Yigit bo’lib egolmadingiz bosh,
Bo’lsangizda hijronda nohaq.
Yigitman deb etmadingiz fosh-
Pushaymonni,
Qoldik muallaq.
So’ng zaminga tushdim yuztuban,
Siz-chi hamon falagingizda.
Keyin ketdim,
Alvido degan,
Zorim qoldi yuragingizda…
Kuzatdingiz mag’rurdan-mag’rur,
Qol deyish ham tuyuldi malol.
Tushunmaysiz: sevgi kechirur,
Erkakni tiz cho’ktirsa Ayol.
Yuragimda bir tilak, bir qasd,
Xayolimda berar tasalli-
G’urur ishqdan kelganida past,
Yigit bo’lib yig’laysiz hali.!
Ungacha men o’zgaraman chin,
Menga ko’char o’sha toshday his.
Mag’rur qizdan uzr so’rash-chun,
Yigit bo’lib, kelolmagaysiz.!!!