Шундай бўлди ҳам. Ўйин бошланиши билан терма жамоамиз фақат ва фақат ҳужум уюштиришди. Японияга қарши ўйиннинг дастлабки 10 дақиқасида 2 та гол урган КХДРдан асар ҳам йўқ эди. Назаримда, Ри Сонг Хонинг мазкур ўйинга танлаган тактикаси шундай бўлган бўлса керак: биринчи бўлимда дарвоза даҳсизлигини сақлаган ҳолда, иккинчи бўлимда ўзбекистонликларнинг чарчашини кутиш. Ҳаддан ташқари жисмоний жиҳатдан кучли ва деярли камчиликсиздек кўринган шимолий кореяликлар хато қилиши мумкинлиги кўриниб турди. Тўғри, дарвозани ишғол қилиш учун юз фоизлик вазият бўлмади, аммо КХДР футболчилар хато қилиб туришди. Ана шундай хатолар давом этиб турса, тез орада гол киритиладигандек туюлаётган бир пайтда, ё Сардор Раҳмонов, ёки ҳакам "қовун" туширди. Тўғри, бу вазиятда Сардор тўпга оёғини баланд кўтарганча рақибга нисбатан хавфли ўйин қилди. Аммо шуни унутмаслик керакки, тўпга Раҳмонов яқинроқ эди ва ҳақли равишда тўпга биринчи бўлиб етиб келди. Тўпни узоқлаштирганидан сўнг, инерция билан футболчи томон оёқлари билан сакради (бу вазиятга берган баҳоимиз ҳозирча шу. Бу вазиятга бағишланган таҳлилни "Чемпион"нинг Равшан Эрматов блогида ёритамиз).

Бир киши кам бўлиб қолган бўлсада, футболчиларимиз ҳужум уюштиришдан чўчишмади. Фақатгина ўйин тугашига 5 дақиқа қолганида КХДР футболчилар вазиятни қўлга ола бошладилар. Биринчи бўлимдан сўнг эса ҳисоб очилмади.

Иккинчи бўлимда терма жамоамиз камчиликда бўлса ҳам ҳужум уюштиришга уринди. Бу тахминан 10 дақиқа давом этди. Шундоғам жисмоний жиҳатдан кучли ва майдонда бир киши кўп бўлиб ўйнаётган кореялик аста-секин ташаббусни қўлга ола бошлашди. Бу орада КХДР бош мураббийи майдонга 2 нафар ҳужумчини ташлади ва корейс ҳужумчиларининг сони 3 нафар етди. Натижада улар асосий эътиборни ҳужумга қаратишди. Табиийки, ўсмирларимиз ҳам фақат ҳимояга ётишни мақсад қилишмаганди. Биринчи бўлимда кўп хато қилган, аммо иккинчи таймда фаол ўйнаётган Темур Ҳакимов ўйин тақдирини ҳал қилувчи иккинчи хатога (биринчисини ҳакам қилиб бўлганди) йўл қўйди. Майдон макарзида финат ишлатмоқчи бўлиб, тўпни йўқотди. Қарши ҳужум, дарвозабон билан бирга бир вазият, тўпнинг олис бурчакка узатилиши ва Ри Кванг Ил Ғанишер Холмуродовнинг бўш қолганини бурчагини аниқ нишонга олди.

Ушбу голдан сўнг футболчиларимизнинг асаби янада бузила бошлади. Ўйин тугашига 5 дақиқа қолганида яна ўша ўнг қанотдан ҳужум ва бу сафар Холмуродовнинг яқин бурчаги ишғол қилинди. Шундан кейин ўйин бўлмади. Аббос рақибига қўполлик қилгани учун иккинчи марта огоҳлантирилгани учун майдондан четлатилди. Бу ҳолат майдон четида бўлгани учун ўша томондаги мухлислар секторида майдонга буюмлар учиб туша бошлади. Натижада ҳакамлар ўйинни тўхтатиб қўйишди. Ўйин тўхтаб турганига қарамай, бу орада баъзи футболчиларимиз огоҳлантириш олишди. Ҳакамлар 3 марта ўйинни давом эттирмоқчи бўлишди. Футболчиларимизнинг илтимосларидан сўнг, мухлислар бироз тинчланишди ва 5-6 дақиқа давом этган танаффусдан сўнг ўйин яна давом эттирилди. У атиги 10 сония давом этди. Ҳакам зудлик билан ўйинни тўхтатиб қўя қолди. Ўзбекистон-КХДР - 0:2.

Йигитларимиз мағлубиятга мутлақо лойиқ эмасдилар. Ҳакамнинг хатоларидан сўнг ҳам улар руҳан синиб қолишмади. Имкон қадар курашишди, ҳужумга ўтишди. Бизга мана шундай лаҳзаларни тақдим этишгани учун уларга миннатдорчилик билдирамиз!

ЎСМИРЛАР ЎРТАСИДА ОСИЁ ЧЕМПИОНАТИ
ФИНАЛ. 7 ноябрь, якшанба
ЎЗБЕКИСТОН-КХДР - 0:2
Голлар: Ри Кванг Ил 72, Чжо Кванг 85
Четлатишлар: Сардор Раҳмонов 31, Аббос Махсталиев 85