“Бунёдкор” ФК делегацияси бугун Похан шаҳрига йўл олади. Тунги соат 23:00да “қалдирғочлар” делегацияси чартер рейс орқали Жанубий Корея томон парвоз қилади. Делегация таркибига клуб аъзоларидан ташқари, ҳар доимгидек, жамоа фан-клуби ва бир гуруҳ журналистлар ҳам кирганлар.

Таъкидлаш жоиз, Осиё Чемпионлар лигаси турнирида “Бунёдкор” бу галгиси билан ўнинчи бор сафарга чиқаётган бўлса, клубнинг умумий делегацияси ҳали бу қадар катта бўлмаганди (жами 150га яқин киши). Жумладан, Жанубий Кореяга юздан ортиқ ишқибозлар йўл олишаётир. Клубимизнинг учта вакили эса Поханга кеча Сеул орқали жўнаб кетишган эди. Улар асосий делегация боргунча, Ўзбекистондан ташриф буюрадиган меҳмонларга қулайликлар яратиш мақсадида, жанубий кореялик мутасаддилар билан биргаликда, бир кун ичида барча ташкилий масалаларни ҳозирлаб қўйиш ишларини амалга оширишади.
Тошкентдан учадиган ҳаво лайнери юртдошларимизни дастлаб Пусан шаҳрига элтиб келади. 2002 йилги Осиё ўйинларини қабул қилган Пусандан эса қўшни Поханга барча йўловчилар автобусларда етиб боради. Пусандан Похангача бўлган масофа 100 километрдан ошиқроқ. Похан шаҳри Жанубий Кореянинг шарқида, Тинч океани ҳавзасига кирувчи Япон денгизи соҳилида жойлашган.

Бош мураббий Луиз Фелипе Сколари жавоб учрашувига қуйидаги футболчиларни олиб кетмоқда:
Дарвозабонлар – Нестеров, Бугало ва Зуҳуров
Ҳимоячилар – Жўраев, Ғофуров, Каримов, Гочгулиев ва Раимқулов
Ярим ҳимоячилар – Ҳайдаров, Жоао Виктор, Ҳасанов, Жепаров, Карпенко, Рамос, Кападзе, Саломов, Мелзиддинов ва Тўрақулов
Ҳужумчилар – Ривалдо, Солиев ва Мурзоев

Клуб аъзолари сафар давомида “Кёнджу Хилтон” отелида истиқомат қилишади. Фан-клуб вакиллари эса – “Ramada Encore AT Pohang” меҳмонхонасида турадилар.
Олган маълумотларимизга қараганда, Поханда об-ҳаво 23-24 даража иссиқ, лекин ҳар куни ёмғирлар ёғиши тўхтамаяпти.

Эслатиб ўтамиз, "Похан Стилерз" - "Бунёдкор" ўйини 30 сентябрь куни маҳаллий вақт билан соат 18:30да (Тошкент вақти билан соат 14:30да) бошланади. Учрашув ЎзТВнинг "Спорт" канали орқали жонли эфирда намойиш этилади.