Бугун Осиё Чемпионлар лигаси гуруҳ босқич учрашувларига старт берилди. 

Тошкентнинг «Бунёдкор» жамоаси Саудия Арабистонининг «Ал-Иттиҳод» клубини «ЖАР» стадионида қабул қилди.

Ўйинда Луис Фелипе Сколари шогирдлари йирик - 3:0 ҳисобида зафар қучишди.

Ўйиннинг 3-дақиқасидаёқ «қалдирғочлар» ҳисобни очишга муваффақ бўлишди. Жепаров - Денилсон комбинациясидан сўнг тўп Ривалдога келиб тушди. "Бунёдкор" сардори чамаси 21 метрлардан тўпни дарвозанинг тўққизлигига жойлаб қўйди - 1:0.

Иккинчи гол 22-дақиқада киритилди. Ривалдо уч ҳимоячини алдаб ўтиб, тўпни ўнг қанотда турган Карпенкога берди. У эса тўпни жарима майдончасига ошириб берди. Антаиф тўпни мушти билан уриб юборишда хатоликка йўл қўйди. Қулай вазиятда турган Жасур Ҳасанов тўпни ўнг оёғи билан дарвоза тўрига жойлаб ҳисобни 2:0га оширди.

Ушбу ҳисоб биринчи бўлим охиригача сақланиб қолди. Иккинчи бўлимни ҳам "Бунёдкор" аъзолари кўтаринки руҳда бошлашди ва ўйиннинг 66-дақиқасида ҳисобни 3:0 кўринишига олиб келишди. Жасур Ҳасанов тепган жарима зарбасидан сўнг тўп рақиб аъзосига тегиб ўз йўналишини ўзгартирди. Тўпга баланд сакраган Денилсон боши билан Антаиф дарвозасига жойлаб ҳисобни 3:0га оширди. Бу Денилсоннинг "Бунёдкор" сафидаги илк голи бўлди.

3:0 ҳисоби учрашув сўнгигача сақланиб қолди ва Тошкентнинг "Бунёдкор" жамоаси илк ўйинда йирик ҳисобда зафар қучди. Сколари шогирдлари иккинчи тур учрашувини меҳмонда "Ал-Ваҳда" клубига қарши ўтказади.