«Хўв, анави, ўша юлдузни сизга олиб бераман!!!» деб дарахт тагида берган ваъдалари эсингиздами? Сиз атайлаб, яхшилаб қарагансиз – тепангиздаги дарахт ёнғоқ ёки жийда эмаслиги аниқ. Лекин, нима бўлдию барибир шайтон эрингизни йўлдан урди-кетди. Ким билади, балки ота-боболаримизнинг гапи нотўғридир? Эҳтимол, шайтон дарахтнинг ёнғоқми у ёки олмалигини суриштириб ҳам ўтирмас ва дуч келганига чиқиб олар? Аксига олиб, ўша куни у айнан сиз ўтирган дарахтга чиқиб олган бўлса-я? Ахир эрингизнинг ваъдасини бунчалик тез эсдан чиқарганига яна қандай важ бўлиши мумкин? Ҳа, айтганча, ўзингизнинг оёғингиз оғирми, ишқилиб? Оғироёқмисиз, деб сўраётганим йўқ, аксинча, енгилоёқмасмисиз, деб сўраяпман? Тағин, ким билади, дейман-да. Ахир тадқиқотлар ёлғон кўрсатмайди-ку...

Олимлар расмий ёки фуқаролик никоҳида бўлган 3000 эркак ва аёлни сўровга тутишди. Фуқаролик никоҳи – бу анави расман «ЗАГС»дан ўтмаган дегани. Хуллас, асосий гап бунда эмас. Асосийси, юқоридаги тадқиқот ажиб бир натижани кўрсатди. Хулосага кўра: «ҳар бешинчи эркак бирга яшаётган аёлдан бошқасини севар, аёлларда эса бу ҳолат 20 фоизни ташкил қиларкан». Ишонмасангиз, мана бу жойга киринг-да, рус тилида яна бир бор ўқиб олинг. Энди бир нарсага эътибор берайлик: мактабдаги математика фанида бошимга қуйишларига ишонадиган бўлсак, 20 фоиз бу ҳар бешинчи ҳолат дегани. Демак, ёки мактабда менга нотўғри билим беришган (бунга қўшилмайман, чунки математика аниқ фан, бунинг устига ўқитувчиларим ҳам яхши эди), ёки юқоридаги тадқиқот хулосасини аёллар тузган. Атайлаб эркакларни бевафо қилиб кўрсатиш ниятида. Аслида эса эркаклар ҳам, аёллар ҳам бу масалага бир хил муносабатда. Мана бу фикрга қўшилса бўлади. Битта истисно билан: бу хулоса ўзбекларга эмас, чет элликларга хос. Ўзбекларда эса ҳолат ўзгача, тамом-вассалом. Ҳа, айтганча, хулосанинг давомини ўқийдиган бўлсак, ҳар олтинчи эркак бевафоликка бош суқаркан. Тўғри, бунда фақат жисмоний эҳтиёжларини қондиради, холос. Ҳиссиётларини эса аввалгидек сақлаб қолади. Тадқиқотчиларнинг таъкидлашича, одатда кучли муҳаббат ўртача атиги уч йил ва уч ой давом этармиш. Сўралганларнинг ҳар 25 нафари беш йил давомида турмуш ўртоғига бир марта бўлса-да бевафолик қилибди. Ҳар тўртинчи инсон эса никоҳидан умуман бахтсиз эмиш.

Аммо юқоридаги номутаносибликка эътибор қаратадиган бўлсак, хулосанинг бошқа бандлари ҳам шубҳа уйғотади. Сиз-чи, қандай фикрдасиз?