|
Кўпчиликнинг тонги хушбўй чойдан бошланади. У аччиқ ёки енгил
дамланган, сутли ёки лимонли, асалли ёки қандли бўлиши мумкин. Ушбу
ичимлик оммабоплиги бўйича сувдан кейин иккинчи ўринда туради. Чойнинг
ватани – Хитой. Кунчиқар мамлакат файласуфлари чой мусалласдан кўра
яхши эканини таъкидлашган, чунки у тетиклаштиради ва мустаҳкамлайди,
шунингдек у инфекция ташувчиси бўлмаганлиги боис сувдан ҳам яхшироқ.
Британияда чойсиз бирор кун ҳам ўтмайди. Офисда ишловчи ҳар бир
британиялик иш куни давомида 12 чашкага яқин ушбу қадимий ичимликни
ичади.
Рухшуносларнинг таъкидлашича,
чойни ичиш тарзига ҳамда ёқтирадиган чой навига қараб кишининг
феъл-атворини тушуниш мумкин экан. Мамлакатимизда, худди Британиядаги
каби, чой ихлосмандлари жуда кўп, демак, ҳар биримиз бизни бир пиёла
чой ичиш учун қаҳвахонага таклиф қилган ҳамкасбимиз, дўстимиз ёки
шунчаки танишимизнинг ҳақиқий феъл-атворини аниқлаш бўйича кичкина
тажриба ўтказиб кўришимиз мумкин. Шундай қилиб, аввало, ҳамсуҳбатингиз
қандай чойни ёқтиришига эътибор қаратиш керак.
Кўк чой.
Чойнинг ушбу навини ёқтирувчи киши жуда вазмин ва оғир бўлади. У
ишончли ва садоқатли дўст. Ягона камчилиги, балки ким учундир бу
фазилатдир, кўк чойни ёқтирувчи киши нозиктабиатли бўлиб, озгина
бўлса-да жадвал ёки режадан четга чиқишларга жуда таъсирчан бўлади.
Ясминли чой.
Бундай чойни ёқтирувчилар интизом ва умум қабул қилинган меъёрларнинг
ўта ишқибозларидир. Ташқаридан бундай киши кибрлидай кўринади, аммо
ичида ўзини бошқача ҳис қилади. Шунингдек, ушбу чойнинг ишқибозлари
алоҳида озодалиги билан ҳам ажралиб туради.
Қандли қора чой.
Бу чойни танловчи киши масъулиятли ва ишончлидир. Ишонтира олиш
қобилиятига эга. Атрофдагилар бундай кишини қатъий деб ҳисоблайдилар,
аммо унинг юмшоқ қалбли ва таъсирчан эканлиги ҳеч кимнинг ақлига ҳам
келмайди.
Қандсиз қора чой. Бундай
киши жуда эътиборли ва зийрак. Бошқаларнинг назаридан қочадиган
тафсилотларни қайд этишга қодир. Ҳар бир саволга ўзининг эътирозга ўрин
қолдирмайдиган нуқтаи назарига эга, бу эса қайсарлик билан баробар.
Сутли қора чой. Ушбу
ичимликни ҳамма нарсага лоқайд кишилар ёқтиради. Муҳим масалаларни ҳал
этишда бундай кишига ишонмаган маъқул. Аммо мулоқотда бундай киши
ўзидан ижобий тўлқинларни тарқатади.
Мевали чой.
Уни ишга берилган ва кўнгилхушликларга жуда кам вақт ажратадиган
кишилар ёқтиради. Бундай кишининг шахсий сифатлари барчага ёқади, аммо
кўп ҳолларда уларнинг соҳиби ҳаммагаям ёқавермайди. У ўз атрофидаги
кишиларни пухталик билан танлайди.
Эрл Грей. Ушбу
навли чойнинг нозик ҳиди уни ичадиган кишининг нозик табиатини
ифодалайди. Фаол, кўп қиррали, ҳаётни севувчи ва доимий тарзда янги
чўққиларга интилувчи. Бундай киши билан ҳар доим нима ҳақдадир
суҳбатлашиш мумкин.
Энди чой навларидан уни ичиш тарзига ўтамиз. Руҳшунос Ребекка Ньютон
бошчилигида ўтказилган тадқиқотларга кўра, "чой” билан боғлиқ олтита
асосий феъл-атворни ажратиш мумкин.
Асабий. Чашкани иккала қўли билан ушлайди. Баъзида уни бармоқлари билан чертиб қўяди. Суҳбатдошининг кўзига қарашдан қочади.
Ўзига ишонмаган. Чашкани иккала қўли билан, худди уларни иситмоқчи бўлгандай ушлайди. Чойни совутиш учун асабий равишда пуфлайди.
Баджаҳл. Чашкани бошига яқин ушлайди ва суҳбат чоғида ундан кўрсатувчи таёқча сифатида фойдаланади.
Ўзига ишонган. Қўлини иягига тираган ҳолда олдинга эгилади. Чойни тез-тез, ишонч ва секинлик билан пуфлайди.
Тингловчи. Чашкани иккала қўли билан юмшоқ тарзда ушлайди. Ҳар доим суҳбатга мойил, суҳбатдоши гапираётганида бироз унга томон эгилади.
Шунингдек, руҳшуноснинг қайд этишича, дўстлар давраси учун тез-тез чой
дамлайдиган киши етакчилик сифатларига эга ва кўнгли очиқ бўлади.
| 
