Бугун душанба. Эътиборингизга «ФК ҳафта ичида» лойиҳасини тақдим этамиз. Айрим бир муаммолар туфайли ўтган ҳафтада лойиҳа тақдим этилмади. Ишонинг, биз ҳам шундай муҳим ҳафтани ўтказиб юборганимиздан афсусдамиз. Бу ҳафтада бўлса мамлакатимиз жамоалари учун ҳеч қандай халқаро учрашув йўқ эди. Лекин, Олий лига борган сари ўзининг қизгин палласига кириб боряпти. Шунингдек ҳамманинг нигоҳи Европадаги "кучли бешлик” чемпионатларига қадалди. Демак, шулар ва бошқалар ҳақида бугунги лойиҳамизда :

 

Олий лига - борган сари қизгинлик!

Ҳа, Олий лиганинг биринчи давра 8-турини ҳам аллақачон ўтказиб бўлдик. Ниҳоят саккизинчи турга келиб "Бунёдкор” ва "Пахтакор” яна пешқадамликни қўлга олишди. Бугун иккала жамоамизда ҳам очколар сони тенгдир. Лекин "Бунёдкор” битта учрашув кам ўтказган. Ушбу турда "Бунёдкор” Самарқзанднинг "Динамо” жамоасини қийналиб бўлсада енгди. "Пахтакор” бўлса Фаргонада дурангга имзо чекди. "Навбҳор”да бу мавсумда анча кўтарилиш кузатилгани рост. Лекин, улар ҳали чемпионликка давогарлик қиладиган даражага етиб келмаганликлари айнан шу турда аён бўлди. Ҳа, айнан "Қизилқум”га Жалилов шогирдлари учрашувни бой бердилар ва ҳозирча учинчи ўринни банд этиб туришибди. "Насаф” эса бу турда "Андижон”ни мағлуб этиб, "Навбаҳор”га яқинлашиб қолди. Лекин, қаршиликларда иккита заҳира ўйини бор ва шунда Кумиков шогирдлари ғалаба қозона олишса, "Бунёдкор” ва "Пахтакор”га қаршилик кўрсатишда давом этадилар. Умуман олганда, бу йил лига анча қизиқарли тус олмоқда!

 

Англия премьер-лигаси – "Челси” чемпион!

Ҳаммасини сўнгги турга қолдиришганди. Лекин «Челси»нинг сўнгги турда «Стэнфорд Бриж»да премьер лига турнир жадвалида 15-ўринни эгаллаб турган жамоага қарши ҳаракат қилиши аниқ эди. Бу кеча «Манчестер Юнайтед» муҳлислари «Уиган»дан мўжиза кутишганди. Лекин, мўжиза юз бермади. «Челси»ни табриклаймиз! Тан олиш керак, «Челси» бу мавсумда «Манчестер Юнайтед»дан кучлилик қилди. Агар "Манчестер Юнайтед” чемпион бўлишни хоҳлаганида, ўзаро учрашувларда ҳеч бўлмаганда дурангга имзо чекиши керак эди. Премьер лига якунланди. Бу йили "Ливерпуль” ўз номига муносиб бўла олмади. Якунда чемпионлар лигасига «Челси», «Манчестер Юнайтед», «Арсенал» ,«Тоттенхем» жамоалари йўл олди. Бу йил «Тоттенхем»нинг йили бўлди. Харри Реднапп жамоаси кучлилардан ҳеч бир жабҳада қолишмаслигини исбот қилди. «Манчестер Юнайтед»да битта Рунининг ўзи ҳам Тевесни, ҳам Роналдуни ўрнини боса олмаслиги маълум бўлди. Алекс Фергюссон ҳеч бўлмаганда Тевесни жамоада сақлаб қолиши керакмиди?

 

Испания Ла лигаси - Ҳаммаси сўнгги турга қолди.

Ла лигада бу ҳафта ҳамманинг нигоҳи ҳаяжон билан «Севилья» -«Барселона» учрашувига қадалди. «Барселона » очко йўқатишини «Реал Мадрид» мухлислари интиқлик билан кутишди. Ҳа,уларни ҳам тушуниш керак. Бироқ, чемпионлар лигасидан мосуво бўлган «Барселона» Ла лигани «Реал Мадрид»га бериб қўйишни хоҳлармиди. «Барселона» сафарда 2:3 ҳисобида ғалаба қозонди. «Реал» бў лса «Атлетико Билбао»ни 5:1 ҳисобида енгди. Кеча Англияда қанақа ҳаяжонли вазият юзага келган бўлса, сўнгги турда Испанияда ҳам шунақа вазият юзага келади! Кимдир сўнгги турда йиғлайди. Буни кимлигини билишимизга оз муддат қолди!

 

Франция биринчи дивизиони - олтин ва кумуш медаллар эгалари аниқ !

Франция биринчи дивизиони якунланишига ҳам бир тур қолди. Лекин бу ерда олдиндан олтин ва кумуш медаллар совриндорлари аниқ бўлди. Ҳайрон бўлманг, бу йил на "Лион”, на "Бордо” чемпионликни қўлга кирита олди. Дидье Дешамп бошчилигидаги "Марсель” жамоаси ўзининг шуҳратли онларини яна бир бор ёдга олди. Бу сафар улар муддатидан олдин чемпиондирлар. "Марсель” муҳлисларини ҳам медаллар билан табриклаб қоламиз. Иккинчи ўринни бўлса, охирги турда айнан "Марсель”ни 3:2 ҳисобида мағлуб этган "Лилль” банд этди. Сўнгги тур "Лион” ва "Осер” учун алоҳида аҳамият касб этади. "Лион” Европа чемпионлар лигасида иштирок этишга руҳсатнома берувчи учунчи ўрин учун курашиши табиий. «Лион» учинчи ўриндаги «Осер»дан икки очко орқада, лекин битта кам учрашув ўтказган. «Бордо» бўлса сўнгги турлардаги инқироз сабабли ҳеч нарсасиз қолди! Ҳа, ҳеч нарсасиз!!!

 

Италия А серияси - Ким чемпион бўларкан?

Бу саволга 16 май куни жавоб оламиз. «Интер» ва «Рома» ўртасидаги очколар фарқи 2 тани ташкил этмоқда. Бу вазиятда ҳамма нарсанинг иложи бор. 37-турда «Интер» «Кьево»ни 4:3, «Рома» «Кальяари»ни 2:1 ҳисобида мағлуб этди. Энди ҳаяжонлар ўртасида сўнгги турга бор эътиборимизни қаратамиз. Жозе Моуриньо «олтин учлик»ни қўлга кирита олармикан? Ёки ўзига кела бошлаган «Рома» «Интер»нинг гегемонлигига чек қўядими? "Милан” бўлса бронза медалларни банд қилиб қўйди. Лекин, "Ювентус” кейинги мавсумда Европа Чемпионлар лигасида тўп сурмаслиги ҳам аниқ бўлди. "Кўҳна сенёрита” таркибига тубдан ўзгартириш киртиш вақти келмадимикин?

 

Германия бундеслигаси - Мюнхен кўчаларида байрам!

Ҳа, "Бавария” бу мавсумда чемпионлик тожини киядиган бўлди. "Бавария” Берлинда "Герта” жамоаси устидан навбатдаги турда 3:1 ҳисобида ғалабага эришди ва "Шалке-04”нинг нурсиз дурангги "Бавария” футболчиларига муддатидан олдин чемпионликни олиб берди. Ҳақиқатдан ҳам, Бавария бу йил чемпионликка лойиқ ўйин кўрсатди. Энди улар бу медалларни олдига Европа чемпионлар лигаси олтин медалларини ҳам қўшишни хоҳлашлари табиийдир. Бунга биз 22 май куни ҳаракат ҳам қилиб кўришади. "Бавария” муҳлисларини дастлабки ютуқ билан табриклаб қоламиз. Лекин бундеслигада 3-6 ўриндаги жамоалар ўртасидаги кураш давом этади!

 

Этиборингизга "ФК ҳафта ичида” лойиҳасини тақдим этдик. Бу ҳафтада бизни Осиёда ажойиб ўйинлар кутмоқда. Бу ҳақда кейинроқ…

FUTBOL-KLUB