“Похан” (Ж. Корея)- “Бунёдкор” (Ўзбекистон) 4:1 (0:0)

Голлар: Ким Чжа Чун-46, Денилсон-55,77, Ристич-101.- Карпенко-89.

ШАРҚЛИКЛАР БИЛАН ТЎРТИНЧИ ТЎҚНАШУВ

Ўзбекистон клубларининг Чемпионлар лигасида Шарқий Осиё вакиллари билан ўзаро баҳси давом эттирилди. Афсуски, бу гал ҳам шарқликлар йўлимизга тўғаноқ бўлишди.

“Бунёдкор” билан Жанубий Кореянинг “Похан Стилерз” клуби рўбарў келгунча, Осиё Чемпионлар лигаси тарихида мамлакатимиз футболчилари қитъамизнинг шарқий тарафидаги жамоалар билан уч бора бир-бирлари билан тўғри келишган. Бу учала тўқнашув, турнир регламентидан келиб чиқадиган бўлсак, табиийки, плей-офф босқичида юз берган. 2003 йили ярим финалда “Пахтакор” Таиланднинг “БЕК Теро Сасана” жамоаси билан, бир йил ўтиб, яна 1/2 финалда Жанубий Кореянинг “Сеннам Ильва Чунма” клуби билан ҳисоб-китоб қилган бўлса, 2008 йилги мусобақа ярим финалида “Бунёдкор” Австралиянинг “Аделаида Юнайтед”и билан учрашди. Бу баҳсларнинг барчасида рақибларимиз устун келишган.

БИРИНЧИ БЎЛИМ

 Кутилганидек мезбонлар учрашувни шиддатли ҳужумлар билан бошлашди. Бу таббий ҳол эди. Негаки, кореяликлар биринчи ўйинда 1:3 ҳисобида мағлубиятга учрашганди. Шунинг учун жамоанинг етакчи ҳужумчиси Денилсон жароҳати борлигига қарамай, биринчи дақиқаларданоқ майдонга тушди. 4-  дақиқада майдон эгалари қўлай имкониятни йўққа чиқаришди.  Олтинчи дақиқада энди меҳмонлар олдинга ташланишди. Жасур Ҳасанов тўпни қулайроқда турган Солиевга етказиб берди. Анвар эса ўзидан-да қулайроқ бўлган Ривалдо томон тўпни оширди. Бироқ рақиб ҳимоячилари тўпни майдон ташқарисига чиқариб юборди. Шундан кейин жамоалар хавфли ҳужумлар уюштиришни канда қилишмади. 33- дақиқа қарши ҳужумда Денилсон "Бунёдкор"нинг 3 нафар футболчисини алдаб ўтиб дарвоза томон ёриб кирди ва ўзидан-да қулайроқ вазиятда турган шеригига тўпни оширди. Но Бюн Чжун эса тўпни чамаси 6 метрлар узоқликдан ноаниқ тепиб юборди. Дастлабки, 45 дақиқада жамоалар тинимсиз ҳужум қилишларига қарамай, ҳисобни очиш ҳеч кимга насиб этмади.

ИККИНЧИ БЎЛИМ

Учрашувнинг иккинчи қисми  “қалдирғочлар” учун омадсиз бошланди. Биринчи бўлим охирларида заҳирадан майдонга тушган Ким Чжа Чун ҳимоячиларимизнинг хатосидан сўнг дарвозабон билан яккама-якка вазиятга чиқди ва Нестеровни доғда қолдириб, ҳисобни очди - 1:0.  Орадан икки дақиқа ўтиб, Денилсон яна бир имкониятдан унумли фойдалана олмади. Гол киритгач, мезбонлар ҳужуми янада кескин тус олди. Натижада  55 – дақиқада бурчакдан ошириб берилган тўпни Денилсон боши билан дарвоза тўрига жойлаб ҳисобни 2:0га оширди. Шундай натижа ҳам Фриас шогирдларини қониқтирарди.  Лекин шундай бўлса-да, уларнинг ҳамлалари тинмасди. Шу куни “Бунёдкор” ҳимоячиларига анча оғир бўлди. Кучли босимга эса улар кўп ҳолларда дош бера олишмади. Айниқса, иккинчи таймда. Айтиш жоизки, аксарият вазиятларда вакилларимизга омад кўлиб боқди. Айрим ҳолларда эса Нестеров жонга оро кирди. Аммо 77- дақиқада тиниб-тинчимас Денилсон ҳимоядаги пала-партишликлар оқибатида ҳисобни 3:0га етказди. Бу вазиятда Ристич тўпни ўз вақтида Денилсонга етказиб берди. Бразилиялик футболчи эса жуда осонлик билан тўпни дарвоза тўрига жойлаб қўйди. Мезбонлар “Бунёдкор” дарвозасига учинчи тўпни киритгач, Сколари майдонга янги кучларни туширди.  Бу ўзгаришлар эса самарасини берди. Иккинчи бўлимда майдонга тушган Виктор Карпенко узоқ масофадан “Похан” дарвозасини аниқ нишонга олиб, ҳисобни 3:1га етказди. Тошкентда ҳам шундай ҳисоб қайб этилгани боис, ғолибни аниқлаш мақсадида қўшимча бўлимлар ўтказилди.