, четдан кўрганлар учун муносабатларимиз гап-сўзга сабаб бўлди, шекилли...
— "Шахсий ҳаёт ҳақида гапиргим йўқ", деб ўзингиз тилингиздан илиндингиз?
— Биз ҳали бир қарорга келмаганмиз. Айтарли муносабат ҳам йўқ. Муносабат деб аташ сал жиддийроқ бўлса керак.
Суҳбатга дугонаси Азиза қўшилди:
— Ўзаро "симпатия", ёқтириш бор. Тез-тез кўришиб туришади. Ўзаро ҳурмат бор.
Гулчеҳра дугонасига қараб кулди:
— Сени ўзи нега олиб келдим-а?
Азиза:
— Бор гапни ёзиш керак-да! Ҳа, учрашиб туришибди, ҳурмат ва ёқтириш, қизиқиш бор, лекин севги йўқ ҳали. Муносабат бор, ҳар хил гап-сўздан кўра тўғрисини ёзаверишсин (кулади).
Гулчеҳра (диктофонга яқин келиб):
— Ана, ёзяпти. Яхши, Алишер, келинг... (менга Алишер дея адашиб мурожаат қилгани боис кулгу кўтарилди) Узр... демоқчи бўлганим, ҳалиги "Телба" фильмида Алишерни комик ролда кўргансиз, аслида ҳаётда жиддий инсон. Шу мавзуга яқин бир гапни айтмоқчиман. Бир интернет сайтида мендан интервью олишган. "Мен орзумдаги инсонни учратишни истайман", деб айтгандим. Мен билан суҳбатлашган қиз "Мен турмушга чиқмоқчиман, эр қидиряпман", деб ёзиб қўйибди. Мазкур воқеага аниқлик киритмоқчи эдим: мен эр қидирадиган ҳолатда эмасман, келажакда орзумдаги инсонни учратишни исташим ҳақида гапиргандим, холос.
— Қандай бекасиз?
— Ажойиб бекаман (кулади). Тухумни зўр қовураман. Уни ҳар хил кўринишда пишира оламан. Хоҳланг, яхшилаб, хоҳланг, чала ярим кўринишда! Ишқилиб тухум билан боғлиқ таомларни яхши пишираман. Бир оилани бемалол эплаб кета оламан. Оила қурмаган бўлсам-да, яхшигина оила бекаси бўлишимни сезаман.
МАЪЛУМОТ
Исм-шарифи: Гулчеҳра Эшонқулова;
Туғилган санаси: 20 июн;
Туғилган жойи: Душанбе шаҳри. Асли Қашқадарё вилояти, Шаҳрисабз туманидан;
Маълумоти: олий. Тошкент давлат санъат институтини тамомлаган;
Яхши кўрган таоми: мастава;
Севимли ранги: оқ, пушти;
У кўринишидан кибрли, аслида эса кўнгли очиқ;
Ёқтирган мақоли: "ойнинг ўн беши қоронғу, ўн беши ёруғ";
Хоббиси: тўй таклифномаларини йиғиш;
Севимли асари: М.Норбековнинг руҳшуносликка оид китоблари;
Севимли фильми: "Малена" ҳамда "Ёр билан ой орасида";
Унинг учун пул: қўлнинг кири;
Севгига чин дилдан ишонади;
Кинодаги илк роли: Лутфулла Саъдуллаевнинг "Мунис онам" фильмида Гулираъно образи;
Иккинчи катта роли: Мирмақсуд Охуновнинг "Севги фазоси"даги Гули;
Халққа танитган роли: Баҳром Ёқубовнинг "Фотима ва Зуҳра" фильмидаги Фотима;
Театрдаги илк роли: "Ҳамлет"да Офелия;
Ёқтирган фасли: ёз;
Илк устозлари: Турғун Азизов, Мунаввара Абдуллаева, Ҳамида Маҳмудова;
Ҳурмат қиладиган режиссёри: Баҳром Ёқубов.