|
Бировнинг кўзида майдагина гардни ҳам
илғаб олишга қодирсиз (айниқса агар у севган кишингизнинг кўзида
бўлса), ўзингизнинг кўзингиздаги ходалардан ясалган улкан солни эса
ўжарлик билан эътибордан четда қолдирасиз.
Чарчамасдан умр йўлдошингизга турли
эътирозларни билдирасиз, унинг идеалингиз тўғрисидаги
тасаввурларингизга тўғри келмайдиган хатти-ҳаракатидан норози бўласиз
ва уни ўзгартиришга, унга турли йўллар билан тазйиқ ўтказишга уринасиз.
У сизга гуллар ҳадя этмайди,
тўшагингизга нонушта олиб келмайди, барда дўстлари билан кечгача қолиб
кетади, шундай қилиб муносабатларингиздаги романтика ўрнини оддий
турмуш ҳақиқати эгаллаб олган. Сиз аравани қўш ҳўкиз тортишини унутган
кўринасиз. Муносабатларингизда юзага келган вазиятда сизнинг ҳам баҳоли
қудрат ҳиссангиз бор. Балки у ўзини талай таъналар кутаётган уйга
боргиси келмаётгандир ва шунинг учун вақтини дўстлари билан ўтказишни
афзал кўрар. Ахир дўстлари «Эркакни алоҳида шафқатсизлик билан арралаш»
номли цирк номерини унда синаб кўрмаслиги аниқ.
Сиз ўзингизни заҳарханда аёл каби
тутасиз, майда-чуйда нарсаларни баҳона қилиб, жанжал кўтарасиз, севикли
ёрингизни нима учун у сизга икки соат давомида бирор мартаям қўнғироқ
қилмагани ҳақида сўроққа тутиб, азоблайсиз. Ҳолбуки ўзингиз турмуш
ўртоғингизнинг рақамини теришни хаёлингизга ҳам келтирмагансиз. Нега
энди айнан у сизга қўнғироқ қилиши керак экан? Балки у ҳам сизнинг
қўнғироқ қилишингизни кутгандир?
У сиз билан меҳрибон, мулойим бўлишни
бас қилганидан, сизни эркалашлари камайиб кетганидан аччиқланасиз. Агар
ўзингизга назар ташласак-чи? У билан учрашувга либосни пухталик билан
танламайсиз, ўзингизга оро бермайсиз, баъзида пардоз буюмларингиз ҳар
ерда сочилиб ётади. Эрингизнинг жиғига тегиб, телефонда соатлаб
дугоналарингиз билан энг сўнгги ғийбатларни муҳокама қиласиз.
Арзимас нарсалардан хафа бўласиз,
суюкли ёрингизга таъналар ва айблар кўринишидаги тонналаб салбий
ҳисларингизни тўкиб соласиз. Шундай экан, нега энди эрингиз сиздан
совуганига, сиз билан учрашувни ҳаётидаги энг бахтли лаҳза каби
кутмаётганига ва сизни қўлида кўтариб юрмаганига ҳайрон бўласиз?
У сизни мураккаб вазиятларда керакли
тарзда қўллаб-қувватламаяпти, сизга ширин сўзи ва амалий ҳаракати билан
ёрдам бермаяпти, муаммоларингизни англаб етишга ҳаракат қилмаяпти. Хўш,
ўзингиз-чи? Айтайлик, жуфти ҳалолингизнинг бирор иши юришмаяпти,
масалан, у ўзига яраша иш тополмаяпти. Сиз нима қиласиз? Уни мураккаб
дақиқаларда қўллаб-қувватлаш, сизнинг унга бўлган муҳаббатига ишончини
мустаҳкамлаш ўрнига, турмуш ўртоғингизни ҳаракатсизликда ва
бефойдаликда айблаб «арралай» бошлайсиз.
Муносабатларингизнинг бошида сиз қувноқ, хотиржам ва фаол эдингиз.
Севгилингизни қандай бўлса, шундайлигича қабул қилгансиз, унинг сизгача
бўлган шахсий ҳаётидаги икир-чикирларни қўзғамагансиз. Агар у дўстлари
билан кўпроқ мулоқотда бўлса, уни тушунишга ҳаракат қилгансиз, унинг
гапириш услуби, хуррак отишини танқид қилмагансиз. Ташқи қиёфангизга
доим эътибор бериб, саранжом-саришта бўлгансиз.
Ҳозир эса сиз юрагингизни беришдан
бош тортиб, фақат ундан олиш ҳақида ўйлайсиз. Эрга нисбатан бундай
истеъмолчиларга хос муносабат унда ҳам худди шундай механизм ишга
тушишига олиб келади. Бир оддий ҳақиқатни англаб етишингиз лозим:
ҳаётингиздаги ҳар бир вазиятни ўзингиз келтириб чиқарасиз.
Мавжудлигингизнинг ҳар бир дақиқаси – сиз коинотга жўнатаётган
сигналларнинг инъикосидир. Юрагингизни кўпроқ берган пайтингизда,
кўпроқ олганингизни эслаяпсизми?
Турмуш ўртоғингиз сизга гуллар ҳадя
этиш ва ресторанларга олиб боришни бас қилдими? Ушбу ачинарли
камчиликни тузатиш ўзингизнинг қўлингизда. Биринчи бўлиб ўзингиз унинг
кўнглини топиб, хурсанд қилишга уриниб кўринг, романтик сюрпризларга
бой кечани тайёрланг. Ёрингиздан анчадан бери эътибор ва ғамхўрлик
кўрмаган бўлсангиз ҳам ташаббус кўрсатишдан қўрқманг. Ўзингизни
тартибга келтиринг. Оиладаги келишмовчиларнинг сабабини ташқаридан
изламанг – уларнинг бари ўзингизда.
|
