Biz doim go'zalikka intilib yashaymiz. Chiroyli bo'lishga urinib, hamma choralarni izlaymiz. Biroq, tabiiy go'zalikka hech biri teng kelmaydi. O'zlariga oro berish uchun turfa xil kosmetik vositalarni me'yoridan ortiq ishlatadigan "go'zallik sohibalari" faqat bugungi chehrani emas, kelajakdagi chehralarini ham ko'zguda tasavvur qilib ko'rsalar yaxshi bo'lardi.

Bugungi kunda hayotimizga chet el kompaniyalarining har xil kosmetik vositalari kirib kelmoqda. "Oriflame", "Marry Kay", "Faberlic", xullas, ularning soni ko'p. To'g'ri, ular o'z mahsulotlarini talab darajasida chiqarishmoqda. Bu kompaniyalar boshqalarga nisbatan yosh qizlarimizning hayotida muhim o'rinni egallamoqda. Qolaversa, bu kompaniyalar qizlarga go'zallik baxsh etibgina qolmay, balki "a'lo" bahoga o'qishlariga sabab bo'layotgani e'tiborimni tortdi. Qanday qilib hali mohiyatini to'la anglab etmagan bir tijorat tufayli tahsil olayotgan sohasida yaxshi o'qishi mumkin? O'qishga biznesning nima aloqasi bor, degan savol tug'ilishi tabiiy.

Yaqinda bir tanishim shu kompaniyalardan biriga a'zo bo'lib, o'zining "kichik biznesi"ni boshladi. Uning talablarini bajarish uchun kompaniya mahsulotlarini reklama qilib hali u yoqqa, hali bu yoqqa yugurdi. Aytarli darajada o'zining yo'lini ham topdi. Uning bu harakatlari faqat ish uchun emas, o'qishi uchun ham katta yordam bo'ldi. Qanday qilib deysizmi, u tibbiyot kollejida tahsil oladi. Domlalaridan biri o'quvchilarga baho chiqarish uchun ulardan o'z fani haqida emas, "Oriflame" kompaniyasiga nechta odam yozdirganiyu, qancha ball to'plaganiga qarab baho chiqarar ekan. Chunki kollej qizlarining deyarli barchasi shu domla orqali bu kompaniyaga a'zo bo'lishgan edi-da! Kompaniya mahsulotlari haqida to'liqroq ma'lumotlarga ega bo'lishi uchun a'zo qizlarga dars hisobidan javob berishiga nima deysiz? Endi dars jarayonini ko'z oldingizga keltiring. Domla baho chiqarish uchun o'quvchilarning familiyalarini birin-ketin o'qimoqda. O'quvchilardan birining familiyasini aytdi va u turib "Kompaniyaga a'zoman, 92 ball urdim", deb domlaga javob berdi, domla esa unga javoban, "Juda yaxshi, g'ayrat qiling", dedi va jurnalga "5" baho qo'ydi. Navbatdagi familiya o'qilganida u qiz ham kompaniyaga a'zoligini, lekin to'plagan bali kamligini aytdi. Unga "4" baho qo'yildi. U nima uchun "4" baho qo'yganligini so'raganida, savoli javobsiz qoldi...

Bu gaplar aslo to'qima emas, bugungi kunimizda sodir bo'lmoqda. Bizning sog'lig'imiz uchun qayg'uradigan bo'lajak hamshiralarga berilayotgan ta'lim, nahotki qandaydir insonlarning manfaatlari yo'lida qurbon qilinsa? Bu misollarim bilan kompaniyalarni yomonlab, ularda ishlayotganlarni ayblamoqchi emasman. Shunchaki yosh qizlarimiz uchun havas bo'lib ko'ringan bu qiyin muhitga aldanmasliklarini aytmoqchiman, xolos. Tijorat shunchaki beparvo bosib o'tiladigan yo'l emas, uning ham o'ziga xos qiyinchiliklari, zahmatlari bisyor. O'z sohamizning bilimli kadri bo'lib etishishimiz uchun "odam yozdirib ball to'plaganimiz"dan ko'ra, kitoblarni o'qib bilimimizni kengaytirganimiz ma'qul emasmi?

Yulduz FAYZIY,